2 KORINTUS 6 - WUKE SUSI WATTI'U AL᷊AL᷊USASSA

¹ Ana waugu i yami mammanara suadio'a ringannu Ruata, ne i yami sumal᷊ande arie i yamiu ma'ola'a tawe gunane apapia naungngu Ruata udde.

² Sulal᷊ummu Wuke Susi, Ruata nabbisara, “Su tempo apan ipaapulu, i Ya'u buatte naddaringikka Si'o, wuṛṛu su allon pananal᷊amatta, i Ya'u buatte nantul᷊ungngu.” Naunge paapia-pia, ete orassa indi tempo apan ipaapulu-U udde. Ete orassa indi tempone ipanal᷊amatta.

³ I yami maddiri manaran kami iapaasal᷊a. Ana waugu udde i yami tawe mangonggolu pinangiananne su sangkatou ipa'ola'a olangnge udde.

⁴ Arawe sulal᷊ummu al᷊awo'u inolaanna i yami mapaal᷊iatta'a manungku ete i yami allangngu Ruata. Ana waugu al᷊awo'u hatin asasusa buatte niapendamanni yami ringannu sabare;

⁵ i yami nisansaranna, niṛṛuumanna, wuṛṛu niṛṛimpulunanna, i yami mammanara maṛṛimadda, mal᷊awa matiilla, wuṛṛu masokka lai tawe maasomba anna.

⁶ Ringannu pia inolaanna mapia, pande, masabbare, wuṛṛu naungnga mapia, i yami mapaal᷊iatta'a manungku i yami udde allangngu Ruata. Wuṛṛu lai ringannu uaantimma tatul᷊ungnga wuassu Ghaṛṛahon Duata, wuṛṛu ringannu darangngu apan su ṛinone,

⁷ wuṛṛu ringannu mabbatti'a watti'u Ruata wuṛṛu ringannu taṛṛinon Duata, i yami mapaal᷊iatta'a manungku i yami indi allangngu Ruata. I yami uaagassa apulu Ruata maola'a ahiddi ami ipamangalo ara'e ipannohassa wadangngi yami.

⁸ I yami aaddatanna, arawe haggal᷊usaanna lai, raddaloanna, wuṛṛu aal᷊uandahanna lai. Salaiwe i yami mabbiakka matul᷊idda, i yami aansilanna taṛṛa awusu.

⁹ I yami sassunnanna taumata awagananna, arawe i yami asingkatannu awadaalla. I yami sassunnanna nate, arawe wutte'e i yami ta'e wiakka. Salaiwe i yami sassansaranna, i yami tawe nate.

¹⁰ Salaiwe naungngi yami massusa, arawe i yami sidutu lulluassa lai. I yami aellehanna asiangnga, arawe i yami suete napaa'alan taumata nambo. I yami aellehanna tawe darotongnga, arawe su ṛinone i yami uatahuanna sarangkanambone.

¹¹ Manga tuṛṛangnga apan arangnguanna su Korintus! I yami buatte nabbisara uahahati si yamiu. Anambon lal᷊oṛṛo naungngi yami buatte niwal᷊o si yamiu.

¹² I yami manutuba naungngi yami si yamiu, tumba'u i yamiu mammuni naungngi yamiu si yami.

¹³ Orassa indi, wala'e i ya'u mabbisara ere al᷊aṛṛana'u sassane. Wu'ate lai naungngi yamiu si yami.

Al᷊aṛṛa'a sumaruanna manga taumata apan tawe pangangimanne

¹⁴ Arie maammulu manga taumata apan tawe mangngimanna Mawu Yesus; udde tawe su ṛinone. Tawe mariaddi apapia maammulu al᷊al᷊eo! Tawe mariaddi asasemakka maammulu araranduma.

¹⁵ Tawe mariaddi Kristus maammulu Setanna. Apa sul᷊ungnge taumatan Saṛṛani wuṛṛu taumata wal᷊ine Saṛṛani?

¹⁶ Apa sul᷊ungnge Wal᷊e Mawu wuṛṛu wal᷊em paal᷊uanna? I ite indi Wal᷊en Mawu, eteudde Ruata apan wiakka. Ruata sassane nabbisara, “I Ya'u sarun matana'a su pattangnganni mangitou, wuṛṛu mabbiakka suadio'a ringanni mangitou. I Ya'u sarun maola'a Ruata mangitou wuṛṛu i mangitou sarun maola'a al᷊aṛṛana-U.

¹⁷ Ana waugu udde, tantanga'e manga taumata apan tawe maaillal᷊a Ruata udde, wuṛṛu pattingkaṛṛaeten batangannu wuassi mangitou. Arie paa'aukka ringannu apa apan maarantinna ne i ya'u sarun manengkamma si yamiu.

¹⁸ I Ya'u sarun maola'a Iamangngu, wuṛṛu i yamiu sarun maola'a al᷊aṛṛana-U ete aroddi wisaran Mawu Apan Lembon Mataṛṛino.”