2 KORINTUS 4 - WUKE SUSI WATTI'U AL᷊AL᷊USASSA

Darotongnga wuassu surga sulal᷊ummu tampa apan niola'a wuassu leta'a

¹ I yami ma'ola'a manara indi ringannu ahewallu naungngu Ruata. Ana waugu udde i yami tawe mangillol᷊o.

² I yami tawe mappaattu inolaanna marandumma apan maasili. Yami maddiri mammanara ringannu mangngapande ara'e mammal᷊elongngu wisaran Duata. I yami mangngimbe Ruata ringannu naungnga apan matul᷊ida tumuṛṛuttu apulu-Ne. Ana waugu udde, i yami mangngantimma anambon taumata ma'ellega si yami ringannu mapia sulal᷊ummu naungnge.

³ Amungkangngu Watti'u Al᷊al᷊uassa apan niapaasingkati yami udde taambe niasunnanna, ne tumba'u manga taumata apan mattudan papate apan tawe maasunna.

⁴ Monganna lal᷊eo apan uaparenta runia indi nakkapingnga ṛingirannu manga taumata apan tawe mangimanna udde. Monganna apan sidutu mannal᷊are si mangitou tadea'u i mangitou tawe maasilo semakka wuassu Watti'u Al᷊al᷊uassa udde, su ola'u awawantugi Kristus, apan naola'a lihiddu Ruata.

⁵ Watti'a apan iwabbatti'i yami udde wal᷊inewe watti'a su ola'i ami sassane. Watti'a uddewe watti'a su ola'i Kristus; manungku eteudde i Tou Mawu; wuṛṛu ete i yami manga allang-Nge ana waugu i Tou.

⁶ Ruata mabbisara, “Ṛinone wuassu lal᷊ummu ararandumma sumabangnga asasemakka,” Ruata lai apan napaasabangngu semakka wuassu lal᷊ummu naungngi ite, tadea'u ṛingiṛṛanni ite masemakka ipassunna awawantugu Ruata apan lullansiangnga su hatin Kristus.

⁷ Arawe darotongngu surga apan maṛṛamaga udde iaapiddi yami su wadangngi yami apan tawe aregane indi apan niola'a wuassu leta'a. Ringannu aroddi nilumiatta'e manungku awawantugu taṛṛino udde su Ruata wal᷊ine si yami.

⁸ I yami niapaasal᷊a wuassu al᷊awo'u tampa, arawe i yami tawe nia'ul᷊uhanni mangitou. I yami tuttiangnga arawe i yami tawe awul᷊iannu antimma.

⁹ Manambo apan uasaseetti yami, arawe tawe saran paassa i yami uatana'a sassane. Wuṛṛu salaiwe masokka i yami puul᷊anna ma'oman sara manawo, arawe i yami tawe mate.

¹⁰ Sidutu i yami uapendama papate Mawu Yesus su wadangngi yami, tadea'u pabbawiak-Ke lai lumiatta'a su wadangngi yami.

¹¹ Su al᷊o'engngu allo i yami mabbiakka, i yami sidutu ia'umpangngu papate ana waugu Kristus, tadea'u ringannu aroddi wiakki Kristus lai wotongnge lumiatta'a su wadangngi yami apan marosa indi.

¹² Indi atappasanne manungku sulal᷊ummu wadangngi yami papate tantal᷊anna mappaamattu taṛṛinone, arawe i yami lulluassa, manungku ete wiakka apan tantal᷊anna mammanara sulal᷊ummu wadangngu.

¹³ Sulal᷊ummu Wuke Susi pia bisara arendi, “I ya'u mangngimanna ana waugu udde ya'u mabbisara.” Ne ringannu atatohassu mangngimanna ereudde lai, yami mabbisara ana waugu i yami mangngimanna.

¹⁴ I yami pia antimma manungku Ruata apan buatte napaawiakku Mawu Yesus, sarun mapaawiakki yami lai ringannu Mawu Yesus, wuṛṛu mangapiddi yamiu wuṛṛu i yami su saruan-Ne.

¹⁵ Sarangkanambone udde hunanu sassane. Ana waugu lembon aatambanna taumata uapendamma darangngun Duata, lembon manambo lai aal᷊iomanna apan iaal᷊iomanna su Ruata; ringannu aroddi Ruata wantuhanna.

Mabbiakka ringannu mangngimanna

¹⁶ Ana waugu udde i yami tawe mangillol᷊o. Salaiwe sulal᷊ummu wadangngi yami al᷊al᷊eo aatambanna, arawe su pangangimanna i yami a'olaanna wakku su miallo-miallo.

¹⁷ Wuṛṛu asasusa apan tawe tumaniten mawakkata indi, apan tumba'u papendamanni yami tal᷊an kadio'a, sarun mangonggolu hessine si yami sambau al᷊al᷊uassa apan wahewalla wuṛṛu tawe pangudusanne. Al᷊al᷊uassa udde maggewal᷊anna marau amungkangngu isul᷊ungngu asasusa udde sassane.

¹⁸ Ana waugu i yami tawe ma'innunu manga inolaanna apan aasiloanna, arawe apa apan tawe aasiloanna. Apan aasiloanna tumba'u tal᷊an kadio'a, arawe apa apan tawe aasiloanna udde mal᷊annu-l᷊annu sarangkal᷊o'engnge.