2 KORINTUS 3 - WUKE SUSI WATTI'U AL᷊AL᷊USASSA

Mangangimben paaire wakku

¹ Apa indi aasiloanna ere ola'u i yami maddalo watanganni yami lai? Ara'e wotongnge mariaddi yami mappandumma surattu daralo si yamiu, ara'e wuassi yamiu, ere lai raddeaannu taumata waine?

² Ete i'o sassane surattu daralon kami, apan uawoṛṛetta sulal᷊ummu naungngi yami apan wotongnge asingkatanna wuṛṛu iwasan taumata nambo.

³ I mangitou sassane wotongnge maasilo manungku tuṛṛangnga naola'a suratta apan niwoṛṛetti Kristus, wuṛṛu niapaapidda si yami. Suratta udde wal᷊ine niwoṛṛettu tinta, arawe ringannu Ghaṛṛahon Duata apan wiakka; wal᷊ine lai su wowon batu pamamoṛṛetanna, arawe sulal᷊ummu naungngu taumata.

⁴ I yami mabbisara aroddi ana waugu pangangimanni yami su saruannu Ruata sulal᷊ummi Kristus.

⁵ I yami tawe sambau pinangiananne mapaal᷊iatta'a manungku i yami wotongnge mammanara manara indi, arawe Ruata nangonggolu apande udde si yami.

⁶ Ete i Tou apan na'ola'a si yami mappammanara su sambau paaire apan wakku; paaire apan uaantimma Ghaṛṛahon Duata, wal᷊ine su tita apan uawoṛṛetta. Ana waugu apan uawoṛṛetta udde mangngapiddu papate, arawe Ghaṛṛahon Ruata udde mangngonggolu wiakka.

⁷ Su tempo paaire apan mangngapiddu papate udde niola'a wuṛṛu nipaangnga su watu, semakku Ruata lullansiangnga ringannu sussal᷊endapa su hatin Musa. Semakke aroddi atilangnge na'oman sara walahannu Israel tawe maasilo hati Musa, salaiwe lansiangnga su hatine udde mal᷊abukke su tempo udde. Ne amungkangngu maaola'a paaire apan mangngapiddu papate udde nitenega ringannu awawantuga apan aroddi ahewalle,

⁸ asinungka paaola'a paaire apan nionggolu Ghaṛṛaho Ruata nitenega lembo mawantuga lai.

⁹ Amungkangngu paaire apan maṛṛuumannu taumata udde aroddi awantuge, lembon mabbantuhanna lai paaire apan maaola'a taumata masasangkapia ringannu Ruata.

¹⁰ Wotongnge iwisara manungku apa apan paarorone mawantuga, tate bantuge lai ana waugu awawantuga apan orassa indi.

¹¹ Amungkangngu pia sambau saranapa apan mataṛṛangnga tumba'u sangkatempo, aroddi awantuge, nangilembote lai sambau apan tutune lembon awantuhanne lai.

¹² Ana waugu i yami uatahuanna antimma ereudde, ne i yami waṛṛani mabbisara aroddi.

¹³ I yami tawe ere Musa apan mallindumma hatine ringannu tatindunga tadea'u walahannu Israel taweddu maasilo semakku Ruata tantal᷊anna mappaddumma wuṛṛu mawul᷊i wuassu hatine.

¹⁴ Ṛingiddi mangitou nawul᷊ite. Wuṛṛu na'oman sara allo indi lai ṛingiṛṛanni mangitou ta'e lal᷊indumannu tatindungnga su tempo i mangitou mabbasa manga wuken paaire tabbe udde. Lal᷊indumma udde mante mawu'a amungkangngu taumata uaaukka ringanni Kristus.

¹⁵ Orassa indi lai, napawe i mangitou mabbasa manga Wuke Musa, lal᷊indumma udde ta'e ual᷊indumma ṛingiṛṛanni mangitou.

¹⁶ Arawe amungkangngu pia sangkatou rumanta sumaruanna Mawu, lal᷊indumma udde sarun wu'anna wuassu hatin taumata udde.

¹⁷ Ne, Mawu apan iwabbatti'a isindi, eteudde Ghaṛṛaho. Wuṛṛu suapan pia Ghaṛṛaho Mawu, isudde lai pia al᷊al᷊uassa.

¹⁸ Orassa indi hatin kite tawe lal᷊indumannu tatindunga wuṛṛu i ite mangngapiddu awawantugu Mawu Yesus. Wuṛṛu ana waugu udde i ite sidutu wal᷊uanna maola'a ere i Tou; mallannu i ite maola'a mawantuga. Awawantuga udde wuassu Ghaṛṛaho, wuṛṛu Ghaṛṛaho udde eteudde Mawu.