2 KORINTUS 10 - WUKE SUSI WATTI'U AL᷊AL᷊USASSA

Paulus napaatohassu manarane

¹ Orassa indi ya'u, Paulus, maapulu mabbal᷊on sambau hatto si yamiu. I ya'u indi, unnu taumata, masaṛṛionto'a amungkangngu uasasaruanna ringanni yamiu, arawe waṛṛani amungkangngu mararau. Ne ana waugu asasaṛṛionto'a wuṛṛu apapia naungngi Kristus,

² i ya'u sumal᷊ande arie mamata'u ma'ola'a tumaniten maṛṛagissa si yamiu napawe manga taumata apan mabbisara manungku i yami mammanara ana waugu apulun runia indi.

³ I yami atonna ta'e mabbiakka sulal᷊ummu runia, arawe i yami tawe mammanara tumuṛṛuttu apulun dunia indi.

⁴ Manga ahidda apan ipappaatti yami sulal᷊ummu manaran kami wal᷊inewe ahidda wuassu runia indi, arawe ahidda wuassu Ruata uataṛṛino. Ringannu manga ahidda udde i yami maṛṛimunsa'a manga tampa mangitou; i yami manniko'u manga patatatiakka

⁵ wuṛṛu manggohakku tanda'u atatanggakka apan niola'a ipanompolla asingkattu Ruata. I yami nanametta ṛingiṛṛannu manga taumata wuṛṛu na'ola'a si mangitou massuṛṛubawa si Kristus.

⁶ Wuṛṛu amungkangngu i yamiu buatte tinumuṛṛutta ringannu atonna-tonna, i yami uasaddiate maṛṛuumannu anambon taumata apan maddiri tumuṛṛutta.

⁷ Ṛinone i yamiu maatutukka inolaanna apan atonna. Amungkangngu sangkatou mangngimanna manungku i tou tatahuananni Kristus, ṛinone i tou managu watanganne sassane wuṛṛu manualaga manungku i yami lai tatahuananni Kristus ere lai i tou.

⁸ I ya'u tawe masili amungkangngu i ya'u mannamboanna mamarabungan taṛṛino apan buatte nionggolu Mawu si yami, ana waugu taṛṛino udde nionggola ipangapia si yamiu, wal᷊inewe ipandal᷊eo.

⁹ I ya'u maddiri yamiu massunna manungku i ya'u mammata'utta si yamiu ringannu manga sura'u.

¹⁰ Taumata mabbisara, “Manga suratti Paulus udde maṛṛagissa wuṛṛu maṛṛaubba, arawe amungkangngu i tou sassane udde su pattangnganni ite, naungnge masaṛṛionto'a wuṛṛu manga wisarane tawe atappasanne saran kadio'a!”

¹¹ Ṛinone taumata ereudde manutukka manungku amungkangngu i yami su pattangnganni yamiu, inolaanni yami naṛṛino ere niwoṛṛetti yami sulal᷊ummu manga suratti yami.

¹² I yami tawe lai waṛṛani manumandinga ara'e manul᷊ungngu watanganni yami massul᷊ungngu manga taumata apan uapendama watanganne matanggakka. Tumaniten woddo i mangitou! I mangitou ma'ola'a aul᷊aanne sassane wuṛṛu mannanda watanganni mangitou sassane ringannu aul᷊aanne udde.

¹³ I yami tawe aroddi. Amungkangngu i yami mamarabunga, i yami tawe lumiu passaranne. I yami uatana'a sulal᷊ummu passarannu leta'a pammanaranna apan buatte tinantunnu Ruata si yami. Wuṛṛu i yamiu nasutta sulal᷊ummu wageangngu leta'a udde.

¹⁴ Nariaddi, su tempo i yami nattembo si yamiu wuṛṛu nangapiddu Watti'u Al᷊al᷊uassa su ola'i Kristus si yamiu, i yami tawe nallinga passarannu leta'a pammanaranni yami.

¹⁵ I yami tawe naddalo watanganni yami su manaran taumata waine apan su liuddu passaranna apan buatte tinantunnu Ruata si yami. Arawe i yami sidutu sulal᷊ummu passaranna apan suete tinantunnu Ruata si yami wuṛṛu mangngantimma manungku i yamiu lembon mangngimanna si Kristus, tadea'u i yami wotongnge mappa'ola'a manara apan lembon ahewal᷊anne su wallatti yamiu.

¹⁶ Ringannu aroddi yami wotongnge lai mabbatti'u Watti'u Al᷊al᷊uassa udde su manga soa waine ringannu tawe mamarabunga manaran kami apan suete niola'a su tampa pamanarannu taumata waine.

¹⁷ Sulal᷊ummu Wuke Susi uawoṛṛetta, “Taumata apan sidutu lulluassu sambau sarannapa, ṛinone lai lumuassu apa apan buatte niola'u Mawu.”

¹⁸ Ana waugu taumata apan raddaloanna eteudde taumata apan raddaloannu Mawu, wal᷊ine taumata maddalo watanganne sassane.