1 YOHANES 5 - WUKE SUSI WATTI'U AL᷊AL᷊USASSA

Auntunganni ite su wowon runia

¹ Taumata apan mangngimanna manungku Yesus udde Ratun Punnu Sal᷊amatta apan pina'iren Duata, taumata udde ana'u Ruata. Taumata apan mandangngu sangkatou Iamangnga, marangngu lai anangnge.

² Ringannu lal᷊anne indi i ite maasingkatta manungku i ite marangngu al᷊aṛṛana'u Ruata: I ite mandangngu Ruata wuṛṛu tuttuṛṛuta manga parenta-Ne.

³ Ana waugu, mandangngu Ruata atapasanne tuttuṛṛuta manga parenta-Ne. Wuṛṛu manga parenta-Ne tawe maawakkata si ite,

⁴ ana waugu suapan al᷊aṛṛana'u Ruata wotongnge maaroappa runia apan lal᷊eo indi. Wuṛṛu i ite mandoappa runia ringanu pangangimanni ite.

⁵ Isai wotongnge maaroappa runia? Tumba'u taumata apan mangngimanna manungku Yesus udde Ana'u Ruata.

Tiala su ola'i Yesus Kristus

⁶ Ete Yesus Kristus apan nirumanta su runia ringannu ua'en Sasaṛṛani wuṛṛu ringannu ṛaṛṛam papate-Ne. I Tou nirumanta wal᷊ine tumba'u ringannu ua'e sassane, arawe ringannu ua'e wuṛṛu ṛaṛṛa. Wuṛṛu Ghaṛṛahon Duata sassane nangonggolu tialane manungku udde atonna, ana waugu Ghaṛṛaho taambe namahia.

⁷ Pia tatallu mattatialane:

⁸ Ghaṛṛahon Duata, ua'e wuṛṛu ṛaṛṛa – i mangitoun tallu udde mangngonggolu tatiala apan nasul᷊ungnga.

⁹ I ite mangngimanna su tatialan taumata, arawe tatiala wuassu Ruata mattohasanna lai. Wuṛṛu eteudde tatiala apan nionggolu Ruata su ola'u Anang-Nge.

¹⁰ Ana waugu udde, taumata apan mangngimanna su Ana'u Ruata, suete nanengkamma tatiala udde sulal᷊ummu naungnge; arawe taumata apan tawe mangngimanna Ruata, nassunnate manungku Ruata taṛṛa wahia, ana waugu i tou tawe mangngimanna apa apan iwabal᷊on Duata su ola'u Anang-Nge.

¹¹ Ete indi tatialane udde: Ruata suete nangonggolu wiakka tutune wuṛṛu mal᷊annu-l᷊annu si ite, wuṛṛu Anang-Nge uddewe punnu wiakka udde.

¹² Taumata apan uatahuanna Ana'u Ruata, uatahuanna wiakka udde; wuṛṛu taumata apan tawe uatahuanna si Tou, tawe uatahuanna wiakka udde.

Wiakka tutune wuṛṛu saran mal᷊annu-l᷊annu

¹³ I ya'u namoṛṛetu suratta indi si yamiu apan mangngimanna Ana'u Ruata, tadea'u i yamiu masingkata manungku i yamiu piate biakka tutune wuṛṛu saran mal᷊annu-l᷊annu.

¹⁴ Wuṛṛu i ite waṛṛani sumaruanna Ruata, ana waugu i ite mangngimanna manungku i Tou naddaringikka aal᷊iomanni ite, amungkangu i ite maddorongnga apa apan uatuṛṛuta su apulu-Ne.

¹⁵ Ana waugu i ite masingkata manungku i Tou maddaringikka si ite amungkangu i ite madorongnga si Tou, ne i ite masingkatta lai manungku i Tou nangonggolu apa apan radoronganni ite si Tou.

¹⁶ Amungkangu i yamiu naasilo sangkatou sansul᷊ungnga taumatan Saṛṛani ma'ola'a rosa apan tawe maaola'a taumata udde awul᷊iannu wiakka tutune wuṛṛu saran mal᷊annu-l᷊annu, ṛinone i yamiu umal᷊iomanna su Ruata; ne Ruata sarun mangonggolu wiakka udde si tou. Indi matataṛṛino si mangitou apan rosane tawe maawul᷊in wiakki mangitou udde. Arawe pia lai rosa apan maawul᷊in wiakka udde su taumata. Su olangnge udde i ya'u tawe mabbisara manungku i yamiu ṛinone umal᷊iomanna su Ruata.

¹⁷ Anambon inolaanna apan nassal᷊a uddewe rosa, arawe pia rosa apan tawe maaola'a taumata awul᷊iannu wiakka tutune wuṛṛu saran mal᷊annu-l᷊annu udde.

¹⁸ I ite masingkatta manungku anambon taumata apan suete naola'a al᷊aṛṛana'u Ruata, tawe sidutu ma'ola'a rosa, ana waugu Ana'u Ruata uasirugngnga si tou, wuṛṛu i Lal᷊eo tawe mapa'ola'a apa-apa si tou.

¹⁹ I ite masingkatta manungku i ite pussa'an Duata, salaiwe ahewallu runia indi su al᷊ungngu taṛṛinon Al᷊al᷊eo.

²⁰ I ite masingkatta manungku Ana'u Ruata suete nirumanta wuṛṛu suete nangonggolu pasasunna si ite, tadea'u i ite maaillal᷊a Ruata apan naṛṛino. I ite mabbiakka uaaukka ringannu Ruata apan naṛṛino wuṛṛu mabbiakka uaaukka ringannu Anang-Nge Yesus Kristus. Ete indi Ruata apan naṛṛino, wuṛṛu ete indi wiakka tutune wuṛṛu saran mal᷊annu-l᷊annu.

²¹ Manga al᷊aṛṛana'u, paaraua'e watanganni yamiu wuassu al᷊awo'u paal᷊uanna!