1 YOHANES 4 - WUKE SUSI WATTI'U AL᷊AL᷊USASSA

Ghaṛṛaho ṛinone wuṛṛu ghaṛṛaho mangngal᷊iwu

¹ Manga tuṛṛangnga apan arangnguanna! Arie pangimanna anambon taumata apan mangnga'u Ghaṛṛahon Duata, arawe annama'a asuene i mangitou tanne ghaṛṛaho mangitou udde niarantanne wuassu Ruata ara'e tawe. Ana waugu manambonabi awusu apan u'amatta su al᷊awo'u tampa.

² Ereindi olangnge tadea'u i yamiu maasingkata apa udde Ghaṛṛahon Duata ara'e tawe: Taumata apan mangnga'u Yesus Kristus nirumanta su runia naola'a taumata, taumata udde pia Ghaṛṛaho apan darantane wuassu Ruata.

³ Arawe taumata apan tawe manga'u olangnge indi su ola'u Mawu Yesus, tawe uatahuanna Ghaṛṛahon Duata. Taumata udde pia ghaṛṛaho wuassu Seetti Kristus. Tuṛṛanga suete naaringikka manungku Ghaṛṛaho udde sarun rumanta, wuṛṛu orassa indi i tou uddete sulal᷊ummu runia indi.

⁴ Arawe Al᷊aṛṛana'u, i yamiu pussa'a Ruata. I yamiu suete napaaema'u manga nabi awusu, ana waugu Ghaṛṛaho apan tatahuananni yamiu lembon mataṛṛino wuassu ghaṛṛaho apan su taumata tatahuanannu runia indi.

⁵ Manga nabi awusu udde mabbisara su ola'u runia, wuṛṛu runia maddaringika wisaran mangitou, ana waugu i mangitou pussa'an dunia.

⁶ Arawe ete i ite indi al᷊aṛṛana'u Ruata; wuṛṛu taumata apan maaillal᷊a Ruata, madaringikka wisaran kite. Taumata wal᷊ine pussa'an Duata maddiri maddaringikka wisaran kite. Aroddiwe olangnge i ite maasingkattu paṛṛalanne Ghaṛṛaho apan mangngonggolu al᷊aṛṛa'a apan atonna, wuṛṛu ghaṛṛaho apan mangngal᷊iwu.

Ruata udde maakkanna

⁷ Manga tuṛṛangnga apan arangnguanna! Wette i ite maa'akkana sangkatou ringannu sangkatou, ana waugu aakkana darantane wuassu Ruata. Taumata apan u'akkana, eteudde ana'u Ruata wuṛṛu i tou maaillal᷊a Ruata.

⁸ Taumata apan tawe umakkana, tawe maailal᷊a Ruata; ana waugu Ruata udde maakkana.

⁹ Ruata napaal᷊iatta'a manungku i Tou u'akkanni ite ringannu nandolokku Anang-Nge tinggasa sulal᷊ummu runia tadea'u i ite maasomba wiakka wuassu Anang-Nge udde.

¹⁰ Ete indi aakkanna: Wal᷊ine i ite apan suete niumakkannu Ruata, arawe Ruata apan niumakkanni ite wuṛṛu nandolokku Anang-Nge tadea'u wuassi Tou i ite maasomba aampungu rosan kite.

¹¹ Manga tuṛṛangnga apan arangnguanna, amungkangu Ruata aroddi arangngune si ite, i ite lai ṛinone marangngu su sansul᷊unga taumata.

¹² Tawe saran sangkatou apan suete naasilo Ruata, arawe amungkangngu i ite uararangngu, Ruata uaaukka ringanni ite wuṛṛu darangngu-Ne masuungnga sulal᷊ummu watanganni ite.

¹³ Ana waugu Ruata suete nangonggolu Ghaṛṛaho-Ne si ite, ne i ite masingkatte manungku i ite suete nabbiakka uaaukka ringannu Ruata, wuṛṛu Ruata mabbiakka uaaukka ringanni ite.

¹⁴ I yami sassane suete naasilo Ana'u Ruata, wuṛṛu i yami namasingkata manungku i Tou nirolokku Iamangnga maola'a Ratun Punnu Sal᷊amattu runia indi.

¹⁵ Isa-sai apan mangnga'u manungku Yesus udde Ana'u Ruata, Ruata mabbiakka uaaukka ringannu taumata udde, wuṛṛu taumata udde lai mabbiakka uaaukka ringannu Ruata.

¹⁶ I ite sassane masingkata wuṛṛu mangngimanna darangngun Duata si ite. Ruata udde marangngu. Taumata apan wiakke paparentannu darangngu, taumata udde uaaukka ringannu Ruata, wuṛṛu Ruata uaaukka ringanni tou.

¹⁷ Darangngu niola'a nasuungnga sulal᷊ummu watanganni ite, tadea'u i ite pia awawaṛṛani su Allo Pamamarikisanna. I ite sarun pia awawaṛṛani, ana waugu wiakki ite sulal᷊ummu runia indi ere lai wiakki Kristus.

¹⁸ Taumata apan uapendama darangngun Ruata, tawe apendama matta'uta; ana waugu darangngu apan nasuungnga mapaawul᷊in atata'uta. Nariaddi natualage manungku taumata apan taambe naapendama darangngun Duata ringannu nasuungnga amungkangu taumata udde matta'utta sumaruanna Allo Pamamarikisanna.

¹⁹ I ite mandangngu, ana waugu Ruata doronete nandangngu si ite.

²⁰ Amungkangu pia sangkatou mabbisara, “I ya'u marangngu Ruata,” arawe i tou tawe mandangngu tuṛṛangnge, taumata udde taṛṛa wahia. Ana waugu taumata apan tawe mandangngu tuṛṛange apan aasiloanne, tawe mariaddi wotongnge mandangngu Ruata apan tawe asiloanne.

²¹ Ana waugu udde, ete indi parenta apan nionggoli Kristus si ite: Isai apan mandangngu Ruata, ṛinone lai mandangngu tuṛṛangnge.