1 YOHANES 3 - WUKE SUSI WATTI'U AL᷊AL᷊USASSA

Manga al᷊aṛṛana'u Ruata

¹ Pa'ellege, Ruata aroddi arangngune si ite, na'oman sara i ite nia'u al᷊aṛṛanang-Nge. Wuṛṛu atonna ete i ite udde al᷊aṛṛana'u Ruata. Ana waugu udde runia apan lal᷊eo indi tawe maaillal᷊a si ite, ana waugu runia tawe maaillal᷊a Ruata.

² Manga tuṛṛangnga apan arangnguanna! Ete i ite orassa indi al᷊aṛṛana'u Ruata, arawe ola'i ite su tempo addantane taambe natualaga. Arawe i ite masingkata manungku amungkangu Kristus rumanta, i ite sarun maola'a ere i Tou, ana waugu i ite sarun maasilo si Tou sulal᷊ummu olang-Nge apan nasuungnga.

³ Anambon taumata apan pia antimma indi su saruanni Kristus, mandiagga ririne tadea'u atonna-tonna susi, waresi wuassu rosa ere lai Kristus udde lai susi.

⁴ Taumata apan ma'ola'a rosa, nilumawangnga titan Duata; ana waugu rosa uddewe lal᷊awangnga su titan Duata.

⁵ I yamiu masingkatta manungku Kristus nirumanta ana waugu mamappasa manga rosan taumata, wuṛṛu paddarosa tawe sulal᷊ummu watangan-Ne.

⁶ Anambon taumata apan mabbiakka uaaukka ringanni Kristus, tawe sidutu ma'ola'a rosa. Taumata apan sidutu ma'ola'a rosa, saran paassa tawe maasilo si Kristus ara'e maaillal᷊a si Tou.

⁷ Manga al᷊aṛṛana'u, arie mamalan taumata mamono'a si yamiu. Taumata apan tuttuṛṛutta apulun Duata, uddewe ana'u Ruata ere lai Kristus Ana'u Ruata.

⁸ Arawe taumata apan matatana'a ma'ola'a rosa, ete i tou uddewe ana'u Setanna, ana waugu Setanna marosa ro'en al᷊amonane. Ana waugu udde Ana'u Ruata nirumanta, eteudde makkimunsa'a manaran Setanna.

⁹ Taumata apan naola'e Ana'u Ruata, tawe sidutu ma'ola'a rosa, ana waugu pallal᷊agun Duata sassane tatahuananni tou. Wuṛṛu ana waugu Ruata udde Iamangnge, ne i tou tawe siddutu ma'ola'a rosa.

¹⁰ Ete indi papaṛṛalane wuassu alaṛṛana'u Ruata wuṛṛu al᷊aṛṛana'u Setanna: suapan taumata apan tawe tumuṛṛutta apulun Duata, ara'e tawe mandangngu tuṛṛange, i tou wal᷊ine ana'u Ruata.

Paa'akkana sangkatou ringannu sangkatou

¹¹ Ro'en paarorone suete niapaasingkata watti'a indi si yamiu: I ite ṛinone umakanna sangkatou ringannu waine.

¹² Ariewe i ite ere Kain, apan naola'a ana'u Setanna wuṛṛu namate tuṛṛangnge sassane. Anio Kain namate tuṛṛangnge? Ana waugu manga inolaanna apan niolange udde nassal᷊a, arawe inolaannu tuṛṛange udde naṛṛino.

¹³ Ana waugu udde, manga tuṛṛangku, arie tumiangnga amungkangu manga taumata su runia indi maddantini yamiu.

¹⁴ I ite masingkata manungku i ite nal᷊iute wuassu papate, wuṛṛu nabbiakke apia. I ite masingkatu udde, ana waugu i ite u'akkannu sansul᷊ungngu taumata. Taumata apan tawe umakkana, atappasanne ta'e tataṛṛinoannu papate.

¹⁵ Taumata apan maddantinnu tuṛṛangnge, eteudde taṛṛa pate, wuṛṛu yamiu masingkata manungku sangkatou taṛṛa pate tawe maatahuanna wiakka tutune wuṛṛu saran mal᷊annu-l᷊annu.

¹⁶ Ringannu lal᷊anne indi i ite maasingkata ereapa mandangngu sansul᷊ungnga taumata: Kristus suete nanantillu wiakke hunang kite. Ana waugu udde, i ite lai ṛinone manantillu wiakki ite hunan manga tuṛṛangngi ite!

¹⁷ Amungkangu sangkatou apan wiakke natimu naasilo tuṛṛange wiakke tawe natimu, arawe maddiri mantul᷊ungngu tuṛṛangnge udde, ereapa taumata udde wotongnge mabbisara manungku i tou mandangngu Ruata?

¹⁸ Al᷊aṛṛana'u! Arie i ite umakkana tumba'u su moṛṛonga ara'e tumba'u ringannu wisara. Ṛinone i ite umakkana ringannu aakkana apan tutune, apan niapaal᷊iatta'a ringannu inolaanni ite.

Awawaṛṛani su saruannu Ruata

¹⁹ Aroddiwe olangnge i ite maasingkatta manungku i ite nareengnga al᷊aṛṛana'u Ruata apan atonna, wuṛṛu naungngi ite wotongnge matammuda su saruannu Ruata.

²⁰ I ite masingkata, manungku amungkangu i ite iapaasal᷊an naungngi ite, asingkatu Ruata maggewal᷊anne wuassu asingkattu naungngi ite, wuṛṛu i Tou masingkatu sarangkanambone.

²¹ Nariaddi, manga tuṛṛangku apan arangnguanna, amungkangu naungngi ite tawe mapaasal᷊an kite, i ite wotongnge sumaruanna Ruata ringannu awawaṛṛani.

²² Wuṛṛu apa apan radoronganni ite wuassi Tou, i ite sarun maasomba, ana waugu i ite tuttuṛṛuta manga parenta-Ne wuṛṛu ma'ola'a apa apan maal᷊uassa naung-Nge.

²³ Parenta-Ne si ite eteudde: I ite ṛinone mangngimanna Anang-Nge, eteudde Yesus Kristus, wuṛṛu i ite ṛinone uararangngu, ere suete niparentan Kristus si ite.

²⁴ Anambon taumata apan tuttuṛṛutta manga parentan Duata, mabbiakka uaaukka ringannu Ruata, wuṛṛu Ruata uaaukka ringanni mangitou. Wuṛṛu i ite masingkata manungku Ruata mabbiakka uaaukka ringanni ite, ana waugu i Tou suete nangonggolu Ghaṛṛaho-Ne si ite.