1 YOHANES 2 - WUKE SUSI WATTI'U AL᷊AL᷊USASSA

Kristus mattatul᷊ungngi ite

¹ Al᷊aṛṛana'u! I ya'u namoṛṛetu indi si yamiu tadea'u yamiu tawe ma'ola'a rosa. Arawe amungkangu piaddu lai ma'ola'a rosa, ne i ite pia sangkatou sumasimbbake, eteudde Yesus Kristus apan matul᷊ida udde; i Tou sarun sumal᷊anden kite su saruannu Iamangnga.

² Ringannu pamamanaran Yesus Kristus uddewe manga rosan kite niampunganna. Wuṛṛu wal᷊ine tumba'u manga rosan kite sassane, ewe'e rosan anambon taumata lai.

³ Amungkangu i ite matuṛṛutta su manga parentan Duata, udde tatialane manungku i ite maaillal᷊a Ruata.

⁴ Taumata apan mabbisara, “I ya'u maaillal᷊a Ruata,” arawe maddiri tumuṛṛutta manga parenta-Ne, taumata udde taṛṛa wahia, wuṛṛu Ruata tawe sulal᷊ummu naungnge.

⁵ Arawe taumata apan matuṛṛutta wisaran Duata, taumata udde marangngu Ruata ringannu nasuungnga. Udde tatialane manungku i ite mabbiakka uaaukka ringannu Ruata.

⁶ Isai-sai nabbisara manungku i tou mabbiakka uaaukka ringannu Ruata, i tou ṛinone mabbiakka manantuṛṛutta lempangi Kristus.

Parenta apan wakku

⁷ Manga tuṛṛangnga apan arangnguanna! Apa niwoṛṛe'u indi wal᷊inewe sambau parenta apan wakku. Indi parenta tabbe apan suete niapaasingkata si yamiu ro'en i yamiu nanattakka mangngimanna si Kristus; eteudde watti'a wuassu Ruata apan suete niaringiṛṛani yamiu ro'en i yamiu taambe nangimanna.

⁸ Salaiwe aroddi, parenta apan ta'u niwoṛṛeta indi wakku lai; ana waugu atatul᷊ide wotongnge aellehanna su wadangi Kristus wuṛṛu lai su wadangi yamiu. Ana waugu araranduma mabbul᷊ite wuṛṛu asasemakka apan atonna mannatake lullansiangnga.

⁹ Taumata apan nabbisara manungku i tou sulal᷊ummu asasemakka arawe taumata udde ta'e maddantinu tuṛṛange, taumata udde ta'e su ararandumma sara orassa indi.

¹⁰ Taumata apan marangngu tuṛṛangnge, mabbiakka sulal᷊ummu asasemakka na'oman sara wuassi tou tawe sarun mapaema'u taumata waine sulal᷊ummu rosa.

¹¹ Arawe taumata apan maddantinnu tuṛṛangnge, udde sulal᷊ummu araranduma. I tou u'amatta sulal᷊ummu araranduma, wuṛṛu wagga watukuapa amatanne, ana waugu araranduma udde naawuta si tou.

¹² I ya'u namoṛṛetu suratta indi si yamiu, Al᷊aṛṛana'u, ana waugu rosanu suete niampunganna ana waugu Kristus.

¹³ I ya'u namoṛṛetu suratta indi si yamiu, manga iamangnga, ana waugu i yamiu maaillal᷊a si Tou apan uddete ro'en al᷊amonane. I ya'u namoṛṛetu suratta indi si yamiu, manga umbasanna maṛṛuala, ana waugu i yamiu suete nangema'i Al᷊al᷊eo.

¹⁴ I ya'u namoṛṛetu suratta indi si yamiu manga dario'a, ana waugu i yamiu maaillal᷊a Ruata Iamangnga. I ya'u namoṛṛettu suratta indi si yamiu, manga iamangnga, ana waugu i yamiu maaillal᷊a Ṛengetanna apan uddete ro'en al᷊amonane. I ya'u namoṛṛettu suratta indi si yamiu manga umbasanna maṛṛuala, ana waugu i yamiu matohassa. Wisaran Duata uatana'a sulal᷊ummu naungngu, wuṛṛu i yamiu suete nangema'i Al᷊al᷊eo.

¹⁵ Ariete mandangngu runia indi, ara'e al᷊awo'u sarannapa apan sulal᷊ummu runia indi. Amungkangngu i yamiu mandangngu runia, i yamiu tawe mandangngu Iamangnga.

¹⁶ Al᷊awo'u saranapa sulal᷊ummu runia indi – apan ipaapulun pallal᷊agun taumata marosa, apan a'ellehanna see iannemma wuṛṛu ipamarabunga – sarangkanambone udde manga inolaanna apan tawe wuassu Ruata, ewe'e wuassu runia.

¹⁷ Runia wuṛṛu al᷊awo'u sarannapa sulal᷊umme apan ipaapulun taumata, tantal᷊anna mabbul᷊i. Arawe taumata apan tuttuṛṛutta apulun Duata, sidutu mabbiakka saran mal᷊annu-l᷊annu.

Seetti Kristus

¹⁸ Al᷊aṛṛana'u panginsueannu tempo maranite! Suete niapaasingkata si yamiu paarorone, manungku Seetti Kristus sarun rumanta; wuṛṛu orassa indi nirumantate anambon taumata apan masseetti Kristus. Udde tatialane manungku panginsueannu runia maranite.

¹⁹ Manga seetti Kristus eteudde manga taumata apan suete nanantangi ite, ana waugu i mangitou su ṛinone wal᷊ine taumata su sambau ringanni ite. Amungkangu i mangitou taumata su sambau ringanni ite, i mangitou mangke uaammulla ringanni ite. Arawe i mangitou nanantangi ite, tadea'u matualage manungku tawe saran sangkatou wuassi mangitou apan atonna-tonna nasutta su reenganni ite.

²⁰ Arawe i yamiu suete nanengkamma Ghaṛṛahon Duata apan niwobboki Yesus Kristus wuṛṛu ana waugu udde i yamiu sarangkanambone maaillal᷊a al᷊aṛṛa'a apan naṛṛino udde.

²¹ Nariaddi ya'u namoṛṛetu suratta indi si yamiu wal᷊inewe ana waugu i yamiu waggan al᷊aṛṛa'a apan naṛṛino, arawe ana waugu i yamiu naaillal᷊ate wuṛṛu i yamiu lai masingkate manungku tawe awusune sulal᷊ummu al᷊aṛṛa'a apan naṛṛino udde.

²² Isai nangawusu eteudde taumata apan nabbisara manungku Mawu Yesus wal᷊inewe Ratun Punnu Sal᷊amatta apan pina'iren Duata. Taumata udde Seetti Kristus; i tou tawe manga'u Iamangnga ara'e Ana'a.

²³ Taumata apan tawe manga'u Ana'a, atappasanne tawe manengkamma Iamangnga lai. Wuṛṛu taumata apan mangnga'u Ana'a, atappasanne mannengkama lai Iamangnga.

²⁴ Ana waugu udde, watti'a apan suete niaringiṛṛani yamiu ro'en panattaṛṛanne i yamiu mangngimanna, ṛinone rariagganni yamiu mapia-pia sulal᷊ummu naungnga. Amungkangu watti'a udde, tatutuṛṛanni yamiu mapia-pia, i yamiu sarun mabbiakka sidutu uaaukka ringannu Ana'a wuṛṛu Iamangnga.

²⁵ Wuṛṛu ete indi apan pina'iren Kristus sassane si ite: wiakka tutune wuṛṛu saran mal᷊annu-l᷊annu.

²⁶ I ya'u namoṛṛetu suratta indi si yamiu su ola'u manga taumata apan tantal᷊anna mangngawusu si yamiu.

²⁷ Arawe su ola'i yamiu sassane, Kristus suete namobboku Ghaṛṛaho-Ne si yamiu. Wuṛṛu sulal᷊ummu Ghaṛṛaho-Ne ta'e ringanni yamiu, arie pia taumata waine mangaṛṛa'a si yamiu. Ana waugu Ghaṛṛaho-Ne mangngaṛṛa'a si yamiu su ola'u al᷊awo'a; wuṛṛu apa apan ia'aṛṛa-Nge udde atonna, wal᷊ine wahia. Ana waugu udde, ṛinone i yamiu tumuṛṛutta apa apan niaṛṛa'u Ghaṛṛaho udde, wuṛṛu ṛinone i yamiu sidutu mabbiakka uaaukka ringanni Kristus.

²⁸ Nariaddi, al᷊aṛṛana'u, paasidutute mabbiakka uaaukka ringanni Kristus, tadea'u su tempo i Tou rumanta apia, i ite sumaruanna si Tou ringannu napenen kawawaṛṛani, wuṛṛu tawe ma'imbuni ana waugu massili.

²⁹ I yamiu masingkatte manungku Kristus mabbiakka tuttuṛṛuta apulun Duata. Ana waugu udde i yamiu ṛinone masingkatta lai manungku suapan taumata apan mabbiakka tuttuṛṛuta apulun Ruata eteudde lai ana'u Ruata.