1 TIMOTIUS 6 - WUKE SUSI WATTI'U AL᷊AL᷊USASSA

¹ Manga taumatan Saṛṛani apan naola'a allangnga, ṛinone massunna manungku mawu mangitou ṛinone addatanna, tadea'u taumata tawe wotongnge mandal᷊eo arannu Ruata ara'e al᷊aṛṛa'i ite.

² Manga allangnga apan mawune taumatan Saṛṛani, tawe wotongnge mangngaddio'a mawune ana waugu i mangitou labbisa taumatan Saṛṛani. Ewe'e ṛinone i mangitou mangimbe mawu mangitou udde ringannu lembon apiane lai, ana waugu mawu apan a'imbeanna ringannu mapia, eteudde sambau taumata mangngimanna apan arangnguanna. Sarangkanambone indi ṛinone iaṛṛa'a wuṛṛu itantironu.

Al᷊aṛṛa'a apan tawe su ṛinone wuṛṛu paa'ala tutune

³ Isai-sai apan mangngaṛṛa'u al᷊aṛṛa'a uapapaṛṛalan al᷊aṛṛa'a apan naṛṛino wuassu Mawun kite Yesus Kristus, wuṛṛu ringannu al᷊aṛṛa'u agaman kite,

⁴ ete i tou taumata mawunga wuṛṛu waggan apa-apa! Radange eteudde apulune uasasimbaka wuṛṛu uatatiakka su ola'u manga wisara na'oman sara sumappute naungnga lal᷊eo, patatal᷊ei, al᷊uandaga, wuṛṛu pasasunna apan lal᷊eo,

⁵ wuṛṛu pasase'etta apan tawe masue. Lal᷊annu ṛingiddu manga taumata udde nial᷊iwunete wuṛṛu nassal᷊ate. I mangitou massunna manungku wotongnge maala wuassu agama.

⁶ Atonna agama mangngonggolu auntunganna apan wahewalla, amungkangu taumata mal᷊uassa ringannu sarannapa apan tatahuananne.

⁷ Ana waugu tawe saran sambau apan niapiddi ite sulal᷊ummu runia indi, wuṛṛu tawe saran sambau sarannapa apan iapiddi ite watukku liudde!

⁸ Nariaddi amungkangu pia anna wuṛṛu laubba, udde wotongngete.

⁹ Arawe taumata apan maapulu maola'a ala, inawono'anna wuṛṛu niasamettu al᷊awo'u aapulu apan woddo wuṛṛu mandal᷊eo. Manga aapulu udde ma'ola'a taumata maṛṛimunsa'a wuṛṛu masilaka.

¹⁰ Ana waugu wuassu aapulun doitta, lumappute al᷊awo'u al᷊al᷊eo. Pia sambageanganna taumata apan maddea'a roitta na'oman sara tate tumuṛṛutta lai al᷊aṛṛa'u Saṛṛani, ana see i mangitou niaṛṛiaannu manambo asasusa naṛṛimunsa'a naungngi mangitou.

Manga tatantiro si'o sassane

¹¹ Arawe ete i'o taumata tatahuanannu Ruata, nariaddi i'o ṛinone mangindaun sarangkanambone udde. Padea'a maola'a taumata mapia su aellegu Ruata, apan mattaṛṛamawu Ruata, mangngimanna si Kristus, mandangngu sansul᷊unge, masabare sulal᷊ummu asasusa, wuṛṛu masaṛṛionto'a.

¹² Pabbiakke atonna-tonna maola'a sangkatou taumatan Saṛṛani tadea'u i'o wotongnge maapal᷊aṛṛo aonggolu wiakka tutune wuṛṛu mal᷊annu-l᷊annu. Ana waugu eteudde Ruata namaggo si'o su tempo i'o nanga'u su saruannu awadaalla manungku i'o mangngimanna si Kristus.

¹³ Wuṛṛu orassa indi su saruannu Ruata apan nangonggolu niawa su al᷊awo'u sarannapa, wuṛṛu su saruanni Kristus Yesus apan nangonggolu tatiala atonna si Pontius Pilatus, i ya'u madorongnga indi wuassi'o:

¹⁴ Paatuṛṛute anambon parenta udde ringannu naungnga waresi wuṛṛu tawe urangnge ma'oman sara Mawun kite Yesus Kristus rumanta apia.

¹⁵ Daranta-Ne sarun itantunnu Ruata sassane su tempone apan naṛṛino. Tumba'u i Tou sassane uatahuanna; i Tou mawantuga, Ratu wuassu al᷊awo'u ratu, wuṛṛu Mawu wuassu al᷊awo'u mawu.

¹⁶ Ete i Tou apan tawe aṛṛinoannu papate; i Tou mabbiakka sulal᷊ummu asasemakka apan tawe wotongnge aundanianni sai-sai. Tawe saran sangkatou taumata apan suete naasilo, ara'e wotongnge ma'ellega si Tou. Ete si Tou addata wuṛṛu taṛṛino ma'oman sara mal᷊annu-l᷊annu! Amin.

¹⁷ Su manga taumata ala su runia indi, ṛinone i'o maddorongnga tadea'u i mangitou arie mamunga wuṛṛu arie mangantimma manga sarannapa apan tawe tantune – ereudde paa'ala. I mangitou ṛinone pia antimma su Ruata apan mangonggolu al᷊awo'a si ite ringannu manambo tadea'u i ite wotongnge maatemma paa'ala udde.

¹⁸ Paddorongke si mangitou mapaal᷊iatta'u apapia, ringannu ma'ola'a al᷊awo'u inolaanna apan mapia, masaṛṛionto'a, wuṛṛu laghune mapia.

¹⁹ Ringannu aroddi i mangitou mangngammulu paa'ala apan maola'a sambau roitta uaraddo apan mapia su tempo addantane. Wuṛṛu ringannu udde i mangitou sarun maasomba wiakka ma'oman sara mal᷊annu-l᷊annu, eteudde wiakka apan tutune.

²⁰ Apa apan suete tinantilla si yamiu, paariagai udde mapia-pia, Timotius! Paarau manga hatto apan tawe gunane wuṛṛu patatatiakka su ola'u inolaanna apan mangngal᷊iwu isassago “Asingkata”.

²¹ Ana waugu pia manga taumata apan mabbisara manungku i mangitou pia asingkata udde, na'oman sara massal᷊ate amatta wuassu manga al᷊aṛṛa'u Saṛṛani apan pinangimananni mangitou paarorone. Antimanna Ruata mangal᷊amatta manga tuṛṛangnga. Tabea wuassi yami, Paulus