1 TIMOTIUS 5 - WUKE SUSI WATTI'U AL᷊AL᷊USASSA

Pamamanara su saruannu manga taumata apan pangangimanna sambau

¹ Arie i'o tumaniten maṛṛagissa mamul᷊o taumata mattimmaranna wuassi'o arawe ahei i tou maddaringikka wisaranu, olaawe i tou ere iamangngu. Aroddi lai manga taumata umbasanna, maṛṛuala, olaawe ere tuṛṛangu,

² wuṛṛu manga wawine timmade ere inangngu. Wuṛṛu manga maṛṛuala ṛinone olaannu ere sangkatou tuari, ringannu pallal᷊agu apan waresi.

³ Addate manga wawine wal᷊u apan atonna-tonna mabbiakka sassane.

⁴ Arawe amungkangu sangkatou wawine wal᷊u pia al᷊aṛṛana'a ara'e manga pulunna, ete i mangitou udde apan paarorone onggol᷊annu tatantiro manungku i mangitou ṛinone ma'ellega lal᷊ummu wal᷊en mangitou, wuṛṛu mabbal᷊issa apapian timmade wuṛṛu iupungngi mangitou. Ana waugu pallal᷊agu udde maal᷊uassa naungngu Ruata.

⁵ Wawine wal᷊u apan atonna-tonna sassane, wuṛṛu tawe isai-sai apan wotongnge mammadul᷊i si tou, tumba'u uaantimma Ruata. Allo ṛabbi i tou sidutu u'al᷊iomanna su Ruata maddorongnga tul᷊ungan-Ne.

⁶ Arawe wawine wal᷊u apan maapulu mabbiakka mal᷊uassa, i tou natete salaiwe i tou ta'e wiakka.

⁷ Wal᷊oa'e manga tatantiro indi si mangitou, tadea'u i mangitou mabbiakka tawe sal᷊ane.

⁸ Arawe amungkangu pia taumata apan tawe mamaddul᷊i manga tuṛṛange, nangillembo ete lal᷊oṛṛon bal᷊ene sassane, taumata udde nassinaaddu pangangimanne; i tou maddal᷊eoanne wuassu taumata apan tawe mangngimanna.

⁹ Tumba'u wawine wal᷊u apan naatuṛṛuta atoranna indi wotongnge iwoṛṛeta sulal᷊ummu arannu manga wawine wal᷊u; apan uukke tawe maurangnga wuassu annumu pul᷊o su tonnane, dorone tumba'u paassa naawingnga,

¹⁰ tinumelennga ere sangkatou wawine apan ma'ola'a apapia, ereindi: i tou suete namadul᷊i manga al᷊aṛṛanangnge ringannu mapia, naungnge mal᷊uassa mangimbe raho matana'a su wal᷊ene, mangimbe manga taumata mangngimanna, massumbala manga taumata susa, wuṛṛu mammanara atonna-tonna al᷊awo'u manara apan mapia.

¹¹ Arie pabboṛṛeta'a su wuke udde manga wawine wal᷊u apan ta'e dario'a. Ana waugu amungkangu apendammu apulu naungngi mangitou matohassa apia, i mangitou maapulu maawingnga apia, wuṛṛu manantangken Kristus.

¹² Ne i mangitou nassal᷊a ana waugu tawe tinumuṛṛuta paaire apan nionggolla si tou.

¹³ See lai i mangitou mangke manggolo'a allo uawal᷊el᷊enganna sussutta su wal᷊en taumata. Wuṛṛu aral᷊eoanne lai eteudde i mangitou mandal᷊eo arannu taumata waine wuṛṛu sussutta su hatton taumata waine see uahahatton manga inolaanna apan tawe ṛinone ipagahatto.

¹⁴ Ana waugu udde i ya'u maapulu tadea'u manga wawine wal᷊u ta'e dario'a maawingnga apia, maasomba ana'a wuṛṛu mammadul᷊i lal᷊oṛṛon bal᷊e, tadea'u manga seetti ite tawe maasomba tempone mandal᷊eo aranni ite.

¹⁵ Ana waugu pia manga wawine wal᷊u apan nial᷊iwunete tinumantalongnga ghaṛṛaho lal᷊eo.

¹⁶ Arawe amungkangu sangkatou wawinen Saṛṛani pia sangkatou lal᷊oṛṛon bal᷊ene inawal᷊uanna, i tou ṛinone massumbala manga wawine wal᷊u udde; arie pabbala'a jamaatta mappadul᷊i si mangitou. Ringannu aroddi jamaatta wotongnge massumbala manga wawine wal᷊u apan atonna-tonna tawe tuṛṛange.

¹⁷ Piaṛṛa'u jamaatta apan ma'ola'a manarane ringannu mapia, ṛinone onggol᷊annu aaddata paarua anambone, nangillembo wuassi mangitou apan maṛṛimadda mannase wuṛṛu mangaṛṛa'a.

¹⁸ Ana waugu sulal᷊ummu Wuke Susi uawoṛṛetta, “Sapi apan tantal᷊anna maṛṛinda gandumma mapatal᷊ei watun gandumma wuassu raene, arie pa'iitta moṛṛonge,” wuṛṛu lai “Taumata apan mammanara ṛinone manengkamma lal᷊antake.”

¹⁹ Arie manengkamma aansilla su saruannu sangkatou piaṛṛa'u jamaatta, tabane'e tohasannu ruan katou sakassi ara'e nallebe wua isudde.

²⁰ Taumata apan ma'ola'a rosa, ṛinone tagguanna su saruannu anambon jamaatta, tadea'u ingana'a waine lai matta'utta.

²¹ Su saruannu Ruata, Kristus Yesus wuṛṛu manga mala'ekatta apan napile, i ya'u sumal᷊ande tadea'u i'o tumuṛṛutta manga tatantiro indi ringannu tawe massunna lal᷊eo su saruanni sai-sai ringannu tawe masasamba'a.

²² Arie tumaniten mal᷊ihakka mangal᷊amatta sangkatou itenega maola'a mangangimbe su Mawu. Amungkangu taumata waine marosa, arie lai al᷊iuannu rosa udde. Paariagai ririnu tadea'u sidutu waresi.

²³ Arie lai tumba'u ma'inumma ua'e; pa'inumma lai anggore addio'a ipallal᷊ima tinainu mammanara, ana waugu i'o masokka rumadda'a.

²⁴ Rosan sambageanganna taumata, ro'en taambe niparikisanna, niasiloante ringannu masemakka. Arawe rosan taumata waine wakkute asingkatanna sal᷊immurine.

²⁵ Aroddi lai manga inolaanna mapia lapiddu asiloanna. Wuṛṛu apan masahadda asiloanna, tawe sidutu mangke uawuni.