1 TIMOTIUS 4 - WUKE SUSI WATTI'U AL᷊AL᷊USASSA

Manga huru awusu

¹ Ghaṛṛahon Duata ringannu masemakka nabbisara manungku su tempo apan sarun rumanta, sangkawageanganna taumata sarun massinaaddi Kristus. I mangitou sarun tumuṛṛutta manga ghaṛṛaho apan mangngal᷊iwu wuṛṛu tumantalonga manga al᷊aṛṛa'u ghaṛṛaho lal᷊eo,

² apan niapaasingkatu taumata lilangkamal᷊e'a wuṛṛu taṛṛa wahia. Lal᷊ummu naungngu manga taumata udde marandumpe.

³ I mangitou mangngaṛṛa'a taumata ana see tawe maawingnga wuṛṛu tawe umanna anna ipappalli. Sumbal᷊i anna udde niola'u Ruata iapaanna ringannu aadiangkamanna si Tou wuassu taumata apan suete nangimanna si Kristus wuṛṛu naailal᷊ate al᷊aṛṛa'a apan atonna wuassu Ruata.

⁴ Al᷊awo'u sarannapa apan niola'u Ruata udde mapia, wuṛṛu tawe saran sambau lai apan sarun ipappalli amungkangu suete nisengkamma ringannu aadiangkamanna su Ruata.

⁵ Ana waugu al᷊amatta wuassu Ruata wuṛṛu aal᷊iomanna maaola'a anna udde tawe palline.

Mangangimbe si Kristus Yesus apan mammanara ringannu mapia

⁶ Amungkangu i'o mangaṛṛa'u sarangkanambone udde su manga tuṛṛanga su pangangimanna sambau, i'o sarun maola'a mamamanaran Kristus Yesus apan mammanara ringannu mapia. Wuṛṛu i'o sidutu mappadul᷊i niawanu ringannu wisaran Duata apan pangngimananni ite, wuṛṛu ringannu manga al᷊aṛṛa'a apan atonna apan suete nipangimanannu al᷊annunete indi.

⁷ Paaraua'a manga watti'a wawahia apan tawe gunane. Ṛinone wadangngu inaramma su pabbiaṛṛanna mattaṛṛamawu.

⁸ Mannarammu wadangnga tumba'u addio'a hunane, arawe mannarammu pangangimanna mahuna su al᷊awo'u inolaanna, ana waugu pia paaire su ipabbiakka tempo indi wuṛṛu tempo addantane.

⁹ Olangnge udde atonna wuṛṛu ṛinone sengkamanna wuṛṛu pangimananna ringannu ahewallu naungnga.

¹⁰ Ana waugu udde i ite mammanara maṛṛimadda, ana waugu i ite pia antimma atonna su Ruata apan wiakka; eteudde Punnu Sal᷊amattu anambon taumata, nangillembo taumata apan mangngimanna.

¹¹ Tantiroa'e sarangkanambone udde wuṛṛu dol᷊oṛṛa'e manga taumata tumuṛṛutta.

¹² Arie mamalan sangkatou taumata ma'ellega si'o addio'a ana waugu i'o ta'e umbasanna. Arawe ṛinone i'o maola'a tul᷊adda su manga taumata apan mangngimanna hattonu wuṛṛu pallal᷊agunu, su ola'u darangngunu su sansul᷊ungu wuṛṛu mangngimanna Mawu Yesus Kristus, ringannu naungnga apan waresi.

¹³ Tantal᷊anna udde, ma'oman sara i ya'u rumanta, i'o ṛinone paaṛṛimadda mabbasan Wuke Susi su saruannu manga taumata, wuṛṛu mannasa si mangitou wuṛṛu mangngaṛṛa'a si mangitou.

¹⁴ Arie i'o maabul᷊i mappaattu apande wuassu Ghaṛṛahon Duata apan nionggolla si'o su tempo manga piaṛṛa'u jamaatta nangaddon lima mangitou su wowon puanu, wuṛṛu manga nabi namasingkatu tanatan Duata su ola'u ririnu.

¹⁵ Pammanarate sarangkanambone udde ringannu atonna-tonna, tadea'u manaranu asiloannu awadaalla.

¹⁶ Paariagai ririnu wuṛṛu paariagai lai al᷊aṛṛangngu. Ṛinone i'o matuṛṛuta ma'ola'a sarangkanambone udde, ana waugu ringannu aroddi i'o sarun manal᷊amatta mawae su ririnu sassane aroddi lai manga taumata apan maddaringikka si'o.