1 TESALONIKA 3 - WUKE SUSI WATTI'U AL᷊AL᷊USASSA

¹ Panginsueanne apulun kami tate niataṛṛanganna. Ana waugu udde i yami maṛṛingidda mappianne i yami itantangnga sassane su Atena,

² tantal᷊anna i yami nandolokku tuṛṛangi ite Timotius. I tou sangkatou mamamanara Duata apan mammanara suadio'a ringanni ami mammasingkatu Watti'u Al᷊al᷊uassa su ola'i Kristus. I yami nandolokki Timotius ringanni yamiu tadea'u i tou mannohassa si yamiu wuṛṛu mangonggolu sasasa si yamiu ana see lembon mangngimanna lai si Kristus.

³ Ringannu aroddi tawe saran sangkatou wuassi yamiu apan sumoṛṛota ana waugu asasusan kite indi. I yamiu sassane masingkata manungku manga asasusa udde nasutta sulal᷊ummu pandumannu Ruata si ite.

⁴ Su tempo i yami ta'e su sambau ringanni yamiu, i yami suete namasingkata si yamiu su paarorone manungku i ite sarun matataṛṛanga. Wuṛṛu udde atonna-tonna suete nariaddi; yamiu sassane masingkatte.

⁵ Ana waugu udde i ya'u nandolokki Timotius, ana waugu i ya'u maapulu atonna maasingkata ereapa araṛṛimaddi yamiu mangngimanna si Kristus. I ya'u sussinggawangnga ana waugu Setanna wotongnge mamono'a si yamiu ma'oman sara anambon asasahaddi yami maola'a tate gunane.

⁶ Orassa indi Timotius nabelengke wuṛṛu suete nabbatti'a si yami watti'a maal᷊uassa su ola'u ereapa i yamiu mangngimanna si Kristus wuṛṛu uararangngu. I tou namasingkata si yami manungku i yamiu sidutu mangngadon pananaunganna mapia su ola'i yami sulal᷊ummu naungngu. Wuṛṛu i yamiu maapulu maisasomban kami, ere lai yami maapulu maisasomban kamiu.

⁷ Ana waugu udde manga tuṛṛangnga, sulal᷊ummu al᷊awo'u asasusa wuṛṛu patatuṛṛaddanni yami, yami nial᷊iwuṛṛanu watti'i yamiu. Pangangimannu si Kristus naahewalla naungngi yami

⁸ na'oman sara orassa indi yami naapendamma atonna-tonna mabbiakka, sambal᷊iate i yamiu sidutu uarisikka matohassa, uaaukka ringannu Mawu.

⁹ Aroddi ahewalle apendammu aadiangkamanni yami su Ruata su al᷊awo'u al᷊al᷊uassa apan niapendamanni ami su saruan-Ne ana waugu yamiu.

¹⁰ Allo ṛabbi yami sussal᷊ande si Tou ringannu awawiran dal᷊ummu naungnga, tadea'u i yami wotongnge masasomba sassane ringanni yamiu ipanuungngu apa apan ipaapulun kamiu see ipangimanna si Kristus aroddi olangnge.

¹¹ Antimanna Ruata Iamangngi ite sassane, wuṛṛu Mawun kite Yesus Kristus manul᷊idda lal᷊anni yami ipadumatingngi yamiu!

¹² Antimanna Mawu ma'ola'a si yamiu lembon marangngu sangkatou ringannu waine wuṛṛu lembon marangngu su anambon taumata, na'oman sara darangngunu udde aatambanna, ere lai darangngun kami si yamiu.

¹³ Ringannu aroddi Mawu sarun manohassa naungngu, na'oman sara i yamiu ma'ukkasa wuṛṛu tawe sal᷊ane su saruannu Ruata Iamangngi ite, su tempo Mawun kite Yesus rumanta suadio'a ringannu anambon taumata apan naola'a pussa'a-Ne.