1 TESALONIKA 1 - WUKE SUSI WATTI'U AL᷊AL᷊USASSA

¹ Manga tuṛṛangnga jamaatta su Tesalonika apan naola'a al᷊aṛṛana'u Ruata Iamangnga wuṛṛu Mawu Yesus Kristus: I yami, eteudde Paulus, Silas wuṛṛu Timotius mangngantimma doronganna Ruata mangonggolu al᷊amatta wuṛṛu paddarame si yamiu.

Wiakka wuṛṛu pangangimannu manga taumatan Tesalonika

^2-3 I yami sidutu u'al᷊iomanna su Ruata ana waugu manga tuṛṛanga sarangkanambone. Suapan i yami umal᷊iomanna su Ruata wuṛṛu Iamangngi ite, i yami sidutu mannaungnga si yamiu. I yami sidutu u'al᷊iomanni yamiu. I yami mannaungnga ereapa i yamiu napaal᷊iatta'a sulal᷊ummu pallal᷊agu manungku i yamiu mangngimanna si Kristus, ereapa i yamiu mandangngu taumata waine, na'oman sara i yamiu mangngimbe si mangitou, wuṛṛu ereapa i yamiu mangantimma ringannu matohassa su Mawun kite Yesus Kristus.

⁴ I yami masingkatta manga tuṛṛangnga, manungku Ruata mandangngu si yamiu wuṛṛu suete namile si yamiu maola'a pussa'a-Ne sassane.

⁵ Ana waugu i yami namasingkatu Watti'u Al᷊al᷊uassa si yamiu wal᷊ine tumba'u ringannu wisara, arawe lai ringannu taṛṛino wuṛṛu Ghaṛṛahon Duata. Wuṛṛu i yami mangngimanna atonna atatul᷊iddu Watti'u Al᷊al᷊uassa udde. I yamiu masingkata ereapa i yami mabbiakka ana waugu i yamiu su tempo i yami uatana'a su pattanganni yamiu.

⁶ I yamiu uantantalongnga pallal᷊agun kami wuṛṛu tul᷊adan Mawu. Salaiwe i yamiu tumaniten uatataṛṛanga, i yamiu mannal᷊oho ringannu naungnga mal᷊uassa watti'a apan iwabbatti'i yami si yamiu. Al᷊al᷊uassa udde nionggolu Ghaṛṛahon Duata.

⁷ Ringannu udde i yamiu naola'a tul᷊adda su anambon taumatan Saṛṛani su Makedonia wuṛṛu Akhaya.

⁸ Ana waugu nanattakka wuassi yamiu, watti'a su ola'u Mawu suete niapaasingkata na'oman sara watukku Makedonia wuṛṛu Akhaya. Wuṛṛu wal᷊ine tumba'u udde lai; arawe watti'a su ola'u ereapa i yamiu nangimanna Ruata na'omate su al᷊awo'u tampa, na'oman sara i yami lasa'e lai maggahaton al᷊awo'u hatto si yamiu.

⁹ Anambon taumata udde uahahatto su ola'u ereapa i yamiu nanal᷊oho si yami su tempo i yami dorone nirumanta ringanni yamiu. I mangitou uahahatto su ola'u ereapa i yamiu nanantangu pasasubba paal᷊uanna wuṛṛu nirumanta ringannu Ruata tinggassa apan wiakka wuṛṛu mattaṛṛamawu si Tou.

¹⁰ I mangitou uahahatto lai su ola'u ereapa i yamiu mangngantimma darantan Ana'u Ruata wuassu surga, eteudde Mawu Yesus, apan suete niapaawiakku Ruata wuassu papate. Ete Mawu Yesus udde lai apan manal᷊amatta si ite wuassu asasa'un Duata apan sarun rumanta.