1 TAWARIKH 6 - WUKE SUSI WATTI'U AL᷊AL᷊USASSA

Akkittu papapulunni Lewi apan nariaddi Imam Bahewa

¹ I Lewi pia siri tallu ana'a esakka; i Gerson, i Kehat wuṛṛu i Merari.

² I Kehat pia siri appatta ana'a esakka; Amram, Yizhar, Hebron wuṛṛu Uziel.

³ I Amram ruan katou anangnge esakka, eteudde i Harun wuṛṛu i Musa, see lai sangkatou ana'a wawine aranne i Miryam. I Harun pia siri appatta ana'a esakka; i Nadab, i Abihu, i Eleazar wuṛṛu i Itamar.

⁴ Atokku sinossoṛanni Eleazar eteudde ere manansunna indi, i Pinehas, i Abisua,

⁵ i Buki, i Uzi,

⁶ i Zerahya, i Merayot,

⁷ i Amarya, i Ahitub,

⁸ i Zadok, i Ahimaas,

⁹ i Azarya, i Yohanan,

¹⁰ i Azarya (i tou mangangimbe su Wal᷊en Mawu apan nipararisikki Ratu Salomo su Yerusalem),

¹¹ i Amarya, i Ahitub,

¹² i Zadok, i Salum,

¹³ i Hilkia, i Azarya,

¹⁴ i Seraya, i Yozadak.

¹⁵ I Yozadak indi niapidda lai suadio'a ringannu taumatan Yehuda wuṛṛu tumana'u Yerusalem waine sutempo Mawu namuangngi mangitou watukku wanua waine ringannu nappaatti Nebukadnezar.

Papapulunna waine wuassi Lewi

¹⁶ I Lewi pia siri tallu ana'a esakka, eteudde i Gerson, i Kehat wuṛṛu Merari.

¹⁷ I mangitou sangkatou-sangkatou pia anangnge. I Libni wuṛṛu i Simei udde al᷊aṛṛana'i Gerson;

¹⁸ i Amram, i Yizhar, i Hebron wuṛṛu i Uziel udde al᷊aṛṛana'i Kehat.

¹⁹ I Mahli wuṛṛu i Musi udde al᷊aṛṛana'i Merari.

²⁰ Akkittu papapulunni Gerson eteudde: i Libni, i Yahat, i Zima,

²¹ i Yoah, i Ido, i Zerah, i Yeatrai.

²² Akkittu papapulunni Kehat eteudde; i Aminadab, i Korah, i Asir,

²³ i Elkana, i Ebyasaf, i Asir,

²⁴ i Tahat, i Uriel, i Uzia, i Saul.

²⁵ I Elkana pia darua ana'a esakka: i Amasai wuṛṛu i Ahimot.

²⁶ Akkittu papapulunni Ahimot eteudde: i Elkana, i Zofai, i Nahat,

²⁷ i Eliab, i Yeroham, i Elkana.

²⁸ I Samuel pia darua ana'a esakka; i Yoel pahul᷊une, wuṛṛu i Ahia tuarine.

²⁹ Akkittu papapulunni Merari eteudde: i Mahli, i Libni, i Simei, i Uza,

³⁰ i Simea, i Hagia, i Asaya.

Manga mananalangnga musikka su Wal᷊en Mawu

³¹ Ro'en Bantallu pa'aire niingkatta sutampa patataṛamawuanna su Yerusalem, i Ratu Daud namile manga taumata apan manarane mangngantari daralo su Wal᷊en Mawu.

³² I mangitou mammanara ual᷊al᷊ol᷊ossa su Rasannu Mawu sutempo i Ratu Salomo taambe napararisikku Wal᷊en Mawu.

³³ Akkittu sinossoṛannu manga taumata apan manarane udde eteudde: Wuassu ṛuanganni Kehat: Heman ana'i Yoel. I tou uapiaṛṛa'u mangangantari apan paarorone. Akkittu sinossoṛanne wua doso naddatingngi Yakub eteudde: i Heman, i Yoel, i Samuel,

³⁴ i Elkana, i Yeroham, i Eliel, i Toah,

³⁵ i Zuf, i Elkana, i Mahat, i Amasai,

³⁶ i Elkana, i Yoel, i Azarya, i Zefanya,

³⁷ i Tahat, i Asir, i Ebyasaf, i Korah,

³⁸ i Yizhar, i Kehat, i Lewi, i Yakub.

³⁹ I Asaf eteudde piaṛṛa'u mangangantari aruane. Akkittu sinossoṛanne wua bowa ire'e naddatingngi Lewi eteudde: i Asaf, i Berekhya, i Simea,

⁴⁰ i Mikhael, i Baaseya, i Malkia,

⁴¹ i Etai, i Zerah, i Adaya,

⁴² i Etan, i Zima, i Simei,

⁴³ i Yahat, i Gerson, i Lewi.

⁴⁴ I Etan eteudde piaṛṛa'u mangangantari atallune; i tou wuassu amonanni Merari. Akkittu sinossoṛanne wua bowa iree maddatingngi Lewi eteudde: i Etan, i Kisi, i Abdi, i Malukh,

⁴⁵ i Hasabya, i Amazia, i Hilkia,

⁴⁶ i Amzi, i Bani, i Semer,

⁴⁷ i Mahli, i Musi, i Merari, i Lewi.

⁴⁸ Manga manara waine su wal᷊en patataṛamawuanna nitantilla su manga hawene taumatan Lewi lai.

Papapulunni Harun

⁴⁹ I Harun wuṛṛu papapulunne manarane mannambunnu amania, mangngonggolu sasamba itattambunna su wowon mezbah, mapaamattu lal᷊aghu su Wabbo'a Lembon Susi, wuṛṛu mangngonggolu sasamba ipamappassa rosan taumatan Israel. Sarangkanambone udde niola'a wuassu tatantiron Musa allangngu Ruata.

⁵⁰ Eteindi akkittu papapulunni Harun: i Eleazar, i Pinehas, i Abisua,

⁵¹ i Buki, i Uzi, i Zerahya,

⁵² i Merayot, i Amarya, i Ahitub,

⁵³ i Zadok, i Ahimaas.

Tampaa tatanaannu manga taumatan Lewi

⁵⁴ Eteindi manga wageangngu leta'a atatanaanna apan nionggola su amonanni Kehat papapulunni Harun. I mangitou nanengkamma wageangnga paarorone wuassu leta'a apan nitantunna ionggola su taumatan Lewi.

⁵⁵ Leta'i mangitou nasutta lai soan Hebron su leta'u Yehuda, wuṛṛu manga wadda'u nannal᷊o maranine.

⁵⁶ Arawe manga wawail᷊anna wuṛṛu manga ampungnga su leta'a maranin soa udde nionggola si Kaleb ana'i Yefune.

^57-59 Papapulunni Harun niawuatannu Hebron, soa tatalanganna, Yatir, wuṛṛu manga ampungnga manansunna indi suadio'a ringannu manga wadda'u nannal᷊one; ampungngu Libna, Estemoa, Hilen, Debir, Asan, Bet-Semes.

⁶⁰ Su leta'u ṛuanganni Benyamin i mangitou niatahiannu manga ampungnga suadio'a ringannu manga wadda'a: Geba, Alemet wuṛṛu Anatot. Sarangkanambone pia 13 ampungnga maola'a tampa atatanaannu amonanni mangitou.

⁶¹ Mapul᷊o ampungngu ṛuanganni Manasye su samba'a waṛṛattu Sal᷊ukku Yordan nionggola ringannu niundi su manga alahanna sulal᷊ummu amonanni Kehat apan taambe naasomba leta'a.

⁶² Manga alahanna sulal᷊ummu amonanni Gerson naasomba 13 ampungnga su leta'u ṛuanganni Isakhar, i Asyer, i Naftali, wuṛṛu i Manasye apan su Basan su samba'a timukku Sal᷊ukku Yordan.

⁶³ Ringannu niundi lai, manga alahanna sulal᷊ummu amonanni Merari naasomba 12 ampungnga su leta'u ṛuanganni Ruben, i Gad, wuṛṛu i Zebulon.

⁶⁴ Etearoddi olangnge walahannu Israel nattahia su ṛuanganni Lewi manga ampungnga suadio'a ringannu manga wadda'u nannal᷊one maola'a tampa pamanuanni mangitou.

⁶⁵ Manga ampungnga su wageangngu leta'u ṛuanganni Yehuda, i Simeon wuṛṛu i Benyamin apan buatte nisaggo udde, nitahia lai ringannu niundi.

⁶⁶ Su wageangngu leta'u ṛuanganni Efraim, sambageanganna wuassu manga alahannu amonanni Kehat, naasomba tahia manga ampungnga manansunna indi ringannu manga wadda'u nannal᷊o maranine:

⁶⁷ Sikhem, soa tatal᷊anganna su panenteannu leta'a udde, Gezer,

⁶⁸ Yokmeam, Bet-Horon,

⁶⁹ Ayalon wuṛṛu Gat-Rimon.

⁷⁰ Su wageangngu leta'u ṛuanganni Manasye su samba'an waṛṛattu Sal᷊ukku Yordan i mangitou nanengkamma ampungngu Aner wuṛṛu Bileam ringannu wadda'u nannal᷊o maranine.

⁷¹ Manga amonannu ṛuanganni Gerson naasomba tahia manga ampungnga manansunna indi ringannu manga wadda'u nannal᷊o maranine: Su wageangngu leta'u ṛuanganni Manasye, samba'an timukku Sal᷊ukku Yordan: Golan su Basan wuṛṛu Asytarot.

⁷² Su wageangngu leta'u ṛuanganni Isakhar: Kedes, Daberat,

⁷³ Ramot wuṛṛu Anem.

⁷⁴ Su wageangngu leta'u ṛuanganni Asyer: Masal, Abdon,

⁷⁵ Hukok wuṛṛu Rehob.

⁷⁶ Su wageangngu leta'u ṛuanganni Naftali: Kedes su Galilea, Hamon wuṛṛu Kiryataim.

⁷⁷ Papapulunni Merari apan taambe naasomba tahia leta'a, naasomba manga ampungnga manansunna indi ringannu manga wadda'u nannal᷊o maranine: Su wageangngu leta'u ṛuanganni Zebulon; Rimono wuṛṛu Tabor.

⁷⁸ Su wageangngu leta'u ṛuanganni Ruben, samba'an ra'in Sal᷊ukku Yordan maranin Yerikho: Bezer su leta'a wantikke, Yahas,

⁷⁹ Kedemot wuṛṛu Mefaat.

⁸⁰ Su wageangngu leta'u ṛuanganni Gad: Ramot su Gilead, Mahanaim,

⁸¹ Hesybon wuṛṛu Yaezer.