1 TAWARIKH 29 - WUKE SUSI WATTI'U AL᷊AL᷊USASSA

Manga sasumbala ipandarisikku Wal᷊en Mawu

¹ Ana see i Ratu Daud nabbisarate su anambon taumata apan uaammulla isudde, “Wuassu anambon parinsi'u, tumba'u i Salomo apan nipilen Duata. Arawe i tou ta'e tumaniten dario'a wuṛṛu ta'e woddo ara'e longonna, see lai manara indi tumaniten wahewalla. Ana see lai apa sarun iaparisikka indi wal᷊ine wal᷊en araratuannu taumata, ewe'e Wal᷊en Mawu Ruata.

² Manga aola'u wal᷊en udde wuṛṛu lal᷊oṛṛone buatte nissaddia'u ringannu sarangkanambone apan tatahuanangku. I ya'u buatte nanaddia wul᷊awanna, sal᷊a'a, witu'a, atta'a, alu, manga watu manambo lihidde apan ipallogakka wuṛṛu manambo lai watu pualam.

³ Ewe'e lai ana waugu ahewallu naungku su Wal᷊en Mawu udde, i ya'u lai buatte nanantillu sal᷊a'a wuṛṛu wul᷊awanna pussaa'u sassane:

^4-5 wul᷊awanna apianne 100 ton pia lebbene, wuṛṛu sal᷊a'a tutune maranin 240 ton ipangoossa darandungngu Wal᷊en Mawu, wuṛṛu manga saranapa apan ṛinone manarannu taumata apan pia asingkanne. Ne orassa indi isai lai ma'apulu mangonggolu sasambane su Mawu ringannu al᷊al᷊uassu naungnge?”

⁶ Ne manga tembonannu amonanna, tembonannu ṛuanganna, manga piaṛṛa'u tantara ara'e perwira wuṛṛu mallal᷊u'adda darotongngu ratu nabbisara manungku i mangitou lai mappulu massumbala.

⁷ Ana see su ipandarisikku Wal᷊en Mawu i mangitou nangonggolu manga saranapa; wul᷊awanna 170 ton pia lebbene, sal᷊a'a 340 ton pia lebbene, witu'a 620 ton pia lebbene, wuṛṛu atta'a 3.400 ton pia lebbene.

⁸ Manga taumata apan uatahuanna manga watu permata nanantilla si Yehiel nitaṛṛo su kasen Wal᷊en Mawu. (Yehiel uddewe sangkatou taumatan Lewi wuassu ṛuanganni Gerson.)

⁹ Tunanangnge nangonggolla ringannu naungnga mal᷊uassa su Mawu wuṛṛu i mangitou lullala'a ana waugu manambote aonggoli mangitou. I Ratu Daud lembon lullala'a lai.

I Daud maddalo Ruata

¹⁰ Su saruannu awadaalla udde i Ratu Daud naddalo Mawu, i tou nabbisara, “Oh Mawu Ruata apan sassubbanni Yakub al᷊amonan kami, dalo Si'o sarangkal᷊o'enge!

¹¹ I'o lembon bahewalla, wuṛṛu uataṛṛino. I'o tinumelengnga wuṛṛu mawantuga. Al᷊awo'u saranapa su langitta wuṛṛu su runia uddewe tatahuanan-Nu. I'o ratu mawantuga, uataṛṛino al᷊awo'u lal᷊oṛṛone.

¹² Anambon pa'a'ala wuṛṛu lal᷊umanna'a darantane wuassu Mawu; al᷊awo'u riadianna I'o uataṛṛino ringannu atatohassa wuṛṛu taṛṛino apan atanggaṛṛanne; I'o uataṛṛino manenegu taumata maola'a taumata aaddatanna wuṛṛu matohassa.

¹³ Orassa indi, oh Ruatan kami, yami ma'adiangkamanna Si'o, wuṛṛu yami maddalo aran-Nu apan mawantuga.

¹⁴ I ya'u wuṛṛu tumana'u indi atonna-tonna tawe mapangonggolu apa-apa Si'o, ana waugu sarangkanambone uddewe aonggolu Mawu, wuṛṛu apa apan ia'onggoli yami uddewe tatahuanan-Nu lai.

¹⁵ I'o masingkatta, oh Mawu, manungku ere lai manga al᷊amonan kami, yami lai mabbiakka su runia indi naal᷊ihidda rumaranta wuṛṛu taumata raho. Wiakki yami naal᷊ihidda lintau apan malliudda, wuṛṛu yami lai tawe maal᷊iu wuassu papate.

¹⁶ Oh, Mawu Ruatan kami, anambon saranapa apan maarega indi niammuli yami isindi ipandarisikku sambau wal᷊e-Nu tadea'u yami wotongnge mangaddatta aran-Nu apan susi. Arawe sarangakanambone udde nisengkammi yami wuassu Mawu sassane wuṛṛu eteudde pussa'a-Nu lai.

¹⁷ I ya'u masingkatta I'o mannal᷊u'atta naungngu taumata wuṛṛu maapulun taumata apan naungnge waresi. Ringannu asasaṛṛionto'a wuṛṛu al᷊al᷊uassu naungnga sarangkanambone indi ta'u ionggolla Si'o. I ya'u buatte na'ellega ereapa al᷊aṛṛanang-Ngu apan uasemodda isindi uaapiddu aonggolli mangitou Si'o ringannu al᷊al᷊uassu naungnga.

¹⁸ Oh Mawu Ruata, apan sassubbanni Abraham, i Ishak wuṛṛu i Yakub, al᷊amonan kami, antimanna I'o mallu'adda tadea'u al᷊aṛṛanang-Ngu sidutu marangngu Si'o ere lai su orassa indi wuṛṛu tul᷊ungaawe tadea'u sarangkal᷊o'engnge sidutu tuttuṛṛuta Si'o.

¹⁹ Onggol᷊aawe si Salomo, parinsi'u, apulun naungnga atonna-tonna tadea'u tumuṛṛutta anambon parenta-Nu wuṛṛu ipandarisikku wal᷊en patataṛṛamawuanna udde apan aolangnge buatte ta'u nisaddia.”

²⁰ Napawe buatte niumal᷊iomanna aroddi, i Daud nabbisara su anambon taumata apan uaammulla isudde, “Paddalote Mawu Ruatanu!” Ne awadaalla udde naddalote Mawu Ruata apan sassubbannu al᷊amonan mangitou. Ana see i mangitou niumal᷊intudda nangaddatta Mawu wuṛṛu ratu.

²¹ Allo manansunna i mangitou naṛṛatate winatangnga ionggola maola'a sasamba su Mawu, ana see tinahia su anambon tumanangnge. Waine wua'udde lai pia 1.000 sapi esakka, 1.000 domba esakka wuṛṛu 1.000 domba saṛṛen tumuwo apan niṛṛata wuṛṛu nitambunna su wowon mezbah. I mangitou lai nangonggolu anggore apan ṛinone iapidda su manga sasamba udde.

²² Allo udde i mangitou u'anna ma'inumma ringannu lulluassa su saruannu Mawu. Ana see su aruane i mangitou namasingkatta manungku i Salomo naola'e ratu. Ringannu arannu Mawu, i mangitou nanenegi tou naola'a ratun mangitou wuṛṛu i Zadok naola'a imam.

²³ Ne ere naola'a pinallol᷊ossa si Daud iamangnge, i Salomo niuma'iantte su araratuanna apan buatte nitantunnu Mawu. I tou ratu apan mauntungnga masomakka wuṛṛu a'addatannu anambon walahannu Israel.

²⁴ Anambon mammamanaran araratuanna sipil wuṛṛu tantara na'oman sara manga parinsin Daud apan baine lai nanga'u si Salomo naola'a ratu.

²⁵ Mawu na'ola'a anambon tumanangnge tinumiangnga si Ratu Salomo wuṛṛu na'ola'a si tou ratu apan lembon matohassa wuassu anambon datu apan buatte namarenta Israel.

Auttu watti'a i Daud uaparenta

²⁶ I Daud ana'i Isai uaparenta ahewallu Israel

²⁷ appatu pul᷊o su tonnane al᷊annune. Su Hebron i tou namarenta 7 tonna al᷊annune wuṛṛu su Yerusalem 33 su tonnane al᷊annune.

²⁸ I tou ala wuṛṛu a'addatanna wuṛṛu nate timmadete. I Salomo anangnge naola'a ratu nallol᷊ossa si tou.

²⁹ Watti'u pabbiaṛṛanni Ratu Daud wuassu panattaṛṛanne naddatingngu panguddusanne buatte niwoṛṛetta sulal᷊ummu wuken Nabi Samuel, Nabi Natan wuṛṛu Nabi Gad.

³⁰ Sulal᷊ummu wuke udde niwatti'a su ola'u i tou mammarenta, taṛṛinone wuṛṛu sarangkanambone apan naṛṛia'a su watanganne, su Israel wuṛṛu su manga araratuanna maranin Israel.