1 TAWARIKH 28 - WUKE SUSI WATTI'U AL᷊AL᷊USASSA

Manga tatantiron Daud su ola'u Wal᷊en Mawu

¹ I Ratu namarentate tadea'u anambon piaṛṛa'u Israel maammulla su Yerusalem. Nariaddi manga tembonannu ṛuanganna, manga mammamanaran araratuanna, wuṛṛu timmaddu amonanna, manga mallal᷊u'adda darotongnga wuṛṛu mamadul᷊i winatangngu ratu see lai manga parinsine – aunne manga ahewalanne araratuanna, perwira ara'e tembonannu tantara wuṛṛu taumata papunna, sarangkanambone iapaammulla su Yerusalem.

² I Daud dirumarisikka su saruanni mangitou wuṛṛu nabbisara, “Manga tuṛṛangku sambalahanna, paddaringikke! Mal᷊annute i ya'u pia pandumma mapararisikku sambau wal᷊en apan matohassa panahipunanna Wantallu Pa'aire, dararisirannu leddan Mawu Ruatan kite. I ya'u buatte nanaddia aolangnge ipandarisikku sambau wal᷊en apan passubbanna si Tou.

³ Arawe siningaddu Mawu ma'ola'a inolaanna udde ana waugu i ya'u sangkatou tantara apan masokkate napaturon daṛṛa.

⁴ Mawu Ruata apan sassubbannu Israel, buatte namile si ya'u wuṛṛu papapulungku iapaparenta Israel saran mal᷊annu-l᷊annu. Su ipanaddia sangkatou piaṛṛangnge i tou namile ṛuanganni Yehuda, wuṛṛu wuassu ṛuanganna udde i tou namile laloṛṛon bal᷊en iamangku. Wuṛṛu wuassu anambon lal᷊oṛṛon bal᷊en iamangku udde i Tou namile si ya'u ne i ya'u nitenega naola'a ratun Israel.

⁵ I tou nangonggolu manambo ana'a si ya'u wuṛṛu wuassu anambon ana'u udde i Tou namile si Salomo iapaparenta Israel, araratuannu Mawu.

⁶ Mawu nabbisara si ya'u arendi, ‘i Salomo anangngu sarun mapararisikku wal᷊e-U. I tou buatte Ta'u nipile maola'a ana-U, wuṛṛu i Ya'u sarun maola'a iamangnge.

⁷ Amungkangu i tou ringannu atonna-tonna sidutu tuttuṛṛutta anambon tita wuṛṛu manga parenta-U ere lai buatte niolangnge orassa indi, Ya'u sarun manohassa araratuanne saran mal᷊annu-l᷊annu.’ ”

⁸ Ana see i Daud nabbisara apia, “Nariaddi orassa indi, ei tumana'u araratuangku, su saruannu Ruatan kite wuṛṛu su saruannu ammul᷊annu anambon taumatan Israel, al᷊aṛṛana'u Mawu indi, ya'u sumal᷊ande si yamiu ringannu atonna-tonna tuttuṛṛutta al᷊awo'u parentan Mawu Ruatan kite. Ringannu aroddi yamiu wotongnge sidutu manahuanna wanua apan mapia indi wuṛṛu manantilla su papapulunnu saran mal᷊annu-l᷊annu.”

⁹ Ana see si Salomo, i Daud nabbisara, “Ana'u, ṛinone Ruata apan sassubbannu iamangngu, a'uannu lai maola'a Ruatanu. I'o ṛinone mangngimanna si Tou ringannu mal᷊uassa wuṛṛu awawiran naungnga. Ana waugu i Tou masingkatta anambon ṛingiranna wuṛṛu apulun naungngi ite. Amungkangu i'o maddea'a si Tou, i Tou sarun asombangannu, arawe amungkangu i'o manantangngi Tou, i Tou saran manantangngu saran mal᷊annu-l᷊annu.

¹⁰ Paanaunge paapia-pia manungku Mawu buatte namile si'o mapararisikku wal᷊e-Ne sassane. Ne, orassa indi pammanarate manara udde, ringannu naungnga mal᷊uassa.”

¹¹ Napawe wua'udde Daud nanatilla si Salomo ṛiinnu paaola'a Wal᷊en Mawu, manga gudange, anambon wabbo'ane, wuṛṛu Wabbo'a Lembonsusi, tampa pangangampunganna rosa.

¹² I Daud nanantillu lai anambon ṛiinna apan buatte niṛṛingidde su ipa'ola'a manga rallakka ringannu manga wabbo'a apan uapal᷊iwutta, wuṛṛu manga gudangnga panahipunanna aola'u Wal᷊en Mawu udde see lai manga gudangnga panahipunanna manga aonggola su Mawu.

¹³ See lai tinantilla ṛiinnu patatahia manga imam wuṛṛu taumatan Lewi, su ola'u manga manara apan ṛinone manaranni mangitou, eteudde manaran mangitou su Wal᷊en Mawu wuṛṛu pallal᷊u'adda anambon saranapa ipattaṛṛamawu.

¹⁴ I tou nangonggolu manga tatantiro su ola'u ereapa mammanara wul᷊awanna wuṛṛu sal᷊a'a ipallanginnu manga saranapa,

¹⁵ ipallanginnu manga sasol᷊oanna wuṛṛu leddan sasol᷊oanna,

¹⁶ manga medda wuassu sal᷊a'a, wuṛṛu suapan medda bul᷊awanna pangadoannu roti sasamba su Ruata.

¹⁷ See lai manga tatantiro su ola'u anambon wul᷊awanna tutune apan ṛinone ipaatta ipallanginnu saṛṛampangnga, mangko wuṛṛu wotolla, su ola'u anambone sal᷊a'a wuṛṛu bul᷊awanna ipa'ola'a manga lama'a.

¹⁸ Su ola'u anambon wul᷊awanna tutune ipa'ola'a mezbah tampa panambunannu amania wuṛṛu ipallanginnu kereta su manga paal᷊uannu mala'ekatta ringannu papaidde apan uasiappakka su wowon Wantallu Paairen Mawu.

¹⁹ Ana see i Ratu Daud nabbisara, “Sarangkanambone udde uawoṛṛetta sulal᷊ummu ṛiinna apan buatte niwoṛṛetta uasul᷊ungngu tatantiro apan nionggolu Mawu sassane iapamanara si ya'u.”

²⁰ Wua'udde i Ratu Daud nabbisara apia si Salomo anangnge, “I'o ṛinone pia pangangimanna wuṛṛu awawaṛṛani. Panattakke mammanara udde wuṛṛu arie mata'uttu al᷊awo'u manga apa. Mawu Ruata apan ta'u sassubbanna sarun mantul᷊ungngu. I tou tawe manantangngu. I tou sidutu su sandiṛṛannu maddatingngu anambon manara udde muddussa.

²¹ Pattatahia manara patataṛṛamawu sulal᷊ummu Wal᷊en Mawu buatte nitantunna suwallattu manga imam wuṛṛu taumatan Lewi. Manga mammamanara apan pia asingkatta sulal᷊ummu manarane saambau-sambau sarun mantul᷊ungnga ringannu naungnga mal᷊uassa, wuṛṛu manga piaṛṛa'a suadio'a ringannu anambon tumanangnge sarun maddaringikka parentanu.”