1 TAWARIKH 26 - WUKE SUSI WATTI'U AL᷊AL᷊USASSA

Manga mandariaga Wal᷊en Mawu

¹ Eteindi tahian manara su manga taumatan Lewi mandariaga Wal᷊en Mawu. Wuassu amonanni Korah nita'e i Meselemya ana'i Kore wuassu alahanni Ebyasaf.

² I tou pia siri pitu ana'a esakka apan uawoṛṛetta tumuṛṛuttu uukka: i Zakharia, i Yediael, i Zebaja, i Yatniel,

³ i Elam, i Yohanan, i Elyoënai.

⁴ Manansunna nita'e i Obed-Edom. I tou nial᷊amatannu Ruata ringannu naasomba siri 8 ana'a esakka apan niwoṛṛetta tumuṛṛuttu uukke: i Semaya, i Yozabad, i Yoah, i Sakhar, i Netaneel,

⁵ i Amiel, i Isakhar wuṛṛu i Peuletai.

^6-7 I Semaya ana'i Obed-Edom pahul᷊une, pia siri 6 ana'a esakka: i Otni, i Refael, i Obed, i Elzabad, i Elihu wuṛṛu i Semakhya; sarangkanambone manga taumata apan maarega sulal᷊ummu amonanni mangitou ana waugu i mangitou waṛṛani wuṛṛu matohassa, nangilembote i Elihu wuṛṛu i Semakhya.

⁸ Su manara mandiaga udde, ṛuanganni Obed-Edom nangonggolu 62 su atoune esakka apan waṛṛani wuṛṛu matohassa.

⁹ Ṛuanganni Meselemya nangonggolu 18 su atoune taumata apan waṛṛani wuṛṛu matohassa.

¹⁰ Wuassu ṛuanganni Merari nita'e i Hosa. I tou pia siri appatta ana'a esakka: i Simri (i tou wal᷊ine ana'a pahul᷊u, arawe nitenegu iamangnge naola'a piaṛṛangnge),

¹¹ i Hilkia, i Tebalya wuṛṛu i Zakharia. Sarangkanambone pia 13 su atoune amonanni Hosa apan naola'a mandariaga Wal᷊en Mawu.

¹² Manga mandariaga Wal᷊en Mawu nitahia sulal᷊ummu manga wageangnge tumuṛṛuttu amonanne. I mangitou lai nionggol᷊annu manga manara ere lai taumatan Lewi waine.

¹³ Suapan amonanna mawae ete amonanna wahewalla ara'e addio'a, nanganu undi tadea'u maasingkatta su ngara pasallanganna suapane i tou ṛinone mandiaga.

¹⁴ I Selemya nawageangnga su ngara pasallanganna su samba'an ra'i. Zakharia anangnge, sidutu mangngonggolu tatantiro apan mapia naasomba tampa su ngara wahewalla samba'a sawannakka.

¹⁵ I Obed-Edom naasomba ngara pasallanganna su samba'an timukka wuṛṛu al᷊aṛṛanangnge naasomba manara mandiaga manga gudangngu saranapa.

¹⁶ I Supim wuṛṛu i Hosa naasomba su ngara pasallanganna samba'an waṛṛatta wuṛṛu ngara pasallanganna Syalekhet apan addone su lal᷊anna saanna. Manara pandariaga niatokka aroddi olangnge na'oman sara sidutu pia mandariaga su ngara pasallanganna.

¹⁷ Miallo-miallo su samba'an ra'i pia siri 6 mandariaga, su samba'an sawannakka siri appatta, wuṛṛu su samba'an timukka siri appatta lai. Manga gudangngu saranapa niriagannu lai siri appatta, suapan sambau gudangnga mandariagane ruan katou.

¹⁸ Su tondanne samba'a baṛṛatta rariagannu siri 4 su a'amatanna wuṛṛu ruan katou su tonndanne udde sassane.

¹⁹ Etearoddi patatahia manaran pandariaga su amonanni Korah wuṛṛu su amonanni Merari.

Manga manara waine su Wal᷊en Mawu

²⁰ Manga taumata waine sulal᷊ummu ṛuanganni Lewi apan tinantil᷊annu manara mallu'adda saranapa su Wal᷊en Mawu wuṛṛu gudangnga panahipunanna manga aonggola su Ruata.

²¹ I Ladan eteudde sangkatou esakka ana'i Gerson; i tou nanossokku manga pira wageangngu amonanna, nasutta amonanni Yehiel anangnge.

²² Al᷊aṛṛana'i Yehiel, eteudde i Zetam wuṛṛu i Yoel, nionggol᷊annu manara mandiaga gudangnga wuṛṛu roitta su Wal᷊en Mawu.

²³ Papapulunni Amram, i Yizhar, i Hebron wuṛṛu i Uziel naasomba lai manarane.

²⁴ I Sebuel wuassu amonanni Gersom, ana'i Musa, eteudde mallal᷊u'adda darotongngu Wal᷊en Mawu.

²⁵ I tou pia amputtu pasasangkatuṛṛangnga ringanni Selomit wuassi Eliezer tuṛṛangngi Gersom. Akkittu papapulunni Eliezer naddatingngi Selomit eteudde ere manansunna indi: i Eliezer, i Rehabya, i Yesaya, i Yoram, i Zikhri, i Selomit.

²⁶ I Selomit wuṛṛu manga tuṛṛangnge manarane mallu'adda al᷊awo'u aonggola apan nionggoli Ratu Daud, manga tembonannu alahanna, manga piaṛṛa'u amonanna, wuṛṛu piaṛṛa'u tantara ara'e perwira matangga.

²⁷ Manga aonggola udde eteudde sambageanganna wuassu saranapa apan niaaṛṛo wuṛṛu niasombanganni mangitou sulal᷊ummu pangalo wuṛṛu apan nionggoli mangitou ipappaatta tumba'u su Wal᷊en Mawu.

²⁸ Aunne, i Selomit wuṛṛu amonanne ual᷊u'adda al᷊awo'u saranapa apan buatte tinantilla wuṛṛu ipappaatta su Wal᷊en Mawu, nasutta lai manga aonggola wuassi Nabi Samuel buatte tinantilli Ratu Daud, i Abner ana'i Ner, wuṛṛu i Yoab ana'i Zeruya.

Manga manaran taumatan Lewi waine

²⁹ Papapulunni Yizhar, eteudde i Kenanya wuṛṛu al᷊aṛṛanangnge, tinantil᷊annu manara mamamoṛṛettu araratuanna wuṛṛu manaran pallaruungnga su Israel.

³⁰ Al᷊awo'u manaran pangangagama, wuṛṛu manaran araratuanna su Israel samba'an waṛṛattu Sal᷊ukku Yordan tinantilla si Hasabya, wuṛṛu su 1.700 manga tuṛṛangnge: sarangkanambone taumata papunna wuassu papapulunni Hebron.

³¹ Piaṛṛa'u papapulunni Hebron eteudde i Yeria. Su tonna aiappattu pul᷊one sutempo i Ratu Daud uaparenta niapaamatta pananaṛṛassidda su ola'u papapulunni Hebron. Sulal᷊ummu pananaṛṛassidda udde inauranna suwallatti mangitou pia manga tantara apan matohassa uatana'a su Yazer su leta'u Gilead.

³² Al᷊awo'u manaran pangangagama wuṛṛu pamamarenta su Israel samba'an ra'in Sal᷊ukku Yordan – eteudde wageangngu leta'i Ruben, Gad wuṛṛu wageangngu leta'u walagi Manasye – tinantilla su 2.700 tembonannu alahanni Yeria, sarangkanambone taumata papunna apan nipilen Ratu Daud.