1 TAWARIKH 22 - WUKE SUSI WATTI'U AL᷊AL᷊USASSA

¹ Ne i Daud nbbisara, “Ete sutampa indi ṛinone iapararisikka Wal᷊en Mawu Ruata. Wuṛṛu ete su mezbah indi taumatan Israel ṛinone mangonggolu sasamba itattambunna hunane su Mawu.”

Pandariahi mandarisikku Wal᷊en Mawu

² I Ratu Daud nandolokka niapaammulu anambon taumata raho apan uatana'a su wanuan Israel, ana see nandolokki mangitou niapamanara. Sambageanganna wuassi mangitou mammaangnga watu su Wal᷊en Mawu.

³ Su ipa'ola'a pa'u wuṛṛu hensellu manga ngara pasallanganna su Wal᷊en Mawu udde, i Daud nangammullu atta'a manambo atonna. I tou lai nangammullu witu'a aroddi anambone na'oman sara tate iatimbanga.

⁴ Wuassu taumatan Tirus wuṛṛu Sidon i tou nannanatan alu cemara Libanon.

⁵ I Daud na'ola'a sarangkanambone udde ana waugu i tou maṛṛingidda arendi; “I ya'u ṛinone mandiahi saranapa apan pappandumanna ipandarisikku Wal᷊en Mawu. Ana waugu i Salomo parinsi-U ta'e dario'a wuṛṛu addio'a asingkanne, arawe Wal᷊en Mawu apan iapararisikke ṛinone apianne wuṛṛu tumelengnga su ahewallu runia.” Ne tantal᷊anna i Daud taambe nate, i tou nanaddia manambo atonna aola'u wangunanna.

⁶ I Daud namaggo parinsine, i Salomo, wuṛṛu namarenta si tou mapararisikku Wal᷊en Mawu Ruata apan sassubbannu taumatan Israel.

⁷ I Daud nabbisara si Salomo, “Ana'u, mal᷊annute i ya'u pia apulu mapararisikku sambau wal᷊en passubbanna Mawu Ruata'u.

⁸ Arawe Mawu nabbisara manungku i ya'u tumaniten masokka mapapangalo wuṛṛu buatte namate manambo taumata. Ana waugu udde i Tou tawe mamala'u mapararisikku Wal᷊en-Ne.

⁹ Salaiwe aroddi, i Tou buatte nangonggolu pa'aire indi si ya'u: ‘I'o sarun maasomba sangkatou ana'a esakka apan sarun mamarenta ringannu mal᷊angnganna, ana waugu i Ya'u sarun mantul᷊ungngi tou ma'oman sara tawe seetta apan mamangalo si tou. I tou sarun isaggo i Salomo ana waugu sutempo i tou uaparenta i Ya'u sarun mangonggolu al᷊al᷊angnganna wuṛṛu atatahul᷊andimma su ahewallu Israel.

¹⁰ Ete anangngu esakka udde apan mapararisikku Wal᷊e-U. I tou sarun maola'a ana-U wuṛṛu i Ya'u sarun maola'a iamangnge. Adderan araratuannu Israel sidutu sarun su papapulunne saran mal᷊annu-l᷊annu.’ ”

¹¹ Ana see i Daud nabbisara apia, “Orassa indi, ana'u, antimanna Mawu Ruatanu sidutu mantul᷊ungngu. Wuṛṛu antimanna i'o wotongnge mapararisikku Wal᷊en Mawu ere lai buatte nipa'ire-Ne.

¹² Wuṛṛu antimanna Mawu Ruatanu mangonggolu asingkatta wuṛṛu pasasunna si'o ipamarenta Israel uasul᷊ungngu manga tita-Ne.

¹³ Amungkangu i'o matuṛṛutta su anambon tita apan nionggolu Mawu si Musa su walahannu Israel, i'o sarun maasomba auntunganna. I'o ṛinone pia pangangimanna wuṛṛu waṛṛani. Imbaṛṛangnga mata'utta sumaruanna al᷊awo'u hal᷊ahe.

¹⁴ Su ola'u Wal᷊en Mawu udde i ya'u buatte nattinsahadda atonna-tonna nangammullu 3.400 tonna awakkattu wul᷊awanna wuṛṛu sal᷊a'a lai awakkanne nilumebbe wuassu 34.000 tonna. Waine lai pia bitu'a wuṛṛu atta'a apan tawe iareengnga anambone. Alu wuṛṛu watu nasaddiate lai si ya'u, arawe i'o ṛinone manamba apia.

¹⁵ I'o uatahuanna manambo mammamanara. Piaddu wotongnge mammanara su paal᷊ianna watu, pia wasen kalu, wasen batu wuṛṛu manambo taumata apan pande mammanara

¹⁶ wul᷊awanna, sal᷊a'a, witu'a wuṛṛu atta'a. Ne paal᷊ihakke manattakka! Doronganna Mawu mantul᷊ungngu.”

¹⁷ Ana see i Daud nandolokku anambon piaṛṛa'u Israel iapasumbala si Salomo.

¹⁸ Wisarane, “Mawu Ruatanu buatte nantul᷊ungngi yamiu, nangonggolu paddarame wuṛṛu atatammudda su ahewallu wanua. I tou buatte namala'u namaddon anambon walahanna apan dorone uatana'a su wanua indi. Orassa indi i mangitou uasuṛṛubbawate si'o wuṛṛu su Mawu.

¹⁹ Nariaddi, yamiu ṛinone mattaṛṛamawu Mawu Ruatanu ringannu ahewallu naungngu. Tattaṛṛa'e mapararisikku Wal᷊en Mawu, tadea'u Wantallu Pa'aire wuṛṛu anambon saranapa waine apan ipaatta mattaṛṛamawu wotongnge sahipunanna isudde.”