1 TAWARIKH 20 - WUKE SUSI WATTI'U AL᷊AL᷊USASSA

I Daud nangaṛṛo soan Raba

¹ Su watiannu aaluanna mallal᷊uwo manansunna, sutempo udde lai manga ratu inanaramanne inai mapapangalo, i Yoab nangapiddu tantarane wuṛṛu nangaṛṛo wanua Amon. Sutempo udde i Ratu Daud uatana'a su Yerusalem tawe tinumantalongnga. I Yoab wuṛṛu tantarane namal᷊iwutta soa Raba, ana see namangalo wuṛṛu nanggohakku soa udde.

² Wua'udde i Daud nirumanta nanganu manambo atonna saranapa apan niaaṛṛo wuassu soa udde. Suwallattu manga saranapa udde pia araposan ratu Amon. Araposan araratuanna udde awakkanne iraṛṛangngo 34 su kilone wuṛṛu lal᷊ogaṛannu sambau permata. I Daud nanganu permata udde wuṛṛu nipallogakka araposan araratuanne.

³ Wua'udde i Daud nangapiddu tumana'u soan Raba udde wuṛṛu namata'i mangitou mammanara ringannu mappaattu laṛṛahari, pasolla, wuṛṛu papaangnga. Manara udde niolangnge lai su manga soan Amon waine. Wua'udde i Daud wuṛṛu anambon tantarane nabelengke watukku Yerusalem.

Pangalo nando'appa manga taumata wawallu Filistin

⁴ Manga pira tempo wua'udde napesangke apia pangalo mando'appa taumatan Filistin su Gezer. Sulal᷊ummu sambau pangalo udde i Sibkhai taumatan Husa namate sangkatou wawalla aranne i Sipai. Ne taumatan Filistin udde nawaddote.

⁵ Sulal᷊ummu pangalo waine nando'appa taumatan Filistin, i Elhanan ana'i Yair namate si Lahmi tuṛṛangngi Goliat taumatan Gat. Pul᷊un sambeangngi Lahmi udde asallakke ere alun daradu'a.

⁶ Sulal᷊ummu pangalo waine lai su Gat pia sangkatou wawalla apan tal᷊imaddone annummu wua su lima wuṛṛu su leddane. I tou papapulunnu wawalla sutempo dorone.

⁷ I tou mangngeetta taumatan Israel, ne ana waugu udde i tou nipaten Yonatan, ana'i Simea, iaangngi Daud.

⁸ Siri tallu taumata apan nipaten Daud wuṛṛu tantarane eteudde, papapulunnu wawalla su Gat.