1 TAWARIKH 15 - WUKE SUSI WATTI'U AL᷊AL᷊USASSA

Pananaddia mangingkattu Wantallu Pa'aire

¹ I Daud napararisikku manga wal᷊ene su Soan Daud, wuṛṛu nandiahi tampa pangaddoannu Wantallu Paairen Duata ana see namasen rasannu Wantalla udde.

² I Daud nabbisara, “Tumba'u taumatan Lewi wotongnge mamasanna Wantallu Paairen Mawu, ana waugu ete i mangitou apan nipilen Mawu iapapasanna Wantalla udde wuṛṛu mattaṛṛamawu si Tou saran mal᷊annu-l᷊annu.”

³ Ne i Daud namago anambon taumatan Israel niaparanta su Yerusalem tadea'u mangingkattu Wantallu Paairen Mawu sutampa apan buatte niriahine.

⁴ Ana see i Daud nandolokku papapulunni Harun wuṛṛu taumatan Lewi ma'ammulla.

⁵ Ne wuassu amonanni Kehat, ṛuanganni Lewi, dirumarisikke i Uriel apan uapiaṛṛa'u 120 taumata wuassu amonanne.

⁶ Wuassu amonanni Merari dirumarisikke i Asaya apan uapiaṛṛa'u 220 su atoune.

⁷ Wuassu amonanni Gerson dirumarisikke i Yoel apan uapiaṛṛa'u 130 su atoune.

⁸ Wuassu amonanni Elisafan dirumarisikke i Semaya apan uapiaṛṛa'u 200 su atoune.

⁹ Wuassu amonanni Hebron dirumarisikke i Eliel apan uapiaṛṛa'u 80 su atoune.

¹⁰ Wuṛṛu wuassu amonanni Uziel dirumarisikke i Aminadab apan uapiaṛṛa'u 112 su atoune.

¹¹ Ana see i Daud nango si Imam Zadok wuṛṛu Imam Abyatar see lai siri annumma taumatan Lewi, eteudde: i Uriel, i Asaya, i Yoel, i Semaya, i Eliel wuṛṛu i Aminadab.

¹² I Daud nabbisara si mangitou, “Ete i yamiu indi piaṛṛa'u ṛuanganna sulal᷊ummu ṛuanganni Lewi. Ana waugu udde, i yamiu wuṛṛu manga taumatan Lewi waine ṛinone mapa'ukkassu watanganne tadea'u wotongnge mangingkattu Wantallu Pa'airen Mawu, Ruatan Israel, sutampa apan buatte niriahi'u.

¹³ Sutempo Wantalla udde paarorone niingkatta, i yamiu tawe isudde nangapidda. Ana waugu udde Mawu, Ruatan kite, nakkuumanni ite ana waugu i ite massubba si Tou tawe nassul᷊ungngu apulu-Ne.”

¹⁴ Nariaddi, manga imam wuṛṛu taumatan Lewi napa'aukkasan watanganne tadea'u wotongnge mangingkattu Wantallu Pa'airen Mawu, Ruatan Israel.

¹⁵ Wuṛṛu sutempo Wantalla udde i singkatta, i mangitou mamasanna su wambangngi mangitou ringannu alu papasanna, tumuṛṛuttu atoranna apan nionggolu Mawu si Musa.

¹⁶ I Daud nandolokku lai piaṛṛa'u manga taumatan Lewi udde tadea'u mandolokku manga pira taumata wuassu walagi mangitou iapaantari wuṛṛu iapanalangnga antarin lal᷊uassa su kecapi wuṛṛu simbal.

^17-21 Wuassu wallattu manga amonanna mangangantari, i mangitou namile manga taumata manansunna indi iapatengkella simbal atta'a; i Heman ana'i Yoel suadio'a ringannu manga tuṛṛangnge aranne i Asaf ana'i Berekhya, wuṛṛu i Etan ana'i Kusaya wuassu amonanni Merari. Su ipanantalongnga si mangitou see lai mananengkella kecapi tingikke matanggakka nipile manga taumatan Lewi manansunna indi; i Zakharia, i Yaaziel, i Semiramot, i Yehiel, i Uni, i Eliab, i Maaseya, wuṛṛu i Benaya. Su ipanengkella kecapi tingikke mawawo nipile manga taumatan Lewi manansunna indi; i Matica, i Elifele, i Mikneya, i Azazya, wuṛṛu ruan katou mandariaga Wal᷊en Mawu, eteudde i Obed-Edom wuṛṛu i Yeiel.

²² I Kenanya nipile niapapiaṛṛa'u manga mananalangnga musikka wuassu ṛuanganni Lewi, ana waugu i tou pande mannalangnga musikka.

^23-24 I Berekhya wuṛṛu i Elkana susambau ringanni Obed-Edom wuṛṛu i Yehia nipile maola'a mandariaga Wantallu Pa'airen Mawu. Manga imam manansunna indi: i Sebanya, i Yosafat, i Netaneel, i Amasai, i Zakharia, i Benaya wuṛṛu i Eliezer nipile niapatiuppa trompeta su saruannu Wantallu Pa'aire udde.

Mangingkattu Wantallu Pa'airen Mawu watukku Yerusalem

²⁵ Ne i Ratu Daud inaite su sambau ringannu manga piaṛṛa'u Israel wuṛṛu manga tembonannu tantara watukku wal᷊en Obed-Edom inai mangal᷊appa Wantallu Pa'aire udde ringannu ramea apan bahewalla.

²⁶ Pitu sapi esakka wuṛṛu pitu domba nionggola su Ruata ana waugu i Tou buatte nantul᷊ungngu taumatan Lewi apan namasanna Wantallu Pa'aire udde.

²⁷ Sutempo udde i Daud ual᷊uṛṛen juba wuassu mal᷊aṛṛenessa linen al᷊ussa, aroddi lai manga mananal᷊angnga musikka wuṛṛu i Kenanya piaṛṛa'i mangitou see lai manga taumatan Lewi apan uapasanna Wantallu Pa'aire udde. I Daud ual᷊uṛṛe lai laubba Efod.

²⁸ Anambon taumatan Israel inaite tinumantalongnga Wantallu Paaire naddatingngu Yerusalem ringannu aintul᷊i lullala'a, tingikku trompeta, nafiri, simbal wuṛṛu kecapi.

²⁹ Sutempo Wantalla udde tantal᷊anna papasannananna sumutta sulal᷊ummu soa, i Mikhal sinangianni Saul nallinge wuassu jendela wuṛṛu naasilo si Ratu Daud tantal᷊anna massal᷊aingnga wuṛṛu lulluassa. Ne i Mikhal naapendamma mammuta ma'ellega si Daud.