1 TAWARIKH 14 - WUKE SUSI WATTI'U AL᷊AL᷊USASSA

Manga inolaanna apan mammanaranni Daud su Yerusalem

¹ I Ratu Hiram wuassu wanua Tirus nandolokku manga daroloṛanne inai ringanni Ratu Daud, see lai alu cemara wuassu Libanon wuṛṛu manga wasen kalu see lai taṛṛa meselle iapaola'a wal᷊en araratuanna.

² Ana waugu i Daud pia apendamma Mawu buatte nanenegi tou naola'a ratun Israel wuṛṛu nanohassa araratuanne apan hausannu al᷊aṛṛana'u Mawu.

³ Su Yerusalem i Daud nanganu lai manga pira awingnge, wuṛṛu naasomba manga ana'a lai.

⁴ Manga anangnge esakka apan niasungkanga su Yerusalem eteudde: i Syamua, i Sobab, i Natan, i Salomo,

⁵ i Yibhar, i Elisua, i Elpelet,

⁶ i Nogah, i Nefeg, i Yafia,

⁷ i Elisama, i Beelyada wuṛṛu i Elifelet.

Naauntungnga su walahannu Filistin

⁸ Napawe taumatan Filistin naaringikka manungku i Daud buatte nitenega naola'a ratu su ahewallu Israel, i mangitou nirumanta manametta si tou. Ana waugu udde i Daud sinumabbangnga mapapangalo ringanni mangitou.

⁹ Tantal᷊anna udde taumatan Filistin na'omate su Wawal᷊annu Refaim wuṛṛu nangaṛṛote wawal᷊anna udde.

¹⁰ Naaringikka udde i Daud naiwal᷊o Ruata, “Mawu, ṛinonewe i ya'u mamangalo manga taumatan Filistin udde? Apa Mawu sarun mangonggolu auntunganna si ya'u?” “Ore, pangaloite!” sasimbakku Mawu. “I Ya'u sarun mangonggolu auntunganna si'o!”

¹¹ Ne i Daud wuṛṛu tantarane namangalote taumatan Filistin udde su Baal-Perasim wuṛṛu namaddon mangitou. Nabbisarate i Daud, “I ya'u buatte nipaattu Ruata iapahohakku riahin seetta naal᷊ihidda manawangnga nanggohakku al᷊awo'u saranapa tumba'u tal᷊angkadio'a.” Ana waugu udde tampa udde nisago Baal-Perasim.

¹² Napawe tantaran Filistin tinumal᷊angke, i mangitou tawe napangapiddu manga paal᷊uanna sassubbanni mangitou. I Daud namarenta tadea'u manga paal᷊uanna udde tutunganna.

¹³ Tawe nal᷊annu wua'udde taumatan Filistin nirumanta wuṛṛu nangaṛṛo apia wawal᷊annu Refaim.

¹⁴ Paassa lai i Daud naddorongnga tatantiron Duata, ne Ruata sinumimbakka, “Imbaṛṛangnga mamangalo si mangitou wua isindi, arawe amatte pamal᷊iwutta wuṛṛu pamangalote si mangitou wuassu samba'a, maranin manga aal᷊uannu murbei.

¹⁵ Amungkangu i'o maaringikka ere lempangngu taumata mabbarissa su oto'u manga aaluanna udde, amatte, ana waugu i Ya'u sarun umamatta su saruannu mamaddon tantaran Filistin.”

¹⁶ I Daud tinumuṛṛutta parentan Duata si tou. I tou wuṛṛu tantarane namangalo tantaran Filistin nanattakka wuassu Gibeon naddatingngu Gezer.

¹⁷ Ne aranni Daud tinumelengke su al᷊awo'u tampa, ne Mawu na'ola'a anambon walahanna matta'utti Daud.