1 TAWARIKH 11 - WUKE SUSI WATTI'U AL᷊AL᷊USASSA

I Daud naola'a ratun Israel wuṛṛu Yehuda

¹ Anambon piaṛṛa'u walahannu Israel nirumanta ringanni Daud su Hebron wuṛṛu nabbisara, “Yami indi ta'e tuṛṛangngi Tuangnga.

² Ro'en dorone, ewe'e lai sutempo i Saul ta'e uaparenta si yami, ete i Tuangnga apan uapiaṛṛa'u tantaran Israel suapan i mangitou inai mapapangalo. Ana see lai Mawu Ruatan Tuangnga buatte naddiandi manungku ete i Tuangnga apan sarun mamiaṛṛa'u al᷊aṛṛang-Nge wuṛṛu maola'a ratun mangitou.”

³ Ne i Daud na'ire manga piaṛṛa'u Israel udde. Ana see i mangitou nanenegi Daud naola'a ratun Israel, ere buatte pina'ire Mawu si Samuel.

⁴ Su sambau allo i Ratu Daud ringannu anambon tantaran Israel inaite namangalo soa Yerusalem. Sutempo udde soa Yerusalem aranne Yebus, wuṛṛu atatanaannu taumatan Yebus, tumana'u soa udde tutune.

^5-7 Manga taumatan Yebus buatte nabbisara si Daud, manungku i tou tawe maasutta su soan mangitou udde. Arawe i Daud naapangaṛṛo tanda'u watun mangitou aranne Sion. Sutempo udde i Daud buatte namasingkatta mallal᷊aṛenggene manungku taumata paarorone apan naapate taumatan Yebus sarun maola'a tembonannu tantara. Ne ana waugu i Yoab apan paarorone namangalo taumatan Yebus, i tou nitenega maola'a tembonannu tantara. (Inangngi Yoab aranne Zeruya) Napawe naapangaṛṛote tanda'u watu Sion, i Daud natana'e isudde. Ana waugu udde nanattakkewe orassa udde tanda'u watu udde nisago “Soan Daud”.

⁸ I Daud na'ola'a apia soa udde nanattakka wuassu tampa apan niomboannu leta'a su samba'a ra'in wuidda; wua'udde manara pa'aola'a wal᷊en nisassuten Yoab na'oman sara nasue.

⁹ I Daud mallannu mattohassa, ana waugu Mawu Lembontaṛṛino nantul᷊ungngi tou.

Manga tantaran Daud apan tinumelengnga

¹⁰ Ete indi arannu manga piaṛṛa'u tantara apan tinumelengnga. Suadio'a ringannu anambon tumana'u Israel, i mangitou buatte nattinsahadda tadea'u i Daud maola'a ratu ere buatte nipa'iren Mawu. Wuṛṛu i mangitou sidutu massumbala araratuanne.

¹¹ Piaṛṛa'u tantara apan paarorone eteudde i Yasobam taumatan Hakhmoni, i tou piaṛṛa'u “Triwira”. Su paassa sulal᷊ummu sambau pangalo i tou nando'appa 300 su atoune wuṛṛu namate si mangitou ringannu wangkaone.

¹² Taumata aruane sulal᷊ummu Triwira eteudde i Eleazar ana'i Dodo wuassu ṛuanganni Ahohi.

^13-14 Sulal᷊ummu pangalo su Pas-Damim i tou uasamba'a si Daud nando'appa taumatan Filistin. Sutempo taumatan Israel mannattakke tuttal᷊angnga, i tou wuṛṛu tantarane natta'alla su pattangngannu sambau waillu ganduma wuṛṛu napapangalote taumatan Filistin udde. Ana see Mawu nangonggolu auntunganna apan bahewalla si tou.

^15-16 Su allo sambau siri 3 wuassu wallattu 30 piaṛṛa'u tantaran Daud apan awaṛṛanianne, inaite naisasomban Daud su sambau tampa apan pia tanda'a watune su sambau wowon batu maranin Liangngu Adulam. Sutempo udde taumatan Filistin naddasanna su wawal᷊annu Refaim wuṛṛu sangkammul᷊anna wuassi mangitou namanua su Betlehem.

¹⁷ I Daud naanaungke ampungnga niariadianne udde wuṛṛu nabbisara, “Eh, unnuwisara i ya'u niapa'inumma ua'e wuassu paṛṛihi maranin ngara pasallanganna su Betlehem.”

¹⁸ Naaringikka udde, siri tallu piaṛṛa'u tantara udde nilumiu paddasanannu taumatan Filistin ana see nanganute ua'en paṛṛihi udde, ana see niapidda si Daud. Arawe i Daud maddiri ma'inumma, ewe'e nilal᷊inna maola'a sambau sasamba su Mawu.

¹⁹ I tou nabbisara, “Ringannu arannu Ruata, i ya'u tawe mapa'inumma ua'e indi! Amungkangu i ya'u ma'inumma, i ya'u ere lai na'inumma daṛṛan manga taumata apan buatte nanantillu niawan mangitou!” Nariaddi i Daud mangke maddiri ma'inumma ua'e udde. Eteudde manga inasahaṛṛanni siri tallu tantara apan waṛṛani udde.

^20-21 Siri tallun pul᷊o tembonannu tantara apan tinumelengnga udde nisago lai “Tridasawira”. I mangitou uapiaṛṛa'a si Abisai tuarin Yoab. I tou buatte namate 300 su atoune taumata ringannu wangkaone, wuṛṛu ana waugu udde i tou lembon tinumelengnga. Arawe i tou tawe mappianne wuassu Triwira udde.

²² Sangkatou piaṛṛa'u tantara tinumelengnga waine eteudde i Benaya ana'i Yoyada, taumatan Kabzeel. I tou tumaniten waṛṛani. Ruan katou atumannaṛanne wuassu Moab buatte nipatene. Buatte nariaddi su sambau allo apan masunge i tou sinumutta sulal᷊ummu loṛṛangnga wuṛṛu namate singa isudde.

²³ I tou lai buatte namate sangkatou taumatan Mesir apan bahewalla wa'ikke; al᷊angkanne nilumebbe wuassu rua metere. Taumata udde ahidde sambeangnga apan masallakka, arawe i Benaya sinumaruanna tumba'u uaapiddu papuulla. Sambeangnga apan su liman taumatan Mesir niaṛṛo ana see nipaatta pinamate taumata udde.

²⁴ Eteudde apapian Benaya, sangkatou wuassu Tridasawira.

²⁵ Sulal᷊ummu ammul᷊anne udde, ete i Benaya apan atumannaṛanne, arawe i tou tawe mappianne wuassu Triwira. I Daud nanenegi tou naola'a tembonannu mandariaga si tou.

^26-47 Manansunna indi eteudde manga piaṛṛa'u tantara waine apan tinumelengnga: i Asael tuarin Yoab i Elhanan ana'i Dodo taumatan Betlehem i Samot taumatan Harod i Heles taumatan Peloni i Ira ana'i Ikes taumatan Tekoa i Abiezer taumatan Anatot i Sibkhai taumatan Husa i Ilai taumatan Ahohi i Maharai taumatan Netofa i Heled ana'i Baana taumatan Netofa i Itai ana'i Ribai taumatan Gibea su leta'u ṛuanganni Benyamin i Benaya taumatan Piraton i Hurai taumatan manga wawal᷊annu Gaas i Abiel taumatan Araba i Azmawet taumatan Bahurim i Elyahba taumatan Saalbon i Hasyem taumatan Gizon i Yonatan ana'i Sage taumatan Harari i Ahiam ana'i Sakhar taumatan Harari i Elifal ana'i Ur i Hefer taumatan Mekherati i Ahia taumatan Peloni i Hezrai taumatan Karmel i Naarai ana'i Ezbai i Yoel tuṛṛangngi Natan i Mibhar ana'i Hagri i Zelek taumatan Amon i Naharai taumatan Beerot, mangangapiddu lutangngi Yoab i Ira wuṛṛu Gareb taumatan Yetri i Uria taumatan Het i Zabad ana'i Ahlai i Adina ana'i Siza (sangkatou suwallattu matatimmade sulal᷊ummu walagi Ruben apan uatahuanna tantara 30 su atoune) i Hanan ana'i Maakha i Yosafat taumatan Mitni i Uzia taumatan Asytarot i Syama wuṛṛu i Yeiel, al᷊aṛṛana'i Hotam, taumatan Aroër i Yediael wuṛṛu i Yoha, al᷊aṛṛana'i Simri taumatan Tizi i Eliel taumatan Mahawim i Yeribai wuṛṛu i Yosawya, al᷊aṛṛana'i Elnaam i Yitma taumatan Moab i Eliel, i Obed wuṛṛu i Yaasiel taumatan Mezobaya.