1 TAWARIKH 10 - WUKE SUSI WATTI'U AL᷊AL᷊USASSA

Apapaten Ratu Saul

¹ Taumatan Filistin napapangalon taumatan Israel. I mangitou napapangalo su panenteannu Gilboa. Manambo taumatan Israel nate isudde, wuṛṛu nallambe nasutta lai i Ratu Saul wuṛṛu manga parinsine apan naatal᷊angngu watanganne.

² Arawe i mangitou tinuṛṛutannu taumatan Filistin wuṛṛu siri tallu suwallattu esakka ana'i Saul nipate, eteudde i Yonatan, i Abinadab, wuṛṛu i Malkisua.

³ Pangalo apan bahewalla ual᷊iwunna si Saul, ne i tou sassane naṛṛinoannu anaannu seetta na'oman sara nal᷊essa.

⁴ Ne i Saul nabbisara su umbasanna apan uaapiddu ahidde, “Sawutte hal᷊elenu wuṛṛu usu'e i ya'u tadea'u i ya'u tawe nalangannu taumatan Filistin apan tawe maaillal᷊a Mawu udde.” Arawe umbasanna udde maddiri mangusu'a si Saul ana waugu i tou matta'utta. Ana waugu udde i Saul nanganu hal᷊elene sassane wuṛṛu nilumallowangu watanganne su wowon hal᷊ele udde.

⁵ Napawe umbasanna udde naasilo manungku i Saul natete, i tou lai nilumallowangu watanganne su wowo hal᷊el᷊ene, ana see i tou lai natete.

⁶ Ne i Saul suadio'a ringannu parinsine siri tallu natete, wuṛṛu ringannu udde lai nuddusse araratuanne.

⁷ Napawe anambon taumatan Israel apan uatana'a su wawal᷊annu Yizreel naaringikka manungku tantaran Israel tinumal᷊angke, wuṛṛu naaringikka manungku i Saul see lai manga parinsine natete, i mangitou tinumal᷊angnga nanantangngu manga soan mangitou. Ana see taumatan Filistin natana'e su manga soa udde.

⁸ Tiṛṛabbine napawe taumatan Filistin nirumanta nangaṛṛo manga winal᷊unanna, i mangitou naasangkalla si Saul wuṛṛu siri tallu parinsine apan nate su panenteannu Gilboa.

⁹ I mangitou nalluatta laubbu pangalon Saul, wuṛṛu namonggo'a puane, ana see niapidda napul᷊e. Wua'udde i mangitou nandolokku daroloṛṛanna watukku ahewallu wanua Filistin iapapasingkattu watti'a mapia udde su walahanna wuṛṛu monganni mangitou.

¹⁰ Laubbu pangalon Saul udde sinahipunna sulal᷊ummu sambau wal᷊en patataṛṛamawuanna monganni mangitou, wuṛṛu puane niele sulal᷊ummu wal᷊en Dagon, monganni mangitou.

¹¹ Sutempo tumana'u Yabes su Gilead naaringikka inolaannu taumatan Filistin si Saul,

¹² manga taumata apan awaṛṛanianne suwallatti mangitou inaite nangal᷊appa winal᷊unanni Saul wuṛṛu manga parinsine, ana see niapidda watukku Yabes. I mangitou nallabbingi Saul su al᷊ungngu sambau alu masallakka, wua'udde i mangitou nappuasa pitu allo al᷊annune.

^13-14 I Saul nate ana waugu i tou tawe naddaringikka Mawu, wuṛṛu tawe tumuṛṛutta manga parenta-Ne. I tou tawe maddorongnga tatantiro wuassu Mawu ewe'e wuassu manga ghaṛṛahon taumata nate. Ana waugu udde Mawu nakkuumanni tou wuṛṛu nanantillu araratuane si Daud ana'i Isai.