1 SAMUEL 9 - WUKE SUSI WATTI'U AL᷊AL᷊USASSA

I Saul nassomban Samuel

¹ Pia sangkatou taumata ala wuṛṛu pia saṛṛaungnge wuassu ruanganni Benyamin, aranne i Kish. I tou amonanni Bekhorat, wuassu ṛuanganni Afiah. Iamangnge i Abiel wuṛṛu iupungnge wawine i Zeror.

² I Kish pia ana'a esakka, aranne i Saul, sangkatou umbasanna apan maṛṛamaga wuṛṛu matohassa. Tawe saran sangkatou taumata su ahewallu Israel apan mattohassanna wuassi tou. Pabbawa'ikke mal᷊angkassa; anamboanne atanggakku taumatan Israel tumba'u sara wambangnge.

³ Su allo sambau manga pira su waune keledai Kish nawul᷊i. Ana waugu udde i Kish nabbisara si Saul, “Pangapidde sangkatou wuassu allangnga indi, wuṛṛu rea'ete manga keledai udde.”

⁴ Ana see i Saul wuṛṛu allangnge mammal᷊intaddu panenteannu Efraim wuṛṛu leta'u Salisa, arawe tawe naasangkalla manga winatangnga udde. Wua'udde itarua niumamatte nasal᷊a watukku leta'u Sahalim, arawe manga keledai tawe lai isudde. Itarua naddea'a lai su wageangngu leta'i Benyamin, arawe tawe naasangkalla lai.

⁵ Napawe itarua na'omate su leta'u Zuf, i Saul nabbisara allangnge, “Wette iaddua mapul᷊ete, aṛṛengenne i papa sussinggawanga maṛṛingiddi addua wuassu manga keledai udde.”

⁶ Allangnga udde sinumimbakka, “Paasabbare asuene! Su soa indi pia sangkatou allangngu Ruata. I tou lembon a'adatannu taumata ana waugu anambon wisarane sidutu atonna-tonna mariaddi. Wette iaddua inaite ringanni tou, asinungka i tou wotongnge mamasingkatta suapa manga keledai udde.”

⁷ I Saul sinumimbakka, “Amungkangu iaddua inai maisasomban tou, apate sarun ionggolli addua si tou? Wal᷊unna apan uaapidda siaddua nasuete, wuṛṛu iaddua tateddu ionggolla su allangngu Ruata udde, wal᷊inewe aroddi?”

⁸ Allangnga udde sinumimbakka, “Ore, ya'u ta'e pia sambau roitta sal᷊a'a. Udde sarun ta'u ionggolla su allangngu Ruata tadea'u i tou mamasingkatta siaddua suapa manga keledai udde.”

^9-11 “Ore, aroddite!” sasimbakki Saul. “Wette iaddua inaite.” Ana see itarua inaite watukku soa, su tampan allangngu Ruata udde. Sutempo i mangitou sussaate wuidda mattudda soa udde, itarua nassomban siri pira maṛṛuala apan inai mania ua'e su paṛṛihi. Ana see itarua naiwal᷊o manga maṛṛuala udde, “i taṛṛa si'atta poi su soa?” (Tempo udde sangkatou nabi isassago taṛṛa si'atta, nariaddi amungkangu pia sangkatou ma'apulu maiwal᷊o Ruata, i tou mabbisara arendi, “Wette i ite inaite ringannu taṛṛa si'atta.”)

^12-13 “Ore, poi,” sasimbakku manga maṛṛuala udde, “wakku-wakku i tou niumamatta nalliu ṛoro siraddua. Wuṛṛu iraddua nal᷊ihakka, asinungka iraddua ma'aenggenna. I tou wakkute nirumanta su soa ana waugu allo indi su wowon mezbah su wuidda pia sasamba ionggolla su tumana'u soa. Manga taumata apan niwal᷊oanna tawe umanna amungkangu i tou taambe nirumanta, ana waugu i tou ṛinone mangal᷊amatta sasamba udde asuene. Amungkangu orassa indi iraddua inaite, iraddua sarun maaratingnga i tou tantal᷊anna taambe sinuma'a su wuidda umanna.”

¹⁴ Nariaddi i Saul wuṛṛu allangnge udde niumamatte watukku soa, ne sutempo itarua sinumuttate su ngara wahewalla, itarua nassomban Samuel apan tantal᷊anna u'amatta mattudda tampa patataṛṛamawuanna su wuidda.

¹⁵ Ne allo massallo nal᷊iu wua'udde Mawu nananata si Samuel arendi,

¹⁶ “Tiṛṛabbi marua'allo iraṛṛangngo orassa arendi lai, Ya'u sarun mandolokku sangkatou wuassu ruanganni Benyamin maisasombanu. Teneha'e i tou ringannu darohan pallal᷊ana tadea i tou maola'a ratun walahannu Israel. I tou sarun manal᷊amatta al᷊aṛṛana-U wuassu taumatan Filistin. I Ya'u naasilote asasusa al᷊aṛṛana-U wuṛṛu naaringikke lal᷊uai mangitou ma'iontolla.”

¹⁷ Napawe i Samuel naasilo si Saul, Mawu nabbisara si tou, “Eteindi taumata apan Ta'u niwal᷊o si'o. I tou sarun mamarenta al᷊aṛṛana-U.”

¹⁸ Tantal᷊anna udde i Saul mangngundani Samuel maranin ngara pasallanganna, wuṛṛu naiwal᷊o, “Ampungewe, Papa, suapa wal᷊en taṛṛa si'atta udde?”

¹⁹ I Samuel sinumimbakka, “Ete ya'u taṛṛa si'atta udde. Roote palliuṛṛoro watukku tampa patataṛṛamawuanna su wuidda, ana waugu allo indi iraddua sarun umanna suadio'a ringangku. Tiṛaṛabbi marua allo maṛṛanggappa aiwal᷊onu sarun ta'u simbaṛṛanna, wua'udde iraddua wotongngete mapul᷊e.

²⁰ Su ola'u manga keledainu apan nawul᷊i tallu allo nal᷊iu udde, arie passinggawanga, ana waugu niaobaante. Wuṛṛu lai saranapa apan ma'are'ganne su Israel sarun iongolla si'o wuṛṛu amonannu iamangngu.”

²¹ I Saul sinumimbakka, “I ya'u indi wuassu ruanganni Benyamin, ruanganna apan atul᷊unganne su Israel, wuṛṛu amonangku tawe mawal᷊i sulal᷊ummu ruanganna udde. Nariaddi anio i Papa nabbisara aroddi si ya'u?”

²² Wua'udde i Samuel nangahe si Saul wuṛṛu allangnge sinumutta sulal᷊ummu wabbo'a mal᷊oangnga, ana see i tou nangonggollu tampa apan apianne sitarua su saruannu manga taumata niwal᷊oanna apan reenganne iraṛṛangngo tallun pul᷊o su atoune.

²³ Ana see lai i Samuel nabbisara su mallal᷊aha anna, “Imbea'a inassa tanginna apan ta'u niapasahipunna si'o.”

²⁴ Wua'udde mallal᷊aha anna nanganu ṛemessu palangnge, ana see niimbe su saruanni Saul. I Samuel nabbisara, “Indi wageangngu apan buatte ta'u niṛṛae si'o, tadea'u i'o wotongnge umanna orassa indi suadio'a ringannu manga raho waine. Wette ante.” Ana see i Saul niumante. Nariaddi su allo udde i Saul niumanna suadio'a ringanni Samuel.

²⁵ Wua'udde i mangitou sinumossokke wuassu tampa patataṛṛamawuanna udde wuṛṛu sinumuttate su soa. I Saul niapaatiilla su pangkettu wal᷊en,

²⁶ ana see i tou natiille. Sutempo matannallo sumabbangke, i Samuel namago si Saul apan roso su pangketta, wisarane, “Apu'ote, wette i'o ta'u iuntudda mapul᷊e.” I Saul napu'o, ana see inaite suadio'a ringanni Samuel.

I Saul nitenegi Samuel naola'a ratu

²⁷ Napawe i mangitou na'omate su liuddu soa, i Samuel nabbisarate si Saul, “Allangnga udde doloṛṛa'e paṛṛoroa'e wuassi addua.” Ana see allangnga udde inaite, wuṛṛu i Samuel nabbisara apia, “Pangillol᷊ote isindi tal᷊angkadio'a, ya'u mamasingkattu tanatan Duata si'o.”