1 SAMUEL 8 - WUKE SUSI WATTI'U AL᷊AL᷊USASSA

Walahannu Israel naddorongnga sangkatou ratu

¹ Napawe i Samuel timmadete, i tou nanenegu manga anangnge naola'a mallaṛṛuungnga su Israel.

² Anangnge pahul᷊une aranne i Yoel wuṛṛu aruane i Abia. Itarua naola'a mallaṛṛuungnga su Bersyeba.

³ Arawe itarua tawe nangaṛṛussa pallal᷊aghu iamangngi tarua, arawe tumba'u maddea'a auntunganna sassane. Itarua mannengkamma roitta aonggola wuṛṛu mammarikissa tumanangnge ringannu tawe su atatul᷊idda.

⁴ Ana waugu udde anambon piaṛṛa'u Israel na'ammulla, ana see sinumaruanna si Samuel su Rama,

⁵ wuṛṛu nabbisara si tou, “Daringiṛṛewe Papa, i Papa timmadete wuṛṛu manga ana'i Papa tawe nangaṛṛussa pallal᷊aghu Papa. Nariaddi mappianne i Papa manenegu sangkatou ratu tadea'u yami pia ratu ere lai manga walahanna waine.”

⁶ Arawe i Samuel tawe mal᷊uassu darorongngi mangitou udde. Ana see i tou niumal᷊iomanna su Mawu,

⁷ wuṛṛu Mawu nabbisara, “Utungete anambon darorongngu walahannu udde si'o. Ana waugu wal᷊ine i'o apan ipaaddiri mangitou, ewe'e i Ya'u. I mangitou maddirite i Ya'u maola'a ratun mangitou.

⁸ Ro'en i Ya'u nangapiddi mangitou sinumabbangnga wuassu Mesir, i mangitou nanantang-Ku wuṛṛu massubbate manga monganna, wuṛṛu sarangkanambone apan orassa indi niola'i mangitou su saruannu udde lai niola'i mangitou su saruang-Ku.

⁹ Ana waugu udde utungete darorongngi mangitou, arawe i mangitou paanaunga'a ringannu atonna-tonna, wuṛṛu pasingkata'a ereapa i mangitou sarun parentannu sangkatou ratu.”

¹⁰ Anambon wisaran Mawu udde niapasingkatti Samuel su manga taumata apan maddorongnga sangkatou ratu si tou, wisarane,

¹¹ “Etearendi sal᷊immurine i yamiu sarun parentannu ratu,” etearoddi i Samuel mannal᷊a'a. “I tou sarun mamata'u manga anangngu maola'a tantara; sambageanganna wuassi mangitou maola'a tantaran kereta, sambageanganna lai maola'a tantara uasa'e awal᷊o, wuṛṛu waine lai tantara u'amattu ledda.

¹² Sambageanganna nipilene maola'a piaṛṛa'u saṛṛiwu su atoune, wuṛṛu ingana'a waine su lima ṛasutta su atoune. Ratu udde sarun mamata'u manga anangngu mammasolla wawil᷊anne, mangammullu hessin pangitinganna, mallanginnu manga lutangnga wuṛṛu manga aola'u keretan pangalone.

¹³ Manga anangngu wawine sarun iapamanara ma'ola'a lana mawangngi si tou wuṛṛu mammanara mallaha anna wuṛṛu rotine.

¹⁴ I tou sarun manganu wawail᷊annu, waillu anggore, wuṛṛu waillu zaitun apan apianne wuṛṛu ionggolli tou su mamanaran araratuanne.

¹⁵ Wawail᷊anna wuṛṛu waillu anggore sarun aṛṛiaannu wose sepeṛṛe mapul᷊o wuassu wuane, ana see sarun ionggolli tou su manga piaṛṛangnge, wuṛṛu su manga mamanaran araratuanne.

¹⁶ I tou sarun manganu allangngu, winatangngu apan apianne wuṛṛu keledaine apan ipaatta ipammanara manarane.

¹⁷ Sepeṛṛe mapul᷊o wuassu anambon ambingnga dombanu sarun anuanni tou. Wuṛṛu i yamiu lai sarun maola'a allangnge.

¹⁸ Napawe tempo udde nia'omante, i yamiu sarun sumasilla, ana waugu ratu apan nipilen kamiu udde, arawe Mawu maddiri maddaringikka sasal᷊iomannu udde.”

¹⁹ Arawe walahanna udde maddiri maddaringikka wisaran Samuel, ewe'e lai i mangitou nabbisara, “Wala'e! Salaiwe maola'a ereapa yami maapulun datu.

²⁰ Yami maapulu ere lai manga walahanna waine, ratun kami ṛinone mamarenta si yami wuṛṛu mamiaṛṛa'i yami sulal᷊ummu pangalo.”

²¹ Napawe i Samuel buatte naddaringikka wisaran mangitou udde, i tou namasingkatta Mawu.

²² Mawu sinumimbakka, “Walaite apulun mangitou.” Wua'udde i Samuel nandolokku manga taumatan Israel udde niapapul᷊e su wal᷊ene sambau-sambau.