1 SAMUEL 6 - WUKE SUSI WATTI'U AL᷊AL᷊USASSA

Wantallu Pa'aire niapawelengnga

¹ Napawe Wantallu Pa'airen Mawu uaraddo su Filistin pitu wul᷊anna al᷊annune,

² taumatan Filistin namago manga imam wuṛṛu manga taṛṛa wal᷊iimmata ana see naiwal᷊o, “Urante si ite Wantallu Pa'airen Mawu udde? Amungkangu iapawelengngi ite su tampane, ereapa lal᷊anne?”

³ Ana see i mangitou sinumimbakka, “Wantallu Paairen Mawu Ruatan Israel udde arie pabbelenga'i yamiu aroddi, arawe ṛinone i yamiu lai mangapiddu aonggolla ipanubbussa rosanu. Ringannu aroddi yamiu sarun iapaapia wuassu radda'a, wuṛṛu i yamiu sarun maasingkatta anio Mawu Ruatan Israel udde sidutu makkuumanni yamiu.”

⁴ “Aonggola apate apan ṛinone ionggolli ite si Tou?” aiwal᷊on manga taumata udde. Manga imam udde sinumimbbakka, “Lima su waune bau wul᷊awanna wuṛṛu lima su waune lai wal᷊awo wul᷊awanna, uasul᷊ungngu anambon reengannu ratun Filistin. Wal᷊inewe radda'a hanne buatte naṛṛia'a si yamiu sarangkanambone, mawae ete su tumanangnge aroddi lai su ratu?

⁵ Nariaddi, yamiu ṛinone mattanno ola'u manga hanne wuṛṛu su wal᷊awo apan masaddatta su wanuanu. Ringannu aroddi yamiu mangngaddatta Mawu Ruatan Israel. Asinungka i Tou tate makkuumanni yamiu, manga mongannu see lai manga letangngu.

⁶ Apa hunane i yamiu makkuumanni naal᷊ihidda; ratu wuṛṛu manga taumata Mesir dorone? Arie pa'abbul᷊iane ereapa Ruata nannalangnga si mangitou, na'oman sara i mangitou pia awawal᷊u wuṛṛu namalan mangitou nanantangngu Mesir.

⁷ Ana waugu udde saddiaite sambau roda wakku ringannu sapi darua apan ta'e sussusu, wuṛṛu taambe nipaatta niapawol᷊engnga roda. Pasea'e sapi darua su roda wuṛṛu ul᷊uhete manga ana'u sapi udde pawelenga'a sulal᷊ummu tatandangnge.

⁸ Wua'udde, al᷊appe Wantallu Paairen Mawu, lurana'e su roda, wuṛṛu niaddo su sandiṛṛanne tampan bul᷊awanna apan ṛinone ionggolli yamiu su Mawu maola'a tatubbussa rosanu. Roda wuṛṛu sapi udde niwalane u'amatta sassane.

⁹ Paatutuṛṛe lal᷊anne; amungkangu Wantallu Pa'aire udde niapidda watukku wanuane sassane, eteudde soa Bet-Semes, udde atappasanne manungku ete Ruatan taumatan Israel apan buatte nadantan asasilaka apan bahewalla indi si ite. Arawe amungkangu roda udde tawe mattuddan tampa udde, i ite sarun maasingkatta manungku asasilaka udde wal᷊ine wuassu Ruatan Israel, ewe'e etearoddi nariaddite.”

¹⁰ Manga taumata udde tinumuṛṛutta; i mangitou nanganu darua sapi apan ta'e mappasusu, ana see niapawol᷊engnga roda, arawe manga ana'u sapi udde nitaṛṛo sulal᷊ummu tanda'a.

¹¹ Ana see Wantallu Pa'aire udde nilurante su roda, wuṛṛu lai tampan bal᷊awo wul᷊awanna wuṛṛu lihiddu manga hanne udde.

¹² Manga sapi udde lapiddu niumamatta watukku Bet-Semes; winatangnga udde u'amatta lapiddu mammiṛṛonganna, tawe sinumewadda watukku aiṛṛi ara'e aikkatannu lal᷊anna wahewalla. Siri lima ratun Filistin udde sidutu uatantalongnga naddatingngu passarannu Bet-Semes.

¹³ Sutempo udde tumana'u Bet-Semes mangngitingnga gandumma su wawal᷊anne. Napawe i mangitou naasilo Wantallu Pa'aire udde, ringannu lulluassa i mangitou mannal᷊oho.

¹⁴ Roda udde natta'alla maranin sambau watu wahewalla su wailli Yosua, sangkatou tumana'u Bet-Semes. Tumana'u soa udde nama'a manga aola'u roda udde ana see naṛṛata sapi darua udde niola'a sasamba su Mawu.

¹⁵ Wua'udde manga taumatan Lewi nanossokku Wantallu Paairen Mawu wuassu tampane apan lal᷊oṛṛoannu wul᷊awanna udde, ana see niaddo su wowon batu wahewalla. Wua'udde tumana'u soa Bet-Semes nangonggollu sasamba itattambunna wuṛṛu manga sasamba waine su Mawu.

¹⁶ Sutempo siri lima ratun Filistin udde naasilo sarangkanambone udde, i mangitou napul᷊ete watukku Ekron su allo udde lai.

^17-18 Ringannu aroddi taumatan Filistin buatte nangonggolla su Mawu sasamba aampungnga rosan tumana'u lima soa apan paparentannu siri lima ratun Filistin. Manga soa udde eteudde; Asdod, Gaza, Askelon, Gat wuṛṛu Ekron. Suwallattu manga soa udde pia tanda'a watune, piaddu lai tawe. Suapan soa udde napaapiddu sangkangkumma wul᷊awanna wuṛṛu sambau wal᷊awo wul᷊awanna. Tatialan arariadianna udde eteudde watu wahewalla tampan mangitou nangaddon Wantallu Paairen Mawu. Naddatingngu allo indi watu udde ta'e su wailli Yosua taumatan Bet-Semes udde.

¹⁹ Arawe ana waugu taumatan Bet-Semes udde nangintanno sulal᷊ummu Wantallu Paairen Mawu, pitun pul᷊o su atoune suwallatti mangitou nipaten Mawu. Ana see tumana'u soa nilumal᷊o ana waugu Mawu nandanta si mangitou sambau asasilaka apan aroddi ahewalle.

Wantallu Paaire su Kiryat-Yearim

²⁰ Ana see tumana'u Bet-Semes nabbisara, “Isai wotongnge sumaruanna Mawu, Ruata Apan Susi udde? Watukkuapa ṛinone wantalla udde iuntudda, tadea'u marau wuassi ite?”

²¹ Ana see i mangitou nandolokku daroloṛṛanna inai ringannu tumana'u Kiryat-Yearim ringannu tanata indi, “Taumatan Filistin buatte napawelengngu Wantallu Pa'airen Mawu. Rantate wuṛṛu apira'e wantalla udde su soanu.”