1 SAMUEL 5 - WUKE SUSI WATTI'U AL᷊AL᷊USASSA

Wantallu Pa'aire su pattangngannu taumatan Filistin

¹ Napawe taumatan Filistin buatte nangaṛṛo Wantallu Pa'airen Duata, i mangitou nangapidda wuassu Eben-Haezer watukku soan mangitou Asdod.

² Isudde wantalla udde niapidda sinumutta sulal᷊ummu tampa patataṛṛamawuanna monganni mangitou, i Dagon, wuṛṛu niaddo su sandiṛṛannu pa'al᷊uannu monganna udde.

³ Sutempo tumana'u Asdod tiṛṛabbine marua allo rumanta sutampa patataṛṛamawuanna udde, i mangitou naasilo manungku paal᷊uanni Dagon nanawo uarammangnga su leta'a, su saruannu Wantallu Pa'airen Mawu! I mangitou namengketta pa'al᷊uanna udde wuṛṛu nisul᷊e apia su tampane.

⁴ Arawe tiṛṛabbine marua'allo, i mangitou naasilo apia manungku paal᷊uanna udde nanawote apia su saruannu Wantallu Pa'aire udde. Paassa indi puane wuṛṛu ta'iakke ruan ba'a naponggo'a wuṛṛu ete uaraddo su pappuannu ngara; tumba'u awa'u paal᷊uanna udde ta'e su lannangnge. (

⁵ Ana waugu udde, naddatingngu allo indi manga imammu mongannu Dagon wuṛṛu anambon masasubbane su Asdod lullempangnga su ngara sasuttanna su wal᷊en patataṛṛamawuanna si Dagon udde wuṛṛu tawe maṛṛinda.)

⁶ Wua'udde Mawu nakkuumannu tumana'u Asdod wuṛṛu wageangngu leta'a maranine ringannu manga hanne su waddangngi mangitou.

⁷ Napawe i mangitou naapendamma sarangkanambone apan nariaddite si mangitou udde, i mangitou nabbisara, “Ruatan Israel nakkuumanni ite wuṛṛu monganni ite i Dagon. I ite imbaṛṛangnga mamalan Wantallu Pa'aire-Ne uaraddo isindi mal᷊annu lai.”

⁸ Ana waugu udde i mangitou namaggo siri lima ratun Filistin tadea'u ma'ammulla, ana see maiwal᷊o, “Urante si ite Wantallu Paairen Mawu Ruatan Israel udde?” Manga ratu udde sinumimbakka, “Ingkata'e watukku soa Gat.” Nariaddi, wantalla udde niingkatte watukku soa Gat, sambau soan taumatan Filistin waine.

⁹ Arawe napawe wantalla udde na'omate isudde, Mawu nakkuumannu soa udde lai wuṛṛu nandantan atata'utta apan bahewalla. Tumana'u soa udde, mawae ete dario'a ara'e timmade niṛṛuumannu manga radda'a hanne apan tinumuwo su waddangngi mangitou.

¹⁰ Ana see Wantallu Pa'aire udde niuntudda watukku Ekron, soan Filistin waine lai. Napawe wantalla udde na'omate isudde, tumanangnge niumui, wisarane, “Wantallu Paairen Mawun Israel udde niapidda isindi tumba'u iapapate si ite sarangkanambone.”

¹¹ Ana waugu udde i mangitou namaggo anambon ratun Filistin tadea'u ma'ammulla, ana see nabbisara, “Welenga'e Wantallu Pa'airen Mawu Ruatan Israel udde sutampane paarorone tadea'u i ite wuṛṛu amonanni ite tawe mate.” Su ahewallu soa nariaddi atata'utta ana waugu Ruata nakkumannu tumanangnge ringannu radda'a apan tumaniten mawakkatta.

¹² Manga taumata apan tawe nate, sinapputannu radda'a hanne, na'oman sara tumana'u soa mangngintul᷊i su manga monganni mangitou, ma'iontolla.