1 SAMUEL 4 - WUKE SUSI WATTI'U AL᷊AL᷊USASSA

Wantallu Pa'aire niaaṛṛon taumatan Filistin

¹ Sutempo udde taumatan Filistin nangapiddu anambon tantarane inai mamangalo Israel; ana waugu udde tantaran Israel inaite watukku tampa papangaloanna; i mangitou naddasanna maranin Eben-Haezer, wuṛṛu tantaran Filistin naddasanna su Afek.

² Tantaran Filistin mannattakke mammangalo, wuṛṛu napawe uapapangalote ringannu ammahane, tantaran Israel niawaddo wuṛṛu iraṛṛangngo appatu ṛiwu su atoune nate sutampa papangaloanna udde.

³ Sutempo tantara lambene apan niawaddo udde nabelengke surasanna, manga piaṛṛa'u Israel nabbisara, “Anio Mawu namalan kite niawaddon taumatan Filistin su allo indi? Wette i ite mangal᷊appa Wantallu Paairen Mawu su Silo, wuṛṛu iapiddi ite isindi, tadea'u Mawu mangontolla si ite wuṛṛu manal᷊amatta si ite wuassu seetta.”

⁴ Ana see i mangitou nandolokku taumata inai watukku Silo iapaal᷊appa Wantalu Paairen Mawu apan naola'a aianannu Mawu Apan Lembontaṛṛino. Ruan katou ana'i Eli, i Hofni wuṛṛu i Pinehas, uatantalongnga Wantallu Pa'aire udde.

⁵ Napawe Wantallu Pa'aire na'omate su paddasananna, taumatan Israel hinumiote ringannu mangngintuli ma'ikkatta, na'oman sara apendamanna runia niumio'a.

⁶ Taumatan Filistin naaringikka lai tingikku hion lal᷊ala'a udde ana see i mangitou nabbisara, “Anio manga taumatan Ibrani udde huggio?” Arawe napawe i mangitou naasingkatta manungku Wantallu Pa'airen Mawu na'omate su paddasanannu Ibrani,

⁷ i mangitou nata'utta wuṛṛu nabbisara, “Pia monganna nirumanta su paddasananni mangitou! Nasilakate i ite! Taambe saran paassa i ite naapendamma olangnge ere indi!

⁸ Nasilakate atonna! Isai wotongnge manal᷊amatta si ite wuassu manga monganna apan matohassa udde? Wal᷊inewe manga monganna udde lai buatte namate taumatan Mesir su wadda'u anne dorone?

⁹ Paawaṛṛanite naungngu, ei taumatan Filistin! Pappapangalote manungku indi lai esakka, amungkangu tawe, i yamiu sarun maola'a allangngu manga taumatan Ibrani udde, ere lai i mangitou dorone naola'a allangngi yamiu. Ana waugu pappapangalote ringannu paatohassa wuṛṛu paawaṛṛani!”

¹⁰ Wua'udde napapangalote taumatan Filistin ringannu masaddatta wuṛṛu namaddon tantaran Israel. Taumatan Israel tinumal᷊angnga watukku rasanne sambau-sambau. Tumaniten bahewalla arugianna udde; 30.000 tantaran Israel nate.

¹¹ Wantallu Paairen Duata niaṛṛon seetta, wuṛṛu ruan katou ana'a; i Eli, i Hofni wuṛṛu i Pinehas, nate.

I Eli nate

¹² Sangkatou wuassu ruanganni Benyamin tinumal᷊angnga wuassu tampa papangaloanna watukku Silo, wuṛṛu na'omate isudde su allo udde lai. Naola'a tatialan lullal᷊o, i tou nanggesa'a laungnge wuṛṛu niaddo su leta'a ana see puane niandangannu leta'a.

¹³ I Eli, apan tumaniten sussinggawanga maṛṛingiddu Wantallu Paairen Mawu, tantal᷊anna ua'ianna su addera su wiwikku lal᷊anna, lapiddu uanannangnga. Napawe taumata udde namasingkattu watti'a manungku Israel niawaddo, anambon tumana'u soa nilumallu ringannu ma'ikkatta.

¹⁴ I Eli naaringikka tingikku lal᷊allu udde, ana see naiwal᷊o, “Hion suapa udde?” Tantal᷊anna udde taumata tanginna tuttal᷊angnga inai ringanni Eli; napawe na'omate, i tou namasingkattu watti'a lal᷊eo udde.

¹⁵ Uukki Eli sion pul᷊o ual᷊u su tonnane wuṛṛu i tou maraniten mawuta.

¹⁶ Taumata udde namasingkatta si Eli, “I ya'u tinumal᷊angnga allo indi wuassu tampa papangaloanna wuṛṛu wakute na'oma wua poiaroddi.” I Eli naiwal᷊o si tou, “Ereapa watti'a udde, ana'u?”

¹⁷ Mangangapiddu watti'a udde sinumimbakka, “Israel tinumal᷊angngu taumatan Filistin. I ite nawaddote wahewalla atonna. Manambo taumata nate, see lai ruang katou ana'i Papa, i Hofni wuṛṛu i Pinehas. Wuṛṛu Wantallu Paairen Duata niaaṛṛoten seetta!”

¹⁸ Sutempo taumata udde nabbatti'u Wantallu Pa'aire udde, i Eli nanawo uataro'o wuassu aiananne su samba'a ngaran pasallanganna. I tou tumaniten timmade wuṛṛu matawa na'oman sara sutempo i tou nanawo ullekkane napaddi, ne i tou natete. I tou buatte namiaṛṛa'u Israel appattu pul᷊o su tonnane al᷊annune.

Inawal᷊uanni Pinehas nate

¹⁹ Sutempo udde, mananambon Eli, eteudde awingngi Pinehas, tantal᷊anna pia illoṛṛo, wuṛṛu maraniten mangunsiwe. Sutempo i tou naaringikka manungku Wantallu Pa'airen Mawu niaaṛṛote, wuṛṛu manungku la'iananne see lai awingnge natete, inaṛṛombanganne i tou naapendamma taddu'u pangangunsiwe, ne tawe nal᷊annu i tou nangunsiwete.

²⁰ Napawe i tou maraniten mate, manga wawine apan nantul᷊ungngi tou nabbisara, “Paasabbare, Anangngu esakka!” Arawe i tou tawe sinumimbakka ara'e nanutudda si mangitou.

^21-22 Ana'a udde aranne nisaggo Ikabod, atappasanne, “Darantan Duata Apan Mawantuga nawul᷊ite wuassu Israel,” – pandumanne eteudde manungku Wantallu Pa'aire buatte niaṛṛon seetta wuṛṛu la'iananne see lai awingnge natete. Ana waugu udde i tou nabbisara, “Darantan Duata Apan Mawantuga nawul᷊ite wuassu Israel, ana waugu Wantallu Paairen Duata buatte niaṛṛon seetta.”