1 SAMUEL 31 - WUKE SUSI WATTI'U AL᷊AL᷊USASSA

I Saul wuṛṛu manga anangnge esakka nate

¹ Tantal᷊anna udde taumatan Filistin uapapangalote nando'appa taumatan Israel su panenteannu Gilboa. Manambo taumatan Israel nate isudde, wuṛṛu ingana'a waine nasutta i Saul wuṛṛu manga anangnge esakka tinumal᷊angngu watanganne.

² Arawe i mangitou tinantuṛṛutannu taumatan Filistin wuṛṛu siri tallu suwallattu ana'i Saul esakka udde nate niapate; eteudde i Yonatan, i Abinadab, wuṛṛu i Malkisua.

³ Pangalo apan bahewalla ual᷊iwunna si Saul, ne i tou sassane lai niaṛṛinoannu manga anaannu seetta na'oman sara nal᷊essa wahewalla.

⁴ Ana see i Saul nabbisara su ana'a esakka apan uaagassa ahidde, “Sawutte hal᷊elenu wuṛṛu usua'e si ya'u, tadea'u ya'u tawe nalanganna wuṛṛu pateannu manga taumata apan tawe maaillal᷊a Mawu.” Arawe ana'a esakka udde maddiri mangusu'a, ana waugu i tou tumaniten maaddata. Ana waugu udde i Saul nanganu hal᷊elene sassane wua'udde tinumattere su hal᷊ele apan maṛṛoro udde.

⁵ Napawe ana'a esakka udde naasilo manungku i Saul natete, i tou lai tinumattere su hal᷊elene apan maṛṛoro, ana su i tou natete lai su sandiṛṛanni Saul.

⁶ Etearoddi i Saul suadio'a ringannu anangnge esakka siri tallu, wuṛṛu anambon tantarane see lai ana'a esakka udde nate su allo sambau udde.

⁷ Sutempo manga taumatan Israel apan uatana'a su samba'an Wawal᷊annu Yizreel wuṛṛu samba'an ra'in Sal᷊ukku Yordan naaringikka manungku tantaran Israel tinumal᷊angke, wuṛṛu manungku i Saul wuṛṛu manga anangnge esakka natete, i mangitou tinumal᷊angnga nanantangngu manga soa mangitou. Wua'udde taumatan Filistin namanuate su manga soa udde.

⁸ Tiṛṛabbine napawe taumatan Filistin nirumanta mangaṛṛo manga winal᷊unanna, i mangitou naasangkalla si Saul wuṛṛu siri tallu anangnge esakka natete su panenteannu Gilboa.

⁹ I mangitou naṛṛasi'u puan Saul wuṛṛu nanganu laubbu pangalone, ana see taumatan Filistin nandolokku daroloṛṛanna inaite watukku wanua Filistin iapapasingkattu watti'a mapia udde su tumana'u soa wuṛṛu monganni mangitou.

¹⁰ Wua'udde laubbu pangalon Saul sinahipunna su wal᷊en monganna Asytoret, wuṛṛu awangnge nipa'u su darandungngu soa Bet-Sean.

¹¹ Arawe tumana'u Yabesh su Gilead naaringikka inolaanna apan buatte niola'u taumatan Filistin si Saul,

¹² ne manga taumata apan awaṛṛanianne inaite wua isudde wuṛṛu niumamatte su al᷊o'engngu ṛabbi watukku Bet-Sean. I mangitou nanossokku winal᷊unanni Saul wuṛṛu winal᷊unannu manga anangnge esakka wuassu darandungngu soa udde ana see niapidde watukku Yabesh, wua'udde nitutungnga.

¹³ Anambon manga duṛṛine niammulla ana see nilabbinga su al᷊ungngu alu tamariska su soa udde, wua'udde i mangitou nappuasate pitu allo al᷊annune.