1 SAMUEL 3 - WUKE SUSI WATTI'U AL᷊AL᷊USASSA

Mawu nattingkapasilo batangan-Ne si Samuel

¹ Tantal᷊anna udde, i Samuel apan ta'e dario'a udde mangngimbe Mawu su al᷊ungngu lu'addi Eli. Sutempo udde mal᷊awa atonna pia tanata wuṛṛu sondappa wuassu Mawu.

² Su ṛabbi sambau, i Eli apan timmadete wuṛṛu maraniten mawuta udde, tantal᷊anna mattiilla su wabbo'ane,

³ wuṛṛu i Samuel mattiilla maranin Wantallu Paairen Mawu, sulal᷊ummu Rasanna Susi. Sutempo matannallo taambe nilumapputta wuṛṛu sol᷊o ta'e lukkenggamma,

⁴ Mawu namago si Samuel, ana see i Samuel sinumimbakka, “I ya'u, Papa!”

⁵ Wua'udde i tou tinumal᷊angnga na'ellega si Eli wuṛṛu nabbisara, “Pia apa Papa? Anio ya'u waggoanna?” Arawe i Eli sinumimbakka, “I ya'u tawe namago si'o, atiille apia.” Ana see i Samuel inaite nabelengnga natiilla apia.

^6-7 Wua'udde Mawu namago apia si Samuel, arawe i Samuel wagga manungku namago si tou udde ewe'e Mawu, ana waugu taambe saran paassa Mawu naggahatton Samuel. Ana waugu udde i tou napu'ote, ana see na'ellega si Eli wuṛṛu naiwal᷊o, “Papa, pia apa? Anio i Papa namago?” I Eli sinumimbakka, “I ya'u tawe namago si'o, ana'u; pabbelengke atiille apia.”

⁸ Su atallune Mawu namago apia si Samuel, ana see i Samuel napu'ote wuṛṛu inaite ringanni Eli lapiddu nabbisara, “Pia apa Papa? Anio i Papa mammago?” Su orassa udde i Eli naatutukke manungku mammago ana'a uddewe Mawu.

⁹ Ana waugu udde i tou nabbisara si Samuel, “Atiille apia, wuṛṛu amungkangu i'o wagoanna apia simbakke arendi, ‘Pabbisarate, Mawu, allang-Ngu uararingikka.’ ” Ana see i Samuel inaite su tampa natatiil᷊anne apia.

¹⁰ Wua'udde Mawu nirumantate, wuṛṛu dirumarisikka sutampa udde lapiddu namago apia, “Samuel, Samuel!” Ne i Samuel sinumimbakka, “Pabbisarate, Mawu, allang-Ngu uararingikka.”

¹¹ Ana see Mawu nabbisarate si tou, “I Ya'u sarun mandantan sambau inolaanna apan bahewalla su taumatan Israel, na'oman sara suapan taumata apan maaringikka sarun ial᷊iwune.

¹² Su allo udde i Ya'u sarun mandantan al᷊awo'a apan buatte Ta'u nipasingkatta su amonanni Eli wuassu panattaṛṛanne maddatingngu panguddusanne.

¹³ I Ya'u buatte namasingkatta si tou manungku amonanne sarun Ta'u iṛṛuumanna saran mal᷊annu-l᷊annu ana waugu al᷊aṛṛanangnge buatte nallobbossa si Ya'u. I Eli masingkattu manga rosan mangitou udde, arawe i mangitou tawe niwol᷊oanni Eli.

¹⁴ Ana waugu udde i Ya'u nassalu su ola'u amonanni Eli, manungku rosan mangitou apan tumaniten bahewalla udde tawe iapappassu sasamba ara'e al᷊awo'u aonggolla saran mal᷊annu-l᷊annu.”

¹⁵ Wua'udde i Samuel natiille apia, ne napawe marua'allone i tou napu'ote wuṛṛu namu'a manga ngaran Wal᷊en Mawu. I tou matta'utta mamasingkattu sondappa udde si Eli,

¹⁶ arawe i Eli namago si tou, wisarane, “I Samuel, Samuel, ana'u.” I Samuel sinumimbakka, “I ya'u, Papa.”

¹⁷ Eli naiwal᷊o, “Apate niapasingkattu Mawu si'o? Wattia'e sarangkanambone udde si ya'u. Amungkangu pia sambau hatto apan iaadappingngu, i'o sarun iṛṛuumannu Ruata.”

¹⁸ Ana see i Samuel namasingkattu sarangkanambone udde si Eli. Tawe saran sambau apan niadappingnge. Wua'udde nabbisarate i Eli, “I Tou Mawu, walate i Tou ma'ola'a tumuṛṛuttu apulu-Ne udde mapia.”

¹⁹ I Samuel a'atambanna ahewalle. Mawu uarundinganna si tou wuṛṛu na'ola'a anambon wisaran Samuel udde atonna matipussa.

^20-21 Ana waugu udde anambon walahannu Israel wuassu ahewallu wanua udde mangnga'u manungku i Samuel udde nabi Mawu. Suapan i Samuel mabbisara, anambon walahannu Israel uararingikka. Mawu sidutu maipasilon batangan-Ne su Silo, suapa i Tou su paarorone naipasilon batangan-Ne si Samuel wuṛṛu naggahatton tou.