1 SAMUEL 29 - WUKE SUSI WATTI'U AL᷊AL᷊USASSA

I Daud nipaapul᷊en taumatan Filistin

¹ Taumatan Filistin nangammulu anambon tantarane su Afek, ewe'e taumatan Israel naddasanna maranin al᷊imatan kua'e su Wawal᷊annu Yizreel.

² Siri lima ratun Filistin niumamatta uawarissa ringannu ammul᷊annu tantarane apan sambau-sambau anambone maṛṛasutta wuṛṛu saṛṛiwu su atoune; i Daud wuṛṛu tantarane uawarissa su liudde suadio'a ringanni Ratu Akhis.

³ Manga tembonannu taumatan Filistin naasilo si mangitou nabbisara, “Manga taumatan Ibrani indi ipa'ura isindi?” I Akhis sinumimbakka, “Indi i Daud, dorone i tou mammamanaran Datu Saul wuassu Israel. I tou mal᷊annute uatana'a ringangku. Ro'en i tou nirumanta ringangku, naddatingngu allo indi, ya'u tawe naasomba pasasal᷊ane.”

⁴ Arawe tembonannu tantaran Filistin nasa'u si Akhis wuṛṛu nabbisara si tou, “Taumata udde doloṛṛa'a paapul᷊ea'a su soa apan buatte nionggollu si tou. I tou tawe wotongnge mapapangalo suadio'a ringanni ite; aṛṛengenne i tou mabbaha si ite sulal᷊ummu pangalo. Wal᷊inewe indi tempo apan apianne si tou manganu naungngu ratune ringannu mamate tantaran kite?

⁵ Ete i tou Daud? Ete si tou dorone manga wawine massal᷊aingnga lapiddu mangngantari arendi, ‘i Saul buatte namate seetta su ṛiwune, arawe i Daud su pul᷊o ṛiwune.’ ”

⁶ Ana see i Akhis namaggo si Daud wuṛṛu nabbisara si tou, “I ya'u mangngimanna sulal᷊ummu arannu Mawu apan biakka, manungku i'o matuṛṛutta si ya'u. I ya'u mal᷊uassa amungkangu i'o uaringanna si ya'u sulal᷊ummu pangalo indi. Ana waugu ro'en i'o nirumanta ringangku na'oman sara orassa indi, ya'u tawe naasomba pasasal᷊anu. Arawe manga ratu waine udde maddirinu.

⁷ Ana waugu udde apul᷊ete ringannu sal᷊amatta, wuṛṛu imbaṛṛangnga ma'ola'a sambau inolaanna apan ma'asa'u naungngi mangitou.”

⁸ I Daud sinumimbakka, “Pasasal᷊a apa apan buatte niola'u allangngu, Tuangnga? Amungkangu su wisaran Tuangnga, manungku i Tuangnga tawe naasomba pasasal᷊a'u ro'en allangngu nanattakka nangimbe si Tuangnga naddatingngu orassa indi, anio allangngu tawe iwala mapapangalo lumawangnga seetti Tuangnga?”

⁹ Akhis sinumimbakka, “I'o masingkatta manungku ya'u uaantimma si'o matuṛṛutta ere mala'ekattu Ruata. Arawe manga tembonannu tantara udde buatte nakkawessa manungku i'o tawe wotongnge mapapangalo suadio'a ringanni yami.

¹⁰ Ana waugu udde Daud, tiṛṛabbi yamiu sarangkanambone apan buatte nanantangngi Saul wuṛṛu nirumanta ringangku, ṛinone mabbanemna maṛṛanggappa wuṛṛu inaite amatta napawe matannallo sinumabbangnga.”

¹¹ Ana waugu udde tiṛṛabbine maṛṛanggappa, i Daud wuṛṛu tantarane inaite napul᷊e watukku wanua Filistin, arawe tantaran Filistin udde inaite watukku Yizreel.