1 SAMUEL 28 - WUKE SUSI WATTI'U AL᷊AL᷊USASSA

¹ Manga pira tempo wua'udde taumatan Filistin nangapiddu tantarane inai mamangalo Israel, ne i Akhis nabbisara si Daud, “Asinungka i'o ma'asunna manungku i'o wuṛṛu tantaranu ṛinone manamba'a si ya'u.”

² I Daud sinumimbakka, “Ore, i Tuangnga sarun maasilo sassane sarangkanambone apan a'olaannu allangngu si Tuangnga.” Ana see i Akhis nabbisara, “Ore, aroddite, I'o sarun ta'u itenega maola'a mandariaga'u sidutu.”

I Saul naddorongnga tatal᷊a'a wuassu mangangundamma taṛṛa waggo ṛimuudda

³ I Samuel natete wuṛṛu i tou niluaiannu anambon taumatan Israel see nilabbinga su Rama, soane sassane. Manga pira tempo nal᷊iu i Saul buatte nallimbuakka manga taṛṛa si'atta wuṛṛu mangangundamma mammago ṛimuudda.

⁴ Ne napawe tantaran Filistin uaammulle wuṛṛu naddasanna maranin Soan Sunem, i Saul nangammullu lai taumatan Israel, ne i mangitou naddasante su Wowon Gilboa.

⁵ Napawe i Saul naasilo tantaran Filistin udde, i tou mangke matta'utta.

⁶ Ana see i tou naddorongke tatantiro su Mawu, arawe Mawu tawe sinumimbakka, mawae ete su wal᷊iawa ara'e lai mappaattu Urim wuṛṛu Tumim ara'e lai iwal᷊on manga nabi.

⁷ Ana waugu udde i Saul nabbisara su manga mammamanarane, “Paddea'e sangkatou mangangundamma wawine taṛṛa waggo ṛimuudda, ya'u sarun inai ringanni tou maddorongnga tatantiro.” I mangitou sinumimbakka, “Su En-Dor pia mangangundamma ereudde.”

⁸ Ana see i Saul namal᷊ute hati tadea'u tawe aillal᷊annu taumata. Ringannu tatantalongannu ruan katou esakka, i tou inaite wuṛṛu na'omate su wal᷊en mangangundamma udde ṛabbite. Ne unni Saul, “Waggoite ṛimuuddu taumata apan ta'u isaggo aranne, wuṛṛu dorongete tadea'u i tou mani'attu apa apan sarun mariaddi.”

⁹ Wawine udde sinumimbakka, “Tuangnga lai masingkatte manungku i Ratu Saul buatte nallimbuakka anambon taṛṛa si'atta wuṛṛu mangangundamma taṛṛa waggo ṛimuudda, wuassu Israel. Anio i Tuangnga manilaka si ya'u ma'oman sara ya'u pateanna?”

¹⁰ Ana see i Saul nassalu, wisarane, “Sulal᷊ummu arannu Mawu apan biakka, ya'u maddiandi manungku i'o tawe iṛṛuumangku ana waugu na'ola'a inolaanna indi.”

¹¹ Wawine udde naiwal᷊o, “Ṛimuuddi sai apan ta'u waggoanna iaparanta si Tuangnga?” I Saul sinumimbakka, “Ṛimuuddi Samuel.”

¹² Napawe wawine udde naasilo si Samuel, i tou nangintul᷊i wuṛṛu nabbisara si Saul, “Anio i Tuangnga namahia allangngu? i Tuangnga al᷊imangke i Ratu Saul!”

¹³ I Ratu sinumimbakka, “Arie paata'utta! Pasingkata'e apa apan niasiloannu!” Wawine udde sinumimbakka, “Allangngu naasilo ghaṛaho nilumapputta wuassu runia.”

¹⁴ I Saul naiwal᷊o, “Ereapa hatine?” Sasimbakke, “Sangkatou esakka apan timmaddete. I tou sinumabbangnga ual᷊uṛṛen juba.” Ana see i Saul naasingkatte manungku eteudde i Samuel, ne i tou lapiddu niumal᷊intudda wuṛṛu nangaddatta.

¹⁵ Wua'udde i Samuel nabbisara si Saul, “Anio i'o nanal᷊asa'u? Anio i'o namaggo si ya'u apia?” I Saul sinumimbakka, “I ya'u nial᷊iwunete ana waugu nipangaloannu taumatan Filistin, see lai Mawu nanantangkute. I ya'u tate lai sinimbaṛṛan-Ne, mawae ete wuassu manga nabi, ara'e lai ringannu wal᷊iawa. Ana waugu udde ya'u sumal᷊ande si Papa, tadea'u i Papa mamasingkatta manara apan sarun ta'u olaanna.”

¹⁶ Ana see i Samuel nabbisara, “Apa hunane ya'u niwagoannu see Mawu buatte nanantangngu wuṛṛu naola'a seennu?

¹⁷ Mawu buatte na'ola'a si'o ere buatte niwal᷊o-Ne si ya'u. Mawu buatte nangul᷊e araratuannu Israel wuassi'o wuṛṛu nionggolla si Daud.

¹⁸ I'o buatte nilumawangnga parentan Mawu wuṛṛu maddiri mamate taumatan Amalek see lai anambon pussa'an mangitou. Ana waugu udde orassa indi i'o niola'u Mawu arendi olangnge.

¹⁹ I'o wuṛṛu manga taumatan Israel sarun itantillu Mawu su taumatan Filistin. Tiṛṛabbi i'o wuṛṛu manga anangngu esakka sarun maammulla ringangku; ewe'e lai anambon tantaran Israel sarun itantillu Mawu su taumatan Filistin.”

²⁰ Orassa udde lai i Saul naṛṛa'a su leta'a naal᷊ihidda nisamettu sawallo, ana waugu i tou tumaniten niṛṛumoro naaringikka manga wisaran Samuel udde. Ana see i tou nallomete atonna, ana waugu tawe niumanna sarangkadio'a masallo saṛṛabbi.

²¹ Mangangundamma udde nangundanin Saul wuṛṛu naasilo manungku i tou tumaniten nial᷊iwune; ana see wawine udde nabbisara si tou, “Tuangku, allangngu buatte nattinsahadda nangutungngu darorongngi Tuangnga.

²² Nariaddi, ṛinone lai i Tuangnga mangutungngu darorongngu allangngu; ante addio'a anna apan nisarun allangngu, tadea'u i Tuangnga wotongnge mapanassukku amatanni Tuangnga.”

²³ I Saul nanal᷊a'a wuṛṛu nabbisara manungku i tou maddiri umanna. Arawe napawe mammamanarane lai mangke mammata'a, i tou niumante. I tou nabbuatta wuassu leta'a niumanna su pal᷊assa.

²⁴ Ringannu mal᷊ihakka wawine udde namate ana'u sapi apan matawa wuṛṛu nanganu taponna see niṛṛamissa, wua'udde niolangnge roti apan tawe ragine.

²⁵ Ana see anna udde nisaru si Saul wuṛṛu manga mammamanarane, ana see i mangitou niumante. Wua'udde i mangitou napul᷊ete su ṛabbi udde lai.