1 SAMUEL 26 - WUKE SUSI WATTI'U AL᷊AL᷊USASSA

I Daud nanol᷊a'a apia mamate si Saul

¹ Su allo sambau manga taumata wuassu Zif nirumanta ringanni Saul su Gibea wuṛṛu namasingkatta si tou manungku i Daud uaimbuni su Wowon Hakhila su winggin wadda'u Yehuda.

² Ne ringannu mal᷊ihakka i Saul inaite tatantalongannu tallu ṛiwu su atoune tantara apan apianne su Israel, mattuddan wadda'u Zif maddea'a si Daud.

³ I Saul naddasanna su winggin dal᷊anna maranin Wowon Hakhila udde. I Daud apan uaimbuni su wadda'a, naaringikka manungku i Saul uatantuṛṛutta si tou na'oman sara wadda'a.

⁴ Ana see i tou nandolokku matataṛṛaso'o, ne i tou naasingkatte ringannu atonna manungku i Saul isudde lai.

⁵ Ringannu mal᷊ihakka i Daud inaite watukku paddasananni Saul, wuṛṛu isudde niaratinganna su rasanna i Saul mattiilla maranin Abner ana'i Ner. Rasanni Saul udde su pattangnganne, wuṛṛu tantarane naddasanna uapal᷊iwutta si tou.

⁶ Wua'udde i Daud naiwal᷊o si Ahimelekh taumatan Het udde, wuṛṛu si Abisai tuṛṛangngi Yoab (Inangngi tarua i Zeruya), “Isai waṛṛani sumutta suadio'a ringangku sulal᷊ummu paddasananni Saul?” i Abisai sinumimbakka, “I ya'u!”

⁷ Ne su ṛabbi udde i Daud wuṛṛu i Abisai nangunsalle'a su paddasananna udde wuṛṛu naasilo si Saul tantal᷊anna mattilla su tangngan paddasananna, sambeangnga uapasi'a su leta'a maranin puane. I Abner wuṛṛu tantarane mattilla uapal᷊iwutta si Saul.

⁸ Ana see i Abisai nabbisara si Daud, “Ruata buatte nanantillu seetta si'o su ṛabbi indi. Wala'awe ya'u mamansakku sambeangngi tou sassane su waddangnge iapal᷊appassa sara leta'a, ta'u pateanna i tou ringannu paassa mamanta'a, tawe ma'oman sara paarua!”

⁹ Arawe i Daud nabbisara, “Arie pa'indinge i tou! Mawu sarun makkuumannu taumata apan inolaanne lal᷊eo su ratu apan nipile-Ne.

¹⁰ Sulal᷊ummu arannu Mawu apan biakka, ya'u masingkatta manungku Mawu sassane apan sarun mamate si Saul, napawe papatene nia'omante, ara'e i tou mate sulal᷊ummu pangalo.

¹¹ Doronganna Mawu mamo'a si ya'u tadea'u tawe mamate ratu apan nipile-Ne! Anute sambeangnge wuṛṛu tampan ua'ene, ana see i ite inaite!”

¹² Ne i Daud nanganute sambeangnga wuṛṛu tampan ua'en Saul, wua'udde niumamatte. Tawe saran sangkatou apan naasilo olangnge udde ara'e naasingkatta sarangkanambone apan buatte nariaddi, ara'e napu'o, ana waugu Mawu buatte na'ola'a si mangitou sarangkanambone niamatiil᷊anna ringannu mal᷊angnga.

¹³ Ana see i Daud nilumewesse si wiwikku wawal᷊anne waine naddatingngu puiddu wowone, na'oman sara i tou maraute wuassu paddasananni Saul.

¹⁴ Wua'udde i Daud niumuite si Abner wuṛṛu tantaran Saul wisarane, “Abner! I'o ma'aringikkawe tingi'u?” I Abner nangintul᷊i lai, “Isai i'o apan uui udde?”

¹⁵ I Daud sinumimbakka, “Abner, wal᷊inewe i'o taumata apan apandeanne su Israel? Anio i'o tawe naariaga mawunu, tuanga ratu? Wakku-wakku pia taumata sinumutta su paddasanannu mamate si mawunu.

¹⁶ I'o tawe maapasanna mappaamattu manaranu, Abner! Sulal᷊ummu arannu Mawu apan biakka, i yamiu sarangkanambone ṛinone mate, ana waugu tawe naariaga mawunu, ratu apan nipile Mawu. Ellehete suapate sambeangngu ratu? Suapa tampan ua'e apan tanginna uaraddo su samba'an puane?”

¹⁷ I Saul naaillal᷊a tingikki Daud wuṛṛu naiwal᷊o, “Daud, eteudde i'o Ana'u?” I Daud sinumimbakka, “Ore, Tua.”

¹⁸ Ana see wisarane lai, “Anio i Tuangnga ta'e lai mangngenggenna allangngu? Apate pasasal᷊an allangngu?

¹⁹ Tuangnga paddaringikke sasubban allangngu indi. Unnu wisara Mawu buatte nandolokki Tuangnga niaparo'appa allangngu, udde maola'a sambau sasamba apan botongnge mapaasungen asasa'un Mawu su saruannu allangnge. Arawe unnu wisara apan nirolokki Tuangnga udde taumata, doronganna i mangitou wontohannu Mawu. Ana waugu wuassu inolaanni mangitou, allangngu buatte nilimbuaṛṛanna wuassu leta'a pussa'an Mawu wuṛṛu ringannu mawakkatta allangngu inaite su wanua waine suapa allangngu ṛinone mattaṛṛamawu monganna apan ta'e awagananna.

²⁰ Arie pabbala'a allangngu mate su leta'a awagananna, marau wuassu Mawu. Apa hunane ratun Israel rumanta tuddane mamate sambau utu ere allangngu indi? Apa hunane i tou mattaṛṛiasu allangnge ere sangkatou matataṛṛiasu manu'u winalanganna?”

²¹ Ana see i Saul sinumimbakka, “I ya'u buatte na'ola'a pasasal᷊a. Pabbelengke Daud, Ana'u! I ya'u tate ma'ola'a al᷊al᷊eo apia si'o ana waugu i'o buatte namala'u wiakka masaṛṛabbi. Pallal᷊agu'u tumaniten longonna. I ya'u atonna-tonna nial᷊iwunete!”

²² Arawe i Daud sinumimbakka, “Indete sambeangngi Tuangnga, doloṛṛa'e sangkatou tantaran Tuangnga inawarendi paal᷊apa'a.

²³ Mawu sarun mangal᷊amatta suapan taumata apan satia wuṛṛu matul᷊idda. Ana waugu salaiwe su allo indi Mawu nanantilli Tuangku su allangngu, arawe allangngu maddiri ma'ola'a al᷊al᷊eo su saruanni Tuangnga, ratu nipilen Mawu.

²⁴ Nariaddi, ere lai i Tuangnga namalan allangngu wiakka su allo indi, aroddi lai antimanna allangngu lal᷊u'arannu Mawu wuṛṛu iapal᷊iu wuassu anambon asasilaka!”

²⁵ Ana see i Saul nabbisarate si Daud, “Mawu mangal᷊amatta si'o, Ana'u! I'o sarun maauntungnga wuṛṛu masomakka su al᷊awo'u manaranu!” Ana see i Daud nanassukku amatanne, wuṛṛu i Saul napul᷊ete watukku wal᷊ene.