1 SAMUEL 25 - WUKE SUSI WATTI'U AL᷊AL᷊USASSA

I Samuel nate

¹ Tawe nal᷊annu wua'udde i Samuel natete. Anambon taumatan Israel naammulla mappaamattu darahan lullal᷊o. Wua'udde i tou nilabbingnga su wal᷊ene su Rama. Wua'udde i Daud inaite watukku wadda'u Paran.

I Daud wuṛṛu i Abigail

^2-3 Su soan Maon pia sangkatou esakka wuassu amonanni Kaleb, aranne i Nabal. I tou pia leta'a pappadul᷊iananna winatangnga maranin soan Karmel. I tou tumaniten ala wuṛṛu uatahuanna 3.000 domba wuṛṛu 1.000 ambingnga. I Abigail awingnge, pande wuṛṛu maṛṛamaga, arawe pallal᷊aghun Nabal maṛṛagissa wuṛṛu lal᷊eo. Su allo sambau i Nabal tantal᷊anna mammol᷊o wambul᷊un dombane su Karmel.

⁴ Napawe i Daud apan orassa udde lai su wadda'a, naaringikka olangnge udde,

⁵ i tou nandolokku siri mapul᷊o umbasanna inai watukku Karmel,

⁶ niaparanta ringanni Nabal niapawal᷊on tabean Daud si tou, “Wuṛṛu amonannu see lai anambon darotongngu.

⁷ I ya'u naaringikka manungku i'o tantal᷊anna mammol᷊o wambul᷊un dombanu. Ṛinone i'o masingkatta manungku manga mallal᷊u'addu apan uatana'a su wageangngu leta'i yami, tawe saran paassa i mangitou asal᷊asaanni yami, wuṛṛu lai taambe saran paassa i mangitou niawul᷊iannu saranapa su al᷊annune i mangitou uatana'a su Karmel.

⁸ Iwal᷊oi'o si mangitou, i mangitou sarun sumimbakka ringannu atonna hatto udde. Ana waugu udde, ya'u mangantimma tadea'u tantara'u sal᷊ohoanna ringannu mapia su wal᷊enu, ana waugu yami rumanta su allo wahewalla indi. Onggol᷊a'a lai su manga allangngu indi wuṛṛu lai si ya'u, i Daud, hawenu apan mapia, manga apa tumuṛṛuttu apulunu.”

⁹ Napawe na'omate su Karmel, tantaran Daud namasingkattu tanatan Daud udde si Nabal, ana see i mangitou naṛṛaddote.

¹⁰ Arawe i Nabal sinumimbakka, “Daud? Isai i tou? Isai udde ana'i Isai? Taambe saran paassa ya'u naaringikka aranni tou! Wakku-wakku indi manambo allangnga apan tinumal᷊angnga wuassu mawune nirumanta su wanua indi!

¹¹ Tawe mariaddi ya'u manganu roti wuṛṛu uae'u, manga inassa apan buatte nisaddia'u su manga mamamol᷊o wambul᷊un domba'u, wua'udde ta'u ionggolla su anambon taumata apan awagananna tanna wuassuapa darantane!”

¹² Ne tantaran Daud udde nabelengke ringanni Daud wuṛṛu namasingkatta si tou manga wisaran Nabal udde.

¹³ “Peta'e hal᷊elen sangkatou-sangkatou!” parentan Daud. Tantarane lapiddu nametan hal᷊elen. I Daud nametan hal᷊elene lai wuṛṛu inaite niumamatta ringannu iraṛṛangngo 400 su atoune taumata, ana see lai 200 su atoune natana'a iapariaga manga saranapa.

¹⁴ Tantal᷊anna udde i Abigail awingngi Nabal, buatte niwal᷊oannu mangangimben Nabal, arendi, “i Mama naaringikke? I Daud buatte nandolokku manga pira daroloṛṛanne wuassu wadda nangapiddu tabbea si tuangngi ite, arawe i tuangnga nallela si mangitou.

¹⁵ Sumbal᷊i i mangitou mapia si yami. Tawe saran paassa i mangitou nanal᷊asa'i yami, wuṛṛu yami lai taambe saran paassa niawul᷊iannu saranapa sutempo yami naggawen mangitou su wadda'a.

¹⁶ Allo ṛabbi i mangitou ual᷊u'adda si yami su al᷊annune yami uariaga domba ambinga maranin mangitou.

¹⁷ Ana waugu udde, ṛingira'a paapia olangnge indi, wuṛṛu ṛawesa'e apa apan botongnge olaanni Mama. Ana waugu sarun dumanta wawal᷊inne si tuangngi ite wuṛṛu su anambon balahanne. I Tuangngi ite aroddi tawe maddaringikka na'oman sara i tou tawe a'aehanna maggahatto!”

¹⁸ Ana see i Abigail lapiddu nanganu rua ṛasutta roti, wuṛṛu darua pato'a wuassu pisi apan napenen anggore, lima domba nipanggangnga, mapul᷊o pitu su kilone gandumma nihorengnga, maṛṛasutta su raene wuan anggore mamara wuṛṛu rua ṛasutta kukisse wuassu ara. Sarangakanambone udde niluranna su manga keledaine.

¹⁹ Ana see i tou nabbisarate su mangangimbene, “I yamiu amatte palliuṛṛoro si ya'u; i ya'u sarun mattuṛṛutta si yamiu.” Arawe i tou tawe namasingkatta awingnge.

²⁰ I Abigail uasa'e keledaine, wuṛṛu napawe i tou na'omate su sambau pabbeṛṛoanna su winggin bowone, i tou nassambaten Daud wuṛṛu tantarane apan tantal᷊anna sussossokka mattuddan tou.

²¹ Su orassa udde i Daud tantal᷊anna maṛṛingidda, “Tawe gunane ya'u mallu'adda pussa'an taumata udde su wadda'a! Tawe saran sambau pussaane apan nawul᷊i; ne orassa indi apapia'u udde niwal᷊isannu al᷊al᷊eo!

²² Doronganna Ruata mamate si ya'u amungkangu tawe ta'u niapate anambon taumata esakka poiaroddi tantal᷊anna matannallo taambe sinumabbangnga!”

²³ Napawe i Abigail naasilo si Daud, i tou lapiddu sinumossokka wuassu keledaine ana see niumal᷊intudda su leddan Daud,

²⁴ lapiddu nabbisara si tou, “Tuangku, doronganna maddaringikka! Wala'awe pasasal᷊a udde allangngu sassane apan mamasanna!

²⁵ Ariewe i Tuangnga maṛṛingiddi Nabal, taumata apan tawe gunane udde! I tou taumata longonna – ere atappasannu aranne. Allangngu tawe naasilo manga daroloṛṛanna apan nirolokki Tuangku udde.

²⁶ Ruata buatte naningaddi i Tuangku mabbal᷊issa wuṛṛu mamate manga seetti Tuangnga. Wuṛṛu orassa indi Tuangku, ringannu arannu Mawu apan biakka, allangngu massalu, antimanna ola'u wiakku manga seetti Tuangku wuṛṛu suapan taumata apan maapulu manilaka si Tuangku maola'a lai ere ola'u wiakki Nabal.

²⁷ Sengkampewe pinampi'unna apan niapiddu allangngu indi si Tuangku, wuṛṛu tantaran Tuangku.

²⁸ Ampungewe awawoddon allangngu, Mawu sarun ma'ola'a si Tuangku see lai papapulunni Tuangku maola'a ratu su Israel, ana waugu i Tuangku uapapangalo ana waugu Mawu; wuṛṛu i Tuangku tawe na'ola'a al᷊al᷊eo su al᷊o'engngu pabbiaṛṛanna.

²⁹ Unnuwisara pia sangkatou apan mamangalo si Tuangku, ne i Tuangku sarun lu'arannu Ruata ere lai darotongnga apan rariagannu tatahuanne. Arawe seetti Tuangnga sarun iwaretan Mawu marau-rau, iwaretan taṛṛa ali-ali.

³⁰ Mawu sarun ma'ola'a al᷊awo'u apapia apan buatte pina'ire-Ne si Tuangku, wuṛṛu tate mal᷊annu lai i Tuangnga maola'a ratun Israel.

³¹ Sutempo udde i Tuangnga sarun maanaungnga manungku i Tuangnga tawe mamate taumata ringannu taweddu pinangiananne ara'e makkuungnga sassane na'oman sara i Tuangku tawe masusa ara'e sumassilla. Wuṛṛu amungkangu Mawu buatte nangal᷊amatta si Tuangku, ariewe pa'abul᷊iane allangngu indi Tuangku.”

³² Ana see i Daud nabbisarate si tou, “Dalo su Mawu, Ruatan Israel, apan nandolokku naisasomba'u su allo indi!

³³ Dalo su apapandenu see lai i'o sassane ana waugu buatte nanaṛṛangnga si ya'u makkiinnu pamamate wuṛṛu pallaṛṛuungnga sassane.

³⁴ Mawu buatte nanaṛṛangnga si ya'u makkiinnu al᷊al᷊eo su saruannu. Riangannu arannu Mawu, Ruatan Israel apan biakka, unnu wisara i'o tawe nal᷊ihakka naisasomba'u, mallal᷊aṛenggenni Nabal sarangkanambone matete sutempo matannallo taambe sinumabbangnga!”

³⁵ Wua'udde i Daud nanengkamma aonggolla apan niapiddi Abigail si tou, ana see nabbisara si Abigail, “Apul᷊ete su wal᷊enu wuṛṛu ariete passinggawangnga. Darorongngu buatte ta'u niraringiṛṛanna.”

³⁶ Sutempo i Abigail nabelengke ringanni Nabal, inauranna pia andeangnga wahewalla su wal᷊ene, naal᷊ihidda andeangngu mararatu. Ne ana waugu i Nabal wu'ante wuṛṛu lulluassa, i tou tawe niawatti'annu awingnge naddatingngu tiṛṛabbine.

³⁷ Marua allone, napawe i Nabal tate wu'anna, awingnge namasingkatta si tou su ola'u al᷊awo'u al᷊al᷊eo udde. Ana see i Nabal nirantannu radda'u pappuso wuṛṛu ahewallu wadangnge nallome.

³⁸ Iraṛṛangngo mapul᷊o allo wua'udde i Nabal naasomba apia radda'a su pappuso wuassu Mawu na'oman sara i tou nate.

³⁹ Sutempo i Daud naaringikka manungku i Nabal natete, i tou nabbisarate, “Dalo su Mawu! I Tou buatte nabbal᷊issa aal᷊uandaga apan buatte niola'i Nabal si ya'u, wuṛṛu buatte namo'a allangngu indi ma'ola'a al᷊al᷊eo. Mawu buatte nakkuumanni Nabal ana waugu al᷊al᷊eone.” Wua'udde i Daud nandolokku daroloṛṛanna iapa'onokka si Abigail maola'a awingnge.

⁴⁰ Ne manga daroloṛṛanni Daud na'omate ringannu wawine udde su Karmel wuṛṛu nabbisara si tou, “Yami nirolokki Daud iapasaruanna si Mama, ana waugu mangonokka si Mama maola'a awingnge.”

⁴¹ I Abigail lapiddu dirumarisikka wuṛṛu nassubba see lai nabbisara, “I ya'u indi allangngi Daud, ya'u uasaddia mangukkassa leddan manga allangnge.”

⁴² Wua'udde i tou nandiahite ringannu mal᷊ihakka. I tou sinuma'ete keledaine wuṛṛu tatantalongannu siri lima mangangimbene wawine, i tou inaite uatantuṛṛutta daroloṛṛanni Daud, ne i tou naola'e awingngi Daud.

⁴³ Nasal᷊immuri wua'udde i Daud buatte na'awingngi Ahinoam wuassu Yizreel, ne i Abigail indi naola'a lai awingnge.

⁴⁴ Tantal᷊anna udde i Saul buatte nangawingngi Mikhal sinangianne, eteudde awingngi Daud, ringanni Palti ana'i Lais wuassu Soa Galim.