1 SAMUEL 24 - WUKE SUSI WATTI'U AL᷊AL᷊USASSA

I Daud maddiri mamate si Saul

¹ Wua' isudde i Daud inaite watukku wageangngu leta'u En-Gedi, wuṛṛu na'imbunite su manga loṛṛangnga.

² Sutempo i Saul wakkute napul᷊e wua napapangalo nando'appa taumatan Filistin, i tou naasengkamma watti'a manungku i Daud poiaroddi su wadda'a maranin En-Gedi.

³ I Saul nasasaṛṛawutta namile tallu ṛiwu tantara apan apianne wuassu ahewallu Israel, ana see inaite naddea'a si Daud wuṛṛu tantarane su samba'a ra'in Wowon Batu Ambingngu Ahuranganna.

⁴ Ne i Saul na'omate maranin manga pira tanda'u domba su winggin dal᷊anna. Isudde pia lai sambau loṛṛangnga, ne i Saul sinumuttate umuru. Wutte'e lai i Daud wuṛṛu tantarane tantal᷊anna uaimbuni sulal᷊ummu loṛṛangnga udde ewe'e i mangitou lembon al᷊al᷊umanne lai.

⁵ Ana see tantaran Daud nabbisarate si tou, “Eteindi tempone apan mapia si Papa! Wal᷊inewe Mawu buatte nabbisara si Papa arendi, ‘Seennu sarun Ta'u itantilla si'o, walate i'o ma'inolaanna si tou!’ ” Wua'udde i Daud inaite mal᷊iwue-l᷊iwue watukku tampan Saul wuṛṛu ringannu mal᷊anna-l᷊annabba i tou namonggo'a addio'a juban Saul.

⁶ Arawe wua'udde, i Daud naapendamma nassal᷊a ana waugu i tou buatte na'ola'a inolanna udde.

⁷ I tou nabbisara tantarane, “Antimanna Mawu mallu'adda tadea'u ya'u imbaṛṛangnga ma'ola'a al᷊al᷊eo su saruannu ratu'u apan nipilen Mawu!”

⁸ Etearoddi i Daud napaatammuddu naungngu tantarane, wuṛṛu tawe namalan mangitou mamangalo si Saul. I Saul dirumarisikka wuṛṛu nanantangngu loṛṛangnga udde, ana see nanassukku amatanne.

⁹ I Daud sinumabbangke lai wuassu loṛṛangnga udde wuṛṛu nangintul᷊i su liuddi Saul, “Tuangnga!”

¹⁰ I Saul nanaile liudde, ne i Daud niumal᷊intudda ringannu addatta ana see nabbisara, “Anio i Tuangnga maddaringikka watti'u taumata apan namasingkatta manungku allangngu manilaka si Tuangnga?

¹¹ Orassa indi i Tuangnga naapendamma sassane manungku sulal᷊ummu loṛṛangnga tanginna, Mawu buatte nanantilli Tuangnga su allangngu. Allangngu buatte nisal᷊o'u sangkatou tadea'u iapapate si Tuangnga, arawe allangngu maddiri. Allangngu sinumimbakka manungku allangngu maddiri mallessa naungngu ratu apan nipilen Mawu.

¹² Pa'ellege, Iamangku! Pa'ellege piṛṛissu juban Tuangnga niponggo'a apan aagasannu allangngu indi! Allangngu wotongnge mamate si Tuangnga, arawe allangngu tumba'u namonggo'a addio'a pentakku juban Tuangnga. Nariaddi nasemakke manungku alangngu tawe pandumma lal᷊eo ara'e mamate. I Tuangnga mangngenggenna mamate allangngu, salaiwe allangngu tawe sal᷊ane saran kadio'a su saruanni Tuangnga.

¹³ Antimanna ete Mawu apan makkawessa isai suwallatti addua apan nassal᷊a! Ete Mawu antimanna apan mabbal᷊issa inolanni Tuangnga su saruannu allangngu, arawe saran kadio'a allangngu tawe nanaddu'a naungngi Tuangnga.

¹⁴ I Tuangnga masingkattu sasanato'u al᷊amona indi, ‘al᷊al᷊eo tumba'u a'olaannu taumata lal᷊eo.’ Ana waugu udde allangngu tawe mandal᷊eo si Tuangnga.

¹⁵ Pa'ellege allangngu indi apan sarun pateannu ratun Israel! Pa'ellege allangngu indi apan sidutu a'enggenanne! Allangngu tumba'u sambau asu apan nate, tumba'u ere utu.

¹⁶ Mawu sarun maola'a mallaṛṛuungnga suwallatti Tuangnga wuṛṛu allangngu. Antimanna i Tou mamarikissa hatto indi, wuṛṛu manamba'a allangngu see lai manal᷊amatta allangngu wuassi Tuangnga.”

¹⁷ Napawe i Daud buatte nanabbangngu manga wisara udde, i Saul nabbisarate, “Ete i'o udde, i Daud, ana'u?” Ana see i tou nilumuaite.

¹⁸ Ne wisarane si Daud, “Ete i'o apan ṛinone wuṛṛu ete ya'u apan su sal᷊a.

¹⁹ Al᷊al᷊eo'u su saruannu buatte niwal᷊isannu ringannu apapia. Su allo indi i'o buatte napal᷊iatta'a manungku i'o pia pandumma mapia si ya'u, ana waugu i'o tawe namate si ya'u, salaiwe ya'u buatte tinantillu Mawu si'o.

²⁰ Mal᷊awa atonna sangkatou massomban seenne arawe niwalane i tou wiakka! Nariaddi, antimanna Mawu mangal᷊amatta si'o ana waugu inolaannu apan mapia si ya'u su allo indi!

²¹ Orassa indi ya'u mangimanna manungku i'o sarun maola'a ratun Israel wuṛṛu manungku araratuannu Israel sarun sidutu matohassa su al᷊ungngu parentanu.

²² Orassa indi paddiandite si ya'u ringannu arannu Mawu, manungku i'o tawe mamate papapulungku, wuṛṛu lai tawe mamappassa arannu walahangku!”

²³ Ana see i Daud nassalute sarun mappaamattu riandi udde. Wua'udde i Saul napul᷊ete watukku wal᷊ene, wuṛṛu i Daud see lai tantarane nabelengke su tampa pa'imbunianne.