1 SAMUEL 2 - WUKE SUSI WATTI'U AL᷊AL᷊USASSA

Aal᷊iomanni Hana

¹ Wua'udde i Hana niumal᷊iomanna, wisarane, “Mawu nalluassa naungku; inolaan-Ne ma'al᷊uassa ṛimuu'u. Ringannu apendamma lullala'a ya'u nangeetta see'u, ana waugu atonna-tonna Ruata buatte nantul᷊ungku.

² Taweddu apan susi ere Mawu! Tumba'u i Tou apan wotongnge manillumma.

³ Illol᷊oa'e tal᷊imoṛṛongannu apan tawe loṛṛone! Insuete hattonu apan mawunga! Ana waugu Mawu udde Ruata apan lembon masingkatta; apan makkuungngu al᷊awo'u inolaannu taumata.

⁴ Anaannu atumannaṛanne napaddite, arawe lembon matohasse taumata lome.

⁵ Taumata apan dorone mal᷊aidda ana waugu manambo anna, orassa indi nabbal᷊ite allangnga sassewanna tumba'u ana waugu see maasomba anna. Taumata apan dorone mal᷊unussa, orassa indi nal᷊aidde, anna manambote. Awingnge tinna, orassa indi lullala'a, ana'a pitu buatte niasungkange! Arawe inangnga apan manambo anangnge, nitantangnga, niwalane massusa.

⁶ Mawu wotongnge mamate, i Tou lai mapawiakka. Watukku runian taumata nate i Tou nanossokku taumata. Wuṛṛu ete i Tou lai apan mangal᷊appa wua poiaroddi.

⁷ Pia taumata apan niolang-Nge asiangnga, piaddu lai apan niolang-Nge ala. Pia taumata apan niapaawawo-Ne, piaddu lai niapaatanggakku Mawu.

⁸ Wuassu asasusa Mawu namatunna taumata tawe darotongnge, wuassu asasahadda Mawu namallossu taumata lal᷊ebbone. I mangitou niola'a hawe manga ma'ala, wuṛṛu nionggol᷊annu manara apan a'addatanna. Rapappakku runia tatahuanannu Mawu, su wowone Mawu napararisikku runia.

⁹ Taumata matuṛṛutta sidutu matammudda sulal᷊ummu sasirungngu Mawu. Arawe al᷊al᷊eo natete naṛṛimunsa'a sulal᷊ummu ararandumma wuṛṛu wasa tu'udda. Atatohassa sassane tawe iawansaga atatohassu taumata tawe maapangonggolu auntunganna.

¹⁰ Manga seettu Mawu mangke maṛṛimunsa'a, i mangitou matta'utta; wuassu langitta i Tou ruddalu'a. Mawu sarun makkuungngu ahewallu runia indi, wuṛṛu mangonggolu taṛṛino apan mawantuga su manga ratu apan nipile-Ne.”

¹¹ Ana see i Elkana wuṛṛu amonanne napul᷊ete watukku Rama, arawe i Samuel, ana'a udde, natana'e su Silo wuṛṛu mangngimbe Mawu su al᷊ungngu lu'addi Imam Eli.

Al᷊aṛṛana'i Eli

¹² Al᷊aṛṛana'i Eli tumaniten dal᷊eo atonna. I mangitou tawe maddaringikka Mawu

¹³ wuṛṛu naola'a sangkatou imam, i mangitou walate apulu mamarenta walahannu Israel. Amungkangu pia sangkatou taumata mangonggolu sasamba, masasumbala imam rumanta mangapiddu saṛṛampangnga pia isine tatallu. Tantal᷊anna ṛemessa udde uatunna,

¹⁴ saṛṛampangnga udde ia'usu'a sulal᷊ummu urinna pallahanna ṛemessa, ana see manga apa apan nia'usu'u saṛṛampangnga iadde su liudde maola'a wageangngu imam. Anambon taumatan Israel apan nirumanta su Silo mangngonggolu sasamba niola'a ereudde.

¹⁵ Ewe'e masokka lai masasumbala udde rumanta tantal᷊anna tawane taambe niṛṛae ana see itambunna, ana see i tou nabbisara su taumata apan nangonggolu sasamba udde, “Onggol᷊a'e ṛemessa apan ta'e tata udde su imam tadea'u itambunna; i tou maddiri manengkamma remessa buatte nilaha.”

¹⁶ Amungkangu taumata udde sumimbakka, “Mappianne i ite tuttuṛṛutta atoranna, wuṛṛu mannambunnu tawane udde asuene; wua'udde walate i'o manganu suapa ipaapulunu,” ne massasumbala udde nabbisara, “Tawe, onggol᷊a'e orassa indi, amungkangu tawe, sarun ta'u aṛṛoanna.”

¹⁷ Etearoddi ruan katou ana'i Eli udde na'ola'a rosa apan bahewalla su lantakku hatin Mawu, ana waugu itarua manggal᷊usa'a sasamba apan ia'onggolla su Mawu.

I Samuel su Silo

¹⁸ Tantal᷊anna udde, i Samuel apan ta'e al᷊aṛṛana'a udde sidutu mangngimbe Mawu. I tou ual᷊uṛṛen laubba al᷊aṛṛaene wuassu linen, naal᷊ihidda laubbu patataṛṛamawun manga imam.

¹⁹ Suapan mattonna inangnge manabbi'a juba addio'a ana see nionggolla si Samuel amungkangu wawine udde suadio'a ringannu awingnge rumanta mangonggollu sasamban tonna.

²⁰ Ne i Eli nangal᷊amatta si Elkana wuṛṛu awingnge, wuṛṛu i tou nabbisara si Elkana, “Antimanna Mawu mangonggollu ana'a apia si'o wuassu awingngu indi, ipallol᷊ossa ana'a apan buatte nionggolli raddua su Mawu.” Wua'udde itarua napul᷊ete watukku Rama.

²¹ I Hana nial᷊amatannu Ruata, na'oman sara nanungkangu lai sangkatou ana'a esakka wuṛṛu ruan katou ana'a wawine. Ne i Samuel aatambanna ahewalle tantal᷊anna i tou mangngimbe Ruata.

I Elkana wuṛṛu al᷊aṛṛanangnge

²² I Eli timmadete atonna. I tou sidutu ma aringikka aalae su ola'u pallal᷊aghu al᷊aṛṛanangnge su saruannu taumatan Israel. I Eli lai masingkatta manungku al᷊aṛṛanangnge udde mattiilla ringannu manga wawine apan mammanara su ngaran Dasanna Darantan Mawu.

²³ Ana waugu udde i tou nabbisarate su manga anangnge, “I ya'u buatte naaringikka aalae wuassu anambon taumata su ola'u pallal᷊aghunu apan dal᷊eo. Anio inolaanni yamiu aroddi?

²⁴ Ariete pa'ola'a aroddi ana'u. Tumaniten dal᷊eo atonna inolaanna apan ipagahatton walahannu Mawu su ola'i yamiu!

²⁵ Amungkangu pia taumata nassal᷊a su taumata waine, Ruata wotongnge manamba'a si tou; arawe amungkangu taumata na'ola'a rosa su Mawu, isai wotongnge mangontolla si tou?” Arawe i mangitou tawe maddaringikka tatantiron Eli iamangngi mangitou, ana waugu Mawu buatte nakkawessa sarun mamate si mangitou.

²⁶ Arawe i Samuel, ana'a udde, a'atambanna ahewalle wuṛṛu lembon ipa apulu, mawae ete Mawu, aroddi lai anambon taumata.

Papatta su ola'u amonanni Eli

²⁷ Su allo sambau nirumantate sangkatou nabi ringanni Eli wuṛṛu namasingkattu tanatan Mawu si tou, wisara-Ne, “Sutempo al᷊amonanu i Harun wuṛṛu amonanne nabbal᷊i allangngu ratun Mesir, i Ya'u buatte napal᷊iatta'u watangang-Ku si Harun.

²⁸ Wuassu anambon walahannu Israel buatte Ta'u nipile amonanne maola'a imam mangimbe si ya'u su mezbah, manambunnu amania, wuṛṛu malluṛṛen laubba efod napawe maggahatto-U. Wuṛṛu si mangitou see lai su papapulunni mangitou buatte Ta'u nionggol᷊annu taṛṛino manganu sambageanganna wuassu sasamba aongolla apan itattambunna su mezbah.

²⁹ Nariaddi, anio i'o ta'e wal᷊iu maasilo manga sasamba apan buatte Ta'u niparenta, nionggollu pabbawala-U si Ya'u? Anio i'o Eli, lembon mangngaddatta al᷊aṛṛanangngu wuassu mangaddatta si Ya'u, wuṛṛu namalan mangitou malliu ṛoron batanganne ringannu wageangnge apan apianne wuassu anambon aonggollu pabbawala-U si Ya'u?

³⁰ I Ya'u, Mawu Ruatan Israel, dorone buatte naddiandi, amonannu wuṛṛu ṛuangannu sarun mangimbe si Ya'u maola'a imam sarangkal᷊o'enge. Arawe orassa indi Ya'u maddiriten olangnge udde lai! Ana waugu apan mangngaddatta si Ya'u, sarun Ta'u addatanna arawe isai mallobbossa si Ya'u, sarun Ta'u lobbosanna lai.

³¹ Paddaringikka, manungku sarun dumanta tempone i Ya'u mamate taumata saṛṛen tumuwo sulal᷊ummu amonannu wuṛṛu ṛuangannu, na'oman sara tawe saran sangkatou esakka sulal᷊ummu amonannu uukke mal᷊o'engnga.

³² I'o sarun massusa wuṛṛu mal᷊al᷊eo naungngu sutempo maasilo anambon al᷊amatta apan sarun Ta'u ionggolla su manga taumata waine su Israel, arawe sulal᷊ummu amonannu sarangkanambone mate ta'e saṛṛen tumuwo.

³³ Arawe, sangkatou wuassu papapulunnu sarun Ta'u iwala wiakka wuṛṛu mangimbe si Ya'u maola'a sangkatou imam. Arawe i tou sarun mawuta matane wuṛṛu mabbiakka ringannu tawe antimma. Anambon papapulunne waine sarun iapate.

³⁴ Maola'a tatiala manungku anambon wisara-U udde atonna sarun matipussa, ne anangngu ruan katou udde, i Hofni wuṛṛu i Pinehas sarun mate sulal᷊ummu allo massallo.

³⁵ Wua'udde i Ya'u sarun mamile imam apan matuṛṛutta si Ya'u wuṛṛu maddaringikka manga parenta-U si tou. Si tou sarun Ta'u ionggolla papapulunna apan sidutu mammanara imam su saruannu manga ratu apan Ta'u nipile.

³⁶ Suapan papapulunnu apan ta'e wiakka, sarun inai ringannu imam udde maddorongnga roitta wuṛṛu anna. I tou sarun sumal᷊ande, Wala'awe ya'u massumbala manga imam, tadea'u ya'u wotongnga maanna salaiwe tumba'u sangkawo'o.”