1 SAMUEL 19 - WUKE SUSI WATTI'U AL᷊AL᷊USASSA

I Daud a'enggenanni Saul

¹ I Saul nabbisara si Yonatan anangnge esakka, wuṛṛu su anambon mammamanarane manungku i tou mamate si Daud. Arawe i Yonatan mangke marangngu si Daud,

² ana waugu udde i tou nabbisara si Daud, “Iamangku pia pandumma mamate si'o; nariaddi paatehamma! Pa'imbunite tiṛṛabbi marua allo su sambau tampa awagananna, wuṛṛu atana'e isudde.

³ I ya'u inai su wadda'a suadio'a ringannu iamangku wuṛṛu dumarisikka maranin tampa pa'imbuniannu udde. Ana see ya'u maggahatton tou su ola'u pandumanni tou si'o, wuṛṛu panginsueannu hatto udde ta'u iapasingkatta si'o.”

⁴ Ana see i Yonatan nabbatti'i Daud si Saul, wisarane, “Iamangku, arie iamangnga manilaka si Daud allangngu udde. Ana waugu i tou tawe na'ola'a pasasal᷊a sarangkadio'a su saruannu iamangnga; ewe'e i tou buatte nattinsahadda su manaranu.

⁵ I tou buatte nanantillu niawane sutempo i tou namate si Goliat, wuṛṛu Mawu buatte nangonggollu auntunganna apan bahewalla si tou su Israel. Iamangnga sassane naasilote arariadianna udde, ne iamangnga lulluassa sutempo udde. Nariaddi anio orassa indi iamangnga ma'apulu mandal᷊eo taumata apan tawe sal᷊ane wuṛṛu ma'apulu mamate si Daud ringannu tawe pangaiananne?”

⁶ I Saul naatutukke ana waugu manga wisaran Yonatan, ne i tou nassalu ringannu arannu Mawu manungku i Daud tawe pateanne.

⁷ Wua'udde i Yonatan namaggo si Daud, wuṛṛu nabbatti'u anambon hatto tanginna. Wua'udde i tou nangapiddi Daud ringanni Saul, ne i Daud nangimbe si tou ere lai dorone.

⁸ Wua'udde pangalo napesangke apia ringannu taumatan Filistin. I Daud namangalo wuṛṛu namaddon mangitou, na'oman sara i mangitou tinumal᷊angnga.

⁹ Su allo sambau i Saul tantal᷊anna ua'ianna su wal᷊ene ringannu sambeangnga su limane, ne inaṛṛombanganne i Saul nirantannu ghaṛaho lal᷊eo apia apan nirolokku Mawu. Sutempo udde i Daud tantal᷊anna mannal᷊angnga kecapi.

¹⁰ Ana see i Saul mangke mappandumma mamanta'u sambeangnga si Daud apan ua'ianna maranin darandungnga. Arawe i Daud nallinda'a, na'oman sara sambeangnga udde napanta'a su darandungnga. I Daud tinumal᷊angnga nanal᷊amatta watanganne.

¹¹ Su ṛabbi udde lai i Saul nandolokku manga taumata inai su wal᷊en Daud iapal᷊inge si Daud wuṛṛu iapapate marua'allo udde lai. Arawe i Mikhal awingnge nabbisara si tou, “Amungkangu i'o tawe tumal᷊angnga ṛabbi indi, tiṛṛabbi marua allo i'o sarun pateanna.”

¹² Ana see i Mikhal nanossokki Daud wuassu sungketa, ne i Daud tinumal᷊angke na'oman sara i tou naal᷊inda'a.

¹³ Wua'udde i Mikhal nanganu paal᷊uannu monganne su wal᷊ene ana see niaddo su tatiil᷊anni Daud. Ana see su wageangngu puane niaddoannu apepessa wuassu wambul᷊un ambinga, wua'udde paal᷊uanna nitaapannu nasa.

¹⁴ Sutempo manga daroloṛṛanni Saul nirumanta manametta si Daud, i Mikhal nabbisara, “i Daud maradda'a.”

¹⁵ Arawe i Saul nandolokki mangitou apia isudde iapaellega si Daud ringannu matan mangitou sassane. Parentane, “Apira'e i tou inawarendi, sara tampan atatiil᷊anne, tadea'u ta'u pateanna.”

¹⁶ Ana see daroloṛṛanna udde sinumuttate sulal᷊ummu wabbo'a wuṛṛu inauranna tumba'u paal᷊uanna uaraddo sutampa atatiil᷊anna ringannu apepessa wuassu wambul᷊un ambinga su wageangngu puane.

¹⁷ I Saul nabbisara si Mikhal, “waṛṛani atonna i'o mangawusu si ya'u arendi! See'u buatte nitul᷊ungngu niapaatal᷊angnga!” I Mikhal sinumimbakka, “I tou mammansaga mamate si ya'u amungkangu ya'u tawe mallal᷊ima mantul᷊ungngi tou.”

¹⁸ Napawe i Daud naatal᷊angke, i tou inaite watukku wal᷊en Samuel su Rama, ana see i tou namasingkattu anambon inolaanni Saul si Samuel. Wua'udde i Daud wuṛṛu i Samuel suadio'a inaite watukku Nayot wuṛṛu natana'e isudde.

¹⁹ Arawe niapasingkatta si Saul manungku i Daud poi su Nayot maranin Rama.

²⁰ Ana waugu udde i Saul nandolokku manga pira daroloṛṛanne inai iapasametta si Daud. Arawe i mangitou naasangkalla ammul᷊annu nabi apan tantal᷊anna massal᷊aingnga wuṛṛu mangngintul᷊i su sambau, ipappiaṛṛa'i Samuel. Ana see manga daroloṛṛanni Saul udde niintaṛṛoannu Ghaṛṛahon Duata na'oman sara i mangitou lai massal᷊aingnga wuṛṛu mangngintul᷊i suadio'a.

²¹ Napawe watti'a udde na'omate si Saul, i tou nandolokku manga daroloṛṛanna waine wuṛṛu i mangitou udde lai massal᷊aingke wuṛṛu mangngintul᷊i suadio'a. Su atallune i Saul nandolokku manga daroloṛṛanna, ne aroddi lai apan nariaddi si mangitou.

²² Ana waugu udde i Saul inaite watukku Rama. Napawe na'omatae su paṛṛihi wahewalla su Sekhu, i tou naiwal᷊o suapa i Samuel wuṛṛu i Daud uatana'a, wuṛṛu manga taumata udde namasingkatta si tou manungku i mangitou poi su Nayot.

²³ Nariaddi i tou nasal᷊ate poiaroddi, arawe i tou lai niintaṛṛoannu Ghaṛṛahon Mawu, na'oman sara massal᷊aingke wuṛṛu mangngintul᷊i su al᷊o'engngu lal᷊anna watukku Nayot.

²⁴ Napawe na'omate poiaroddi, i tou nalluatta laungnge wuṛṛu nassal᷊aingnga lapiddu mangngintul᷊i su saruanni Samuel, ana see nawantingnga su leta'a ringannu uatantol᷊e su al᷊o'engngu allo wuṛṛu ṛabbi. (Eteindi panattaṛṛannu sasanato'a apan tingikke, “Apa i Saul naola'e lai nabi?”)