1 SAMUEL 15 - WUKE SUSI WATTI'U AL᷊AL᷊USASSA

Pangalo nando'appa taumatan Amalek

¹ Su allo sambau i Samuel nabbisara si Saul, “Ete Mawu apan mandolo'u wuṛṛu manenegi Tuangnga niola'aratun Israel al᷊aṛṛanang-Nge. Ana augu udde ṛinone i Tuangnga maddaringikka parentan Mawu Apan Lembontaṛṛino.

² I tou sarun makkuumannu taumatan Amalek, ana waugu al᷊amonan mangitou nilumawangnga taumatan Israel sutempo taumatan Israel nirumanta wuassu Mesir.

³ Nariaddi, roote wuṛṛu pangaloite taumatan Amalek wuṛṛu ṛimunsa'a al᷊awo'u pussa'an mangitou. Arie pia sambau apan matantanga; patete anambon taumata esakka, wawine, al᷊aṛṛana'a wuṛṛu ana'a ta'e maṛṛamutta; see lai sapi, domba, unta wuṛṛu keledai.”

⁴ Ana see i Saul nanaddiate tantarane wuṛṛu nireengnga su Telaim; pia 200.000 su atoune tantaran Israel wuṛṛu 10.000 su atoune tantaran Yehuda.

⁵ Wua'udde i Saul inaite suadio'a ringannu tantarane watukku soan Amalek wuṛṛu nangampangnga seetta su wantan sal᷊ukka mamarate.

⁶ I tou lai nannanata iapanaungnga su taumatan Keni wisarane, “Roote wuṛṛu tantanga'e taumatan Amalek, tadea'u i yamiu tawe ta'u ṛaddaanna suadio'a ringanni mangitou, ana waugu dorone al᷊amonanu buatte namasilon pagahahawe su taumatan Israel sutempo taumatan Israel nirumanta wuassu Mesir.” Ne taumatan Keni nangingkatte wua isudde.

⁷ Wua'udde i Saul napapan galoten ringannu taumatan Amalek wuṛṛu namaddon mangitou, su al᷊o'engngu lal᷊anna wuassu Hawila naddatingngu Syur su samba'a ra'i wanua Mesir.

^8-9 Anambon tumana'u soa wuṛṛu tantaran Amalek nipaten Saul. Arawe i Agag ratun taumatan Amalek nisametta wuṛṛu niwala ta'e wiakka ṛatanganni Saul wuṛṛu tantarane, aroddi lai domba wuṛṛu sapi apan apianne, ana'u sapi wuṛṛu ana'u domba apan atawanne, wuṛṛu al᷊awo'u saranapa apan maarega; tumba'u winatangnga apan tawe gunane wuṛṛu tawe aregane apan nasue nipate.

Mawu tate nanga'u si Saul maola'a ratu

¹⁰ Ana see Mawu nabbisarate si Samuel,

¹¹ “I ya'u sinumassilla nanenegi Saul naola'a ratu, ana waugu i tou buatte tinumal᷊iudda si Ya'u, wuṛṛu tawe tumuṛṛutta parenta-U.” I Samuel mangke nasusa, wuṛṛu su al᷊o'engngu ṛabbi i tou sussal᷊ande Mawu.

¹² Tiṛṛabbine marua'allo maṛṛanggappa, i Samuel inaite naisasomban Saul. Piaddu namasingkatta si tou manungku i Saul inaitearoddi watukku soan Karmel mapararisikku watun pananaunganni tou poiaroddi, ana see masal᷊ate watukku Gilgal.

¹³ Sutempo i Samuel nassombaten Saul, i Saul nabbisarate si tou, “Doronganna Mawu mangal᷊amatta si Papa! I ya'u buatte napaamattu parentan Mawu.”

¹⁴ Arawe i Samuel naiwal᷊o, “Amungkangu aroddi, anio ya'u naaringikka sapi mammiṛṛonganna wuṛṛu domba lukkeo'a?”

¹⁵ I Saul sinumimbakka, “Manga winatangnga udde niaṛṛo wuassu taumatan Amalek. Domba wuṛṛu sapi apan apianne buatte nianun tumana'u soa ionggolla maola'a sambau sasamba su Mawu Ruatanu. Arawe lambene buatte nipaten kami.”

¹⁶ Naaringikka udde i Samuel nabbisara, “Paṛṛaddote addio'a, ya'u sarun mamasingkattu wisaran Duata si ya'u naallawanna.” “Pasingkata'e,” unni Saul.

¹⁷ I Samuel nabbisara, “Wal᷊inewe i Tuangnga naola'e piaṛṛa'u manga walahannu Israel, salaiwe i Tuangnga massunna manungku watanganni Tuangnga tawe gunane? I Tuangnga buatte nipilen Mawu maola'a ratun Israel,

¹⁸ wuṛṛu lai i Tuangnga nirolokku Mawu iapapate taumatan Amalek apan dal᷊eo udde. I Tuangnga nirolokka iapapangalo si mangitou ma'oman sara i mangitou sarangkanambone masue.

¹⁹ Anio i Tuangnga tawe naddaringikka parentan Mawu? Anio i Tuangnga suadio'a nanganu saranapa niaṛṛo, wuṛṛu ringannu aroddi i Tuangnga napaasusa naungngu Mawu?”

²⁰ I Saul sinumimbakka, “I ya'u buatte tinumuṛṛutta parentan Mawu, wuṛṛu inaite napapangalo ere buatte nirolokku Mawu si ya'u; i Agag ratun Amalek ta'u sinametta wuṛṛu anambon taumatan Amalek buatte ta'u nipate.

²¹ Arawe tantara'u tawe namate anambon binatangnga papadul᷊iananna; i mangitou buatte namile domba wuṛṛu sapi apan apianne wuassu saranapa niaaṛṛo udde wuṛṛu niola'a sasama su Gilgal maola'a sasamba su Mawu Ruatanu.”

²² Arawe i Samuel nabbisara, “Suapane apan lembon ipaapulu Mawu, atatuṛṛutta ara'e sasamba? Atatuṛṛutta su Mawu mappianne wuassu mangonggollu sasamba. Mararingikka mappianne wuassu tawan domba.

²³ Ana waugu lullawangnga Mawu al᷊al᷊eone nassul᷊ungngu ere taṛṛa wal᷊i'immata, wuṛṛu naungnga mawunga al᷊al᷊eone ere massubba monganna. Ana waugu i Tuangnga buatte nilumawangnga parentan Mawu, ne Mawu lai tate manga'u si Tuangnga sangkatou ratu.”

²⁴ Naaringikka udde i Saul nanga'u si Samuel, wisarane, “Atonna ya'u buatte na'ola'a rosa. I ya'u nilumawangke parentan Mawu wuṛṛu tawe naddaringikka tatantiron Papa. I ya'u matta'uttu tantara'u, ana see ya'u nangutungngu darorongngi mangitou.

²⁵ Arawe orassa indi, ya'u sumal᷊ande si Papa, ampungewe rosa'u, wuṛṛu pabbelengke suadio'a ringangku watukku Gilgal, tadea'u ya'u wotongnge mattaṛṛamawu su Mawu.”

²⁶ Arawe i Samuel sinumimbakka, “I ya'u maddiri mabbelengnga suadio'a ringanni Tuangnga. I Tuangnga buatte nilumawangnga parentan Mawu, ne orassa indi i Tou tate manga'u si Tuangnga maola'a ratun Israel.”

²⁷ Ana see i Samuel nabbal᷊i'a inaite mapul᷊e, arawe orassa udde lai i Saul nanaṛṛangnga si tou ringannu nangagassa jubane, na'oman sara juba udde nahesa'a.

²⁸ Ana see i Samuel nabbisarate si tou, “Su allo indi Mawu buatte nanggesa'a araratuannu Israel wuassi Tuangnga, wuṛṛu nionggola su taumata waine apan mappianne wuassi Tuangnga.

²⁹ Apan Awantuhanne Ruatan Israel tawe mamahia, wuṛṛu tawe mawal᷊u naung-Nge, ana waugu i Tou wal᷊ine taumata.”

³⁰ I Saul sinumimbakka, “I ya'u narosate. Arawe tul᷊unga'a Papa, pabbelengke suadio'a ringangku tadea'u ya'u wotongnge mattaṛṛamawu su Mawu Ruata Iamangnga. Ringannu aroddi i Papa mangngaddatta si ya'u su saruannu manga piaṛṛa'u pabbawala'u wuṛṛu su saruannu anambon taumatan Israel.”

³¹ Ne i Samuel nabelengke suadio'a ringanni Saul watukku Gilgal, ne i Saul nattaṛṛamawute Mawu.

³² Wua'udde i Samuel nandolokku tantarane, “Apira'a i Ratu Agag inawarendi.” I Agag nirumanta ringanni tou, ringannu napenen antimma ana waugu i tou maṛṛingidda, “Asasilaka pateanna si ya'u nal᷊iudde.”

³³ Ana see i Samuel nabbisara, “Ere lai hal᷊elenu apan buatte na'ola'a manambo inangnga apan niawul᷊iannu anangnge, aroddi lai inangngu sarun awul᷊iannu anangnge.” Ana see i Samuel nanattadda si Agag su saruannu mezbah su Gilgal.

³⁴ Wua'udde i Samuel inaite watukku Rama, wuṛṛu i Ratu Saul napul᷊ete watukku wal᷊ene su Gibea.

³⁵ Su al᷊o'engngu pabbiaṛṛanne, i Samuel tate nassomban Saul apia. Arawe i Samuel massusa ana waugu sinumassilla nanenegi Saul naola'a ratun Israel.