1 SAMUEL 14 - WUKE SUSI WATTI'U AL᷊AL᷊USASSA

I Yonatan naola'a tumannaṛanne

¹ Sutempo sambau i Yonatan nabbisara su sangkatou umbasanna apan uaapiddu ahidde, “Wette, i ite inaite watukku tampa pandariagannu taumatan Filistin su samba'a poine!” Arawe i tou tawe namasingkatta iamangnge asuene.

² Su orassa udde i Saul uasirungnga su al᷊ungngu alu delima su Migron, tawe marau wuassu Gibea. Tumanangnge apan uatantalongnga si tou iraṛṛangngo 600 su atoune anambone.

³ (Imam apan uaapiddu efod eteudde i Ahiya ana'i Ahitub, eteudde tuṛṛangngi Ikabod wuṛṛu i Pinehas wuṛṛu lai i Pinehas ana'i Eli, imam su Silo.) Tumanangnge lai wagga manungku i Yonatan nanantangken tampa udde.

⁴ Su ipattudda tampan pandariagannu taumatan Filistin udde, i Yonatan ṛinone sumabbi sambau wowone apan nawa'a su pattangngannu watu darua apan maṛṛoro, sambau-sambau aranne Bozes wuṛṛu Sene.

⁵ Watu ṛaniga su samba'an sawannakka uasaruanna watukku Mikhmas, wuṛṛu su samba'an timukka uasaruanna watukku Geba.

⁶ Ne i Yonatan nabbisarate su umbasanna udde, “Wette iaddua inaite watukku tampan pandariagannu taumatan Filistin taumata apekka udde. Asinungka Mawu mantul᷊ungngi addua. Ana waugu Mawu wotongnge mangonggollu auntunganna, mawae ete su taumata manambo ara'e lai su taumata matul᷊ungnga.”

⁷ Umbasanna udde sinumimbakka, “Sarangkanambone apan olaanni Tuangnga, allangngu tumuṛṛutta.”

⁸ “Ore aroddite,” sasimbakki Yonatan. “Sutempo lumewessa, iaddua sarun mattingkapasilon batanganni ite su manga taumatan Filistin udde.

⁹ Napawe i mangitou mandolokki iaddua iapata'alla wuṛṛu maṛṛaddo ma'oman sara i mangitou rumanta ringanni iaddua, ne iaddua sidutu matana'a isudde wuṛṛu lasa'e lumewessa.

¹⁰ Arawe amungkangu i mangitou mandolokki iaddua iaparanta, iaddua sarun inai, ana waugu udde tatialane manungku i mangitou buatte tinantillu Mawu si ite.”

¹¹ Napawe itarua nattingkapasilon batanganni tarua su taumatan Filistin su tampan pandariaganna udde, manga taumatan Filistin udde nabbisarate, “Pa'ellege, pia manga taumatan Ibrani apan sinumabbangnga wuassu manga loṛṛangnga tampa pa'imbunianni mangitou!”

¹² Wua'udde i mangitou niumui si Yonatan wuṛṛu allangnge, “Awitte inawarendi tadea'u yami mamasilon manga apa si'o!” Ana see i Yonatan nabbisarate su umbasanna udde, “Tantalongke si ya'u, ana waugu i mangitou buatte tinantillu Mawu su Israel.”

¹³ Ringannu tatantalongannu umbasanna udde i Yonatan u'omangnga ire'e suma'a. Sutempo i Yonatan narantate, manga taumatan Filistin nanawote ana waugu nipuulli tou, wuṛṛu su liudde lai umbasanna udde namate si mangitou.

¹⁴ Sulal᷊ummu pangalo paarorone udde, i Yonatan wuṛṛu umbasanna udde namate iraṛṛangngo ruan pul᷊o su atoune su leta'a ahewalle sepere appatta hektare.

¹⁵ Arariadianna udde naata'utta taumatan Filistin su paddasananna wuṛṛu su manga wadda'a. Anambon tumana'u Filistin ringannu manga tampa pandariaganna wuṛṛu manga ammul᷊annu taṛṛa aṛṛo mangke nata'utta; ewe'e lai runia niumio'a, wuṛṛu nariaddite aal᷊iba'ukka apan masaddatta.

Taumatan Filistin niawaddo

¹⁶ Tantal᷊anna udde tantaran Saul apan uataṛṛapa su Gibea su wageangngu leta'i Benyamin, naasilo taumatan Filistin walate atal᷊angnge wuṛṛu nial᷊iwunete.

¹⁷ Ne i Saul nabbisarate su tantarane, “Reenga'a manga tantara wuṛṛu parikisete isai apan tawe baddi'a.” I mangitou tinumuṛṛutte parenta udde ana see niasingkatanna manungku Yonatan wuṛṛu umbasanna mangangapiddu lutangnge tawe baddi'a isudde.

¹⁸ “Apira'e efod udde inawarendi,” unni Saul si Imam Ahia. (Su allo udde i Ahia nangapiddu efod udde su saruannu taumatan Israel.)

¹⁹ Sutempo i Saul tantal᷊anna uahahatton imam udde, atata'utta sulal᷊ummu paddasanannu taumatan Filistin mangke a'atambanna, na'oman sara i Saul nabbisara su imam udde, “I ite tate tempone maddorongnga tatantiro wuassu Mawu!”

²⁰ Ana see i Saul wuṛṛu manga taumatane su sambau inaite watukku tampan papangaloanna. Isudde i mangitou naasilo pia al᷊iba'ukka su taumatan Filistin; i mangitou uapapangalo wuṛṛu uapapate.

²¹ Manga taumatan Ibrani apan uatana'a su wageangngu leta'u taumatan Filistin, wuṛṛu ingana'a apan buatte tinumantalongnga tantaran mangitou, nabbal᷊i'a naammulli Saul wuṛṛu Yonatan.

²² Wuṛṛu lai manga taumatan Israel apan uaimbuni su manga wuiddu Efraim, apan naaringikka manungku taumatan Filistin tinumal᷊angke, naammulle wuṛṛu namangalote taumatan Filistin udde.

²³ I mangitou uapapangalote su al᷊o'engngu lal᷊anna na'oman sara sinumabbi Bet-Awen. Mawu nanal᷊amatta Israel su allo udde.

Manga arariadianna napawe buatte napapangalo

²⁴ Su allo udde manga taumatan Israel nallomete ana waugu mal᷊unussa, ana waugu i Saul buatte nassalu arendi, “Niawontohante taumata apan niumanna manga anna su allo indi, tantal᷊anna ya'u taambe naawal᷊issa taddu'u naungku su saruannu seetta.” Ana waugu udde tawe saran sangkatou apan niumanna su allo massallo udde.

²⁵ Wua'udde i mangitou sarangkanambone na'omate su sambau mahurangnge wuṛṛu naasomba pul᷊a apan tumaniten manambo,

²⁶ arawe tawe saran sangkatou apan na'inumma pul᷊a udde, ana waugu matta'uttu aṛṛinoannu tatal᷊an Saul.

²⁷ Arawe i Yonatan wagga, manungku iamangnge buatte namansagu tumanangnge ringannu tatal᷊a udde, ana waugu udde i tou nangul᷊ukku ta'inne apan uaapidda si tou, wuṛṛu niusu'a su sal᷊akku pul᷊a, ana see nanganute pul᷊a udde wuṛṛu niinumpe. Wua'udde i tou naapendamma mal᷊uassa wuṛṛu matohasse.

²⁸ Wua'udde sangkatou wuassu manga tantara udde nabbisara si Yonatan, “Yami sarangkanambone tate ikkatta ana waugu mal᷊unussa. Arawe iamangngi Tuangnga buatte naningaddi yami ringannu sasalu, wisarane, ‘Niawontohante taumata apan niumanna allo indi.’ ”

²⁹ I Yonatan sinumimbakka, “Tumaniten dal᷊eo inolaannu iamangku udde su walahanni ite! Pa'ellege, wadangku orassa indi mappianne marau napawe i ya'u na'inumma pul᷊a addio'a.

³⁰ Unnu wisara tumanangnge su allo indi niwala niapaanna anna apan buatte niaṛṛo sutempo namaddon seetta, asinungka mannamboanne lai taumatan Filistin apan iapate kite!”

³¹ Su allo udde taumatan Israel namaddon taumatan Filistin napawe buatte napapangalo su al᷊o'engngu lal᷊anna wuassu Mikhmas naddatingngu Ayalon. Arawe wua'udde i mangitou nallomete,

³² na'oman sara i mangitou uapapal᷊aṛṛote manganu saranapa apan niasombanganna wuassu seetta; i mangitou nanganu domba wuṛṛu sapi ana see niṛṛata su tampa udde lai, wuṛṛu lapiddu niuminassa ṛemessa apan ta'e pia daṛṛane udde.

³³ Ana see niapasingkatta si Saul arendi, “I Tuangnga, tumana'u soa narosate su saruannu Mawu ana waugu niuminassa ṛemessa apan ta'e pia daṛṛane.” “I yamiu mandal᷊al᷊eo!” aintul᷊in Saul. “Tal᷊inggia'e watu wahewalla udde inawarendi.”

³⁴ Wua'udde wisarane apia su manga taumata apan uaapiddu watti'a udde, “Passal᷊iawukke i yamiu suwallattu tumana'u soa wuṛṛu doloṛṛa'a i mangitou mangapiddu sapi wuṛṛu dombane inawarendi, tadea'u ṛatanna su wowon batu indi wuṛṛu inasanna lai isindi; ringannu aroddi i mangitou tawe uminassa ṛemessa wuṛṛu daṛṛane tadea'u tate marosa su saruannu Mawu.” Ṛabbi udde lai tumanangnge sarangkanambone nangapiddu winatangnga apan niaaṛṛone wuṛṛu ana see niṛṛata isudde.

³⁵ Ana see i Saul napararisikku mezbah su Mawu; eteudde mezbah paarorone niolangnge.

³⁶ Wua'udde i Saul nabbisarate mallal᷊aṛenggenne, “Wette i ite mamangalote taumatan Filistin su ṛabbi indi lai ana see mangaṛṛo saranapan mangitou maddatingngu marua allo wuṛṛu mamate si mangitou sarangkanambone.” I mangitou sinumimbakka, “Ore mappianne i Tuangnga ma'ola'a manara suapan aellegi Tuangnga udde mapia.” Arawe imam nabbisara, “Wette i ite maddorongnga tatantiro wuassu Ruata paarorone.”

³⁷ Ana see i Saul naiwal᷊ote Ruata, “Wotongngewe ya'u mamangalo taumatan Filistin? Apa i mangitou sarun itantillu Mawu su liman taumatan Israel?” Arawe su allo udde Ruata tawe sinumimbakka.

³⁸ Ana waugu udde i Saul nabbisarate su manga piaṛṛa'u tumana'u soa, “Wette rantate isindi sarangkanambone wuṛṛu pamarikisse rosa apan buatte niola'a su allo indi.

³⁹ I ya'u maddiandi ringannu arannu Mawu apan biakka, apan buatte nangonggollu auntunganna su Israel, manungku taumata apan nassal᷊a sarun iṛṛuumanna pateanna, salaiwe i tou i Yonatan ana'u esakka.” Arawe tawe saran sangkatou apan waṛṛani sumimbakka.

⁴⁰ Ana see i Saul nabbisarate su tumana'u Israel sarangkanambone, “I yamiu sarangkanambone darisikka su samba'a isindi.” I mangitou sinumimbakka, “Ṛinone i Tuangnga mammanara tumuṛṛuttu su ṛingiddi Tuangnga udde mapia.”

⁴¹ Wua'udde i Saul niumal᷊iomante, “Mawu, Ruatan Israel, anio allo indi I'o tawe sinumimbakka aal᷊iomangku? Mawu simbakke si ya'u wuassu manga watu apan susi indi. Amungkangu pasasal᷊a udde naṛṛina si ya'u ara'e si Yonatan, simbakke ringannu watu Urim, arawe amungkangu pasasal᷊a udde su al᷊aṛṛanang-Ngu Israel, simbakke ringannu watu Tumim.” Ne sasimbakku Mawu nata'e si Yonatan wuṛṛu si Saul; ringannu aroddi tumanangnge tawe sal᷊ane.

⁴² Ana see i Saul nabbisarate, “Oh Mawu, tantuna'e suwallati ya'u ara'e i Yonatan.” Ne i Yonatan apan tinantunna nassal᷊a.

⁴³ Ana see i Saul nabbisara si Yonatan, “Apate apan buatte niolangngu?” I Yonatan sinumimbakka, “I ya'u buatte na'inumma pul᷊a addio'a apan ta'u nianu ringannu pentakku ta'inna; ya'u nasaddiate pateanna.”

⁴⁴ Unni Saul si tou, “Antimanna ya'u iṛṛuumannu Ruata amungkangu i ya'u tawe pateanna, Yonatan!”

⁴⁵ Arawe tumana'u soa nabbisara si Saul, “Apa ṛinone i Yonatan iṛṛuumanna pateanna? Sumbal᷊i ete i tou apan nangapiddu auntunganna apan bahewalla indi? Tawe! Yami maddiandi ringannu arannu Mawu apan biakka, manungku i Yonatan tawe wotongnge awul᷊iannu sambua uta'a wuassu puane. Ana waugu su tul᷊ungannu Mawu, i tou naasombate auntunganna allo indi.” Etearoddi i Yonatan nasal᷊amatta wuassu iṛṛuumanna pateanna.

⁴⁶ Wua'udde taumatan Filistin nabelengke watukku wageangngu leta'i mangitou sassane ana waugu i Saul tate mangenggenna si mangitou apia.

Araratuanna wuṛṛu amonanni Saul

⁴⁷ Napawe i Saul naola'e ratun Israel, i tou napapangalote su al᷊awo'u tampa lullawangnga anambon seettu Israel, eteudde taumatan Moab, taumatan Amon, wuṛṛu taumatan Edom, manga ratun banua Zoba, wuṛṛu taumatan Filistin. Su al᷊awo'u tampa udde i tou napapangalo, i tou sidutu ma'auntungnga.

⁴⁸ I tou napapangalo ringannu matohassa wuṛṛu waṛṛani wuṛṛu ana see namaddon taumatan Amalek, see lai namallossu taumatan Israel wuassu taṛṛinon taumata taṛṛa aṛṛo.

⁴⁹ Manga ana'i Saul umbasanna eteudde i Yonatan, i Yiswi, wuṛṛu i Malkisua. Ana'a maṛṛuala pahul᷊u aranne i Merab wuṛṛu iapa aruane aranne i Mikhal.

⁵⁰ Awingnge aranne i Ahinoam, ana'i Ahimaas; tembonannu tantarane eteudde i Abner ana'i Ner, eteudde iamangnga tuarin si Saul.

⁵¹ I Kish iamangngi Saul, wuṛṛu i Ner iamangngi Abner udde ana'i Abiel.

⁵² Su al᷊o'engngu pabbiaṛṛanne i tou sidutu uapapangalo mando'appa taumatan Filistin. Ana waugu udde, napawe i Saul maasilo taumata apan matohassa ara'e waṛṛani, lapiddu olaanne tantarane.