1 SAMUEL 13 - WUKE SUSI WATTI'U AL᷊AL᷊USASSA

Pangalo nando'appa taumatan Filistin

¹ Su allo sambau, sutempo i Saul naola'e ratu,

² i tou namile 3.000 su atoune taumatan Israel; suwallatti mangitou 2.000 su atoune uatana'a ringanni tou su Mikhmas wuṛṛu su panenteannu Betel, wuṛṛu 1.000 su atoune inaite lai ringanni Yonatan anangnge esakka su Gibea, su wageangngu leta'u ruanganni Benyamin. Lambene wua' isudde tumanangnge niwala niapaapul᷊e su wal᷊en sambau-sambau.

³ Wua'udde i Yonatan namate tembonannu tantaran Filistin su Gibea, wuṛṛu ana see walahannu Filistin naaringikka lai arariadianna udde. Wua'udde i Saul nandolokku taumata niapatiuppa trompeta su ahewallu wanua iapawago taumatan Ibrani tadea'u inaite mapapangalo.

⁴ Su anambon walahannu Israel niapasingkatta manungku i Saul buatte namate tembonannu tantaran Filistin udde wuṛṛu manungku taumatan Filistin tumaniten maddantinnu taumatan Israel. Ana waugu udde tumana'u soa niumitu'a wawaggo wuṛṛu niammulen Saul su Gilgal.

⁵ Tantal᷊anna udde taumatan Filistin naammulle lai ana waugu inai mamangalo taumatan Israel; i mangitou uatahuanna 30.000 keretan pangalo, 6.000 taumata uasa'e awal᷊o, wuṛṛu manga tantara ere anne su sahatta anambone. I mangitou naddasanna su Mikhmas samba'an ra'i Bet-Awen.

⁶ Wua'udde i mangitou namangalote ringannu tawe ampungnge su taumatan Israel, na'oman sara taumatan Israel matta'utte. Addaalle lai taumatan Israel uaimbuni sulal᷊ummu loṛṛangnga wuṛṛu liangngu wowone ara'e pasisalle'a su manga watu, ara'e sulal᷊ummu paṛṛihi wuṛṛu loṛṛangnga su leta'a,

⁷ piaddu lai tinumumbe Sal᷊ukku Yordan wuṛṛu sinumutta watukku wageangngu leta'i Gad wuṛṛu Gilead. I Saul ta'e su Gilgal, wuṛṛu tumanangnge apan uatantalongnga mangke mangngiladdu atata'utta.

⁸ I Saul uaṛṛaddo si Samuel pitu allo al᷊annune, ere su tanatan Samuel si tou, arawe i Samuel taambe lai nirumanta su Gilgal, see lai i Saul itantangken tumana'u soane.

⁹ Ana waugu udde i tou nabbisara si mangitou, “Apira'e inawarendi sasamba itattambunna wuṛṛu sasamban paddarame udde.” Ana see i tou sassane nangonggollu sasamba itattambunna udde.

¹⁰ Arawe wakkutte i tou nanginsue manarane, i Samuel nirumantate. I Saul nanal᷊oho si tou wuṛṛu nattabea,

¹¹ arawe i Samuel naiwal᷊o, “Apate apan buatte niola'i Tuangnga?” I Saul sinumimbakka, “I ya'u naasilo manungku tumana'u soa mannattakke mannantangku, arawe i Papa taambe lai nirumanta sutempo apan buatte nitantunni Papa. Wuṛṛu lai taumatan Filistin uaammulle su Mikhmas.

¹² Ana see ṛingi'u, aṛṛengenne tantaran Filistin ete tal᷊angkadio'a lai mamangalote si ya'u isindi su Gilgal, sumbal᷊i ya'u taambe sinumal᷊ande aakkanna su Mawu. Ana waugu udde ya'u nakkawessa mangonggollu sasamba udde.”

¹³ Naaringkka udde i Samuel nabbisara si Saul, “Pallal᷊agun Tuangnga udde tumaniten longonna. Amungkangu i Tuangnga matuṛṛutta parentan Mawu Ruatan Tuangnga, Mawu sarun manantunni Tuangnga wuṛṛu papapulunni Tuangnga maola'a ratu su Israel saran mal᷊annu-l᷊annu.

¹⁴ Arawe orassa indi aratuanni Tuangnga tawe mal᷊annu. Ana waugu i Tuangnga tawe naddaringikka parentan Mawu, ne Mawu buatte namile taumata waine apan ipa'apulu-Ne itenega maola'a ratun pabbawala-Ne.”

¹⁵ Wua'udde i Samuel nanantangngu Gilgal wuṛṛu nanassukku amatanne watukku Gibea su wageangngu leta'i Benyamin. Tantal᷊anna udde i Saul namarikissa tantarane, sarangkanambone iraṛṛangngo 600 su atoune.

¹⁶ Etearoddi i Saul wuṛṛu i Yonatan anangnge esakka, wuṛṛu tantaran mangitou naddasanna su Gibea su wageangngu leta'i Benyamin; arawe taumatan Filistin naddasanna su Mikhmas.

¹⁷ Sutempo udde lai tatallu ammul᷊annu taṛṛa aṛṛo taumatan Filistin inaite wuassu paddasanannu Filistin inai mangaṛṛo; ammul᷊anne sambau inaite watukku Ofra su wageangngu leta'i Syual,

¹⁸ ammul᷊anna aruane lai mattuddan passaranna apan uasaruanna watukku wawal᷊annu Zeboim wuṛṛu su wadda'a.

¹⁹ Su ahewallu Israel tawe mananassalla hal᷊ele, ana waugu taumatan Filistin tawe mamalan taumatan Ibrani mallanginnu hal᷊ele wuṛṛu sambeangnga.

²⁰ Nariaddi taumatan Israel ṛinone inai ringannu taumatan Filistin amungkangu mangasa laringnge, papasolle, wal᷊iungnge wuṛṛu hal᷊elene;

²¹ wawaekke eteudde sambau roitta addio'a ipangasan bal᷊iungnga wuṛṛu ipangapia saranapa hahesekka sapi, wuṛṛu darua roitta addio'a ipangasan lari'u pajeko ara'e pasolla.

²² Ete ana waugu udde, su allon pangalo su Mikhmas udde, tawe saran sangkatou wuassu tumana'u Israel pia hal᷊ele ara'e sambeangnga, tumba'u i Saul wuṛṛu Yonatan anangnge esakka.

²³ Taumatan Filistin nangaddon sambau tampan pandariaganna ipanahekku sambau wa'an bowone su Mikhmas.