1 SAMUEL 11 - WUKE SUSI WATTI'U AL᷊AL᷊USASSA

I Saul namaddon taumatan Amon

¹ Wua'udde i Nahas, ratun Amon, nangapiddu tantarane ana see namangalo soan Yabesh su wageangngu leta'u Gilead. Taumatan Yabesh nangonggolu ṛingidda si Nahas, “Pa'ola'e pa'aire ringanni yami, ne yami sarun massuṛṛubbawa si'o.”

² I Nahas sinumimbakka, “Apa ete ringannu darorongnga udde ya'u ma'apulu ma'ola'a pa'aire, ‘Mata aikkatannu sambau-sambau ta'u loetanna maola'a sambau aal᷊uandaga su anambon taumatan Israel!’ ”

³ Wua'udde manga piaṛṛa'u soa Yabesh sinumimbakka, “Yami maddorongnga tempo al᷊annune pitu allo tadea'u yami wotongnge mandolokku daroloṛṛanna su ahewallu leta'u Israel. Amungkangu piaddu maddiri mantul᷊ungngi yami, ne yami sarun massuṛṛubawa si'o.”

⁴ Etearoddi manga daroloṛṛanna udde na'omate su Gibea, sutampa atatanaanni Saul. Sutempo i mangitou namasingkattu watti'a udde, tumanange nilumuaite ana waugu sussassilla.

⁵ Su orassa udde i Saul wakkute nirumanta wuassu wailla ringannu uaapiddu sapi. I tou naiwal᷊o, “Pia apa? Anio anambon taumata lulluai?” Ana see i tou niwal᷊oannu watti'a apan niapasingkattu daroloṛṛanna wuassu Yabesh udde.

⁶ Naaringikka udde, i Saul niintaṛṛoannu Ghaṛṛahon Duata.

⁷ Ringannu lembon nasa'u nanganu darua sapi ana see niṛṛata wuṛṛu nitattaddi tou nabbal᷊i manambo abbuwune. Wua'udde manga abbuwune udde niwuatta su ahewallu leta'u Israel ringannu parenta arendi, “Isai maddiri inai mapapangalo tumantalongnga si Saul wuṛṛu si Samuel, manga sapine sarun abbuwuanna arendi lai!” Walahannu Israel nata'utta su sarangakanambone apan a'olaannu Mawu, ne anambon taumata, tawe lallingnge, uasaddiate inai mapapangalo suadio'a.

⁸ I mangitou niammulla wuṛṛu nireengnga su Bezek; Pia 300.000 su atoune taumatan Israel, wuṛṛu 30.000 su atoune taumatan Yehuda.

⁹ Ana see su daroloṛṛanna wuassu Yabesh niapasingkatta arendi: “Wal᷊oa'a su tumana'u Yabesh, manungku tiṛṛabbi marua allo maṛṛangattu allattune, i mangitou sarun maasomba aontolla.” Napawe tumana'u Yabesh naasengkamma tanata indi, i mangitou lembon lulluassa.

¹⁰ I mangitou nabbisara si Nahas, “Tiṛṛabbi yami sarun massuṛṛubbawa, wuṛṛu walate apulun naungngu ma'ola'a si yami.”

¹¹ Tiṛṛabbine marua'allo, i Saul nattahiate manga taumatane naola'a. Wuṛṛu napawe matannallo rumuitte i mangitou inaite watukku pattangngannu paddasanannu taumatan Amon udde lapiddu namangalo si mangitou. Taambe na'allattune, tantaran Saul buatte namaddon seetta. Manga taumatan Amon apan naatal᷊angnga, nassal᷊iawukka na'oman sara taweddu naatal᷊angnga suadio'a.

¹² Wua'udde walahannu Israel naiwal᷊ote si Samuel, “Suapate manga taumata tanginna apan waṛṛani mabbisara manungku i Saul tawe sulal᷊anne maola'a ratun kite? Taumata udde ṛinone itantilli Papa si yami, tadea'u pateanni yami.”

¹³ Arawe i Saul nabbisara, “Imbaṛṛangnga pia sangkatou pateanna su allo indi, ana waugu su allo indi Mawu buatte nanal᷊amatta Israel.”

¹⁴ Ana see i Samuel nabbisarate si mangitou, “Wette i ite sarangkanambone inaite watukku Gilgal, wuṛṛu manenegi Saul maola'a ratun kite.”

¹⁵ Ne i mangitou sarangkanambone inaite watukku Gilgal, ne sutampa patataṛṛamawuanna udde i Saul nitenega naola'a ratu. I mangitou nangonggollu sasamban paddarame, wuṛṛu i Saul suadio'a ringannu walahannu Israel naddamea arariadianna udde.