1 SAMUEL 1 - WUKE SUSI WATTI'U AL᷊AL᷊USASSA

I Elkana wuṛṛu amonanne su Silo

¹ Pia sangkatou esakka, aranne i Elkana, wuassu ruanganni Efraim. I tou uatana'a su soa Rama, su leta'u panenteannu Efraim. Elkana udde ana'i Yeroham wuṛṛu pulunni Elihu. I tou nasutta amonanni Tohu, papapulunni Zuf.

² I Elkana pia darua awingnge, i Hana wuṛṛu i Penina. I Penina pia ana'a, arawe i Hana tawe ana'a.

³ Suapan mattonna i Elkana manantangngu Rama inai mattaṛṛamawu su Silo wuṛṛu mangonggolu sasamba su Mawu Apan Lembontaṛṛino. Apan naola'a imammu Mawu su Silo eteudde i Hofni wuṛṛu i Pinehas, al᷊aṛṛana'i Eli.

⁴ Tumaniten suapan i Elkana mangonggollu sasamba, i Penine wuṛṛu al᷊aṛṛanangnge sangkatou-sangkatou onggol᷊annu samba'a wuassu ṛemessu sasamba udde.

⁵ Arawe i Hana tumba'u nionggol᷊annu kadio'a ana waugu Mawu tawe nangonggolu ana'a si tou. Salaiwe aroddi i Elkana sidutu marangngu si Hana.

⁶ I Hana sidutu raddal᷊eoanna naungnge wuṛṛu aal᷊uandahanni Penina, awingngi Elkana su liudde udde, ana waugu Mawu tawe nangonggollu ana'a si tou.

⁷ Olangnge udde nariaddi, wuassu tonna ipa'alla tonna; amungkangu i mangitou inai su Wal᷊en Mawu, i Penine sidutu mangngeetta si Hana. Masokka i Hana lumuai wuṛṛu maddiri umanna ana waugu i tou aal᷊uandahanna.

⁸ Ana see masokka lai i Elkana, awingnge, maiwal᷊o, “Anio i'o lulluai Hana? Anio i'o maddiri umanna wuṛṛu sidutu massusa? Wal᷊inewe ya'u maareganna wuassu siri mapul᷊o ana'u esakka udde?”

I Hana wuṛṛu i Eli

^9-10 Su allo sambau napawe i mangitou buatte niumanna su Wal᷊en Mawu su Silo, i Hana nabbuatta wuassu meddan annananna. Orassa udde lai i Imam Eli apan uatana'a su Wal᷊en Mawu, tantal᷊anna ua'ianna maranin ngara. Ringannu massusa i Hana niumal᷊iomanna su Mawu lapiddu lulluai.

¹¹ Wua'udde i Hana nabbisara pa'aire, wisarane, “Mawu Apan Lembontaṛṛino, tannoi'o allangngu indi! Ellehete asasusan allangngu. Naungete allangngu wuṛṛu arie maabul᷊in allangngu! Amungkangu I'o mangonggolu sangkatou ana'a esakka, allangngu maddiandi i tou sarun ionggolla Si'o su al᷊o'engngu pabbiaṛṛanne. Allangngu maddiandi lai manungku utangnge sarun tawe pol᷊oanna.”

¹² Mal᷊annu atonna i Hana u'al᷊iomanna, wuṛṛu i Eli mannutukka moṛṛongngu wawine udde.

¹³ I Hana u'al᷊iomanna sulal᷊ummu naungnge, nariaddi tumba'u wiwikke apan u'al᷊ore, arawe tingikke tawe aringiṛṛanna. Ana waugu udde i tou sassunnanni Eli wu'anna.

¹⁴ Ne i Eli nabbisarate si tou, “I'o ariete pabbu'anna isindi! Ariete pa'inumma anggore apia!”

¹⁵ Arawe i Hana sinumimbakka, “I ya'u wal᷊ine wu'anna, Papa, ya'u tawe na'inumma anggore! I ya'u niasueante ṛingidda, ne u'al᷊iomanna mabbatti'u anambon asasusa'u su Mawu.

¹⁶ Ariewe i yamiu indi massunna si ya'u wawinen dal᷊anna. I ya'u niumal᷊iomanna ereindi ana waugu ya'u tumaniten massusa.”

¹⁷ Ana see i Eli nabbisara, “Amungkangu aroddi apul᷊ete ringannu sal᷊amatta. Antimanna Mawu Ruatan Israel maddaringikka darorongngu.”

¹⁸ I Hana sinumimbakka, “Antimanna ya'u maasomba al᷊amatta wuassi Papa.” Wua'udde i tou napul᷊ete, ana see niumanna; wuṛṛu tate lai massusa.

I Samuel niasungkanga wuṛṛu nionggolla su Mawu

¹⁹ Tiṛṛabbine marua'allo i Elkana wuṛṛu amonanne napu'ote maṛṛanggappa, wuṛṛu napawe buatte nattaṛṛamawu su Mawu, i mangitou napul᷊ete watukku Rama. Ne i Elkana natatambaten Hana, awingnge udde.

²⁰ Wawine udde piate illoṛṛo wuṛṛu nanungkangu sangkatou ana'a esakka. Ana udde nisaggo Samuel, wisarane, “Buatte ta'u niroronganna su Mawu.”

²¹ Nia'omante tempone i Elkana wuṛṛu amonanne inaite su Silo apia mangonggolu sasamban tonna su Mawu. Waine lai manungku i Elkana buatte naddiandi sarun mangonggolu sasamba apan apianne.

²² Arawe paassa indi i Hana tawe tinumantalongnga. I tou nabbisara awingnge, “Napawe nangaddoten pasasusu, i Samuel sarun ta'u iuntudda su Wal᷊en Mawu, wuṛṛu i tou sarun matana'a poiaroddi sarangkal᷊o'enge.”

²³ I Elkana sinumimbakka, “Ore, ola'e tumuṛṛuttu aellegu udde mapia; atana'e su wal᷊en maddatingngu a'omanna tempone i'o mallaassa ana'i yaddua. Ne antimanna Mawu ma'ola'a pa'airenu udde lumiatta'a.” Nariaddi, i Hana natana'e su wal᷊en na'oman sara tempone anangnge la'asanna.

²⁴ Napawe i Samuel nila'asse, i tou niuntudden inangnge watukku Wal᷊en Mawu su Silo. Sutempo udde i tou ta'e addio'a. I Hana nangapiddu sapi esakka uukke tallu tonna, gandumma mapul᷊o su kilone, wuṛṛu sambau pato'a wuassu pisi apan napenen anggore.

²⁵ Sapi udde niṛṛata, ana see i Samuel niuntudda ringanni Eli.

²⁶ I Hana nabbisara si Eli, “Madorongnga ampungnga, Papa. I Papa ta'e ma'anaungnga si ya'u? I ya'u indi wawine apan su paassa niasiloanni Papa uarisikka isindi, tantal᷊anna u'al᷊iomanna su Mawu.

²⁷ Ete ana'a indi apan ta'u niroronganna su Mawu. Aal᷊iomangku buatte niraringiṛṛan-Ne,

²⁸ ne ana waugu udde ana'a indi ta'u itantilla maola'a pussaan Mawu su al᷊o'engngu pabbiaṛṛanne.” Wua'udde i mangitou nattaṛṛamawute naddalo Mawu.