1 PETRUS 4 - WUKE SUSI WATTI'U AL᷊AL᷊USASSA

Wiakka apan wakku

¹ Ana waugu Kristus suete natataṛṛanga su ola'u wadanga, i yamiu lai ṛinone mannohassa ririnu ringannu apulu naugnga ereudde. Ana waugu taumata apan uatataṛṛanga su ola'u wadanga, tate lai ma'ola'a rosa.

² Ana waugu udde, ṛinone i yamiu sidutu mabbiakka su runia indi tuttuṛṛuta apulun Duata, wuṛṛu wal᷊ine tuttuṛṛuta apulun taumata.

³ Su tempo apan nal᷊iu, iamu mal᷊annute maapulu ma'ola'a apa apan a'olaannu manga taumata apan tawe maaillal᷊a Mawu. I yamiu mabbiakka su al᷊al᷊eo. I yamiu tuttuṛṛuta apulu naungnga, mabbu'anna, maddamea, ma'inumma wuṛṛu massubba paal᷊uanna apan maarantinna.

⁴ Orassa indi taumata apan tawe maaillal᷊a Mawu, tinumiangnga manungku i yamiu tawe nabbiakka ere i mangitou, ma'ola'a rosa walate apulune. Ana waugu udde i mangitou mangngal᷊uandaga si yamiu.

⁵ Arawe i mangitou ṛinone mangonggolu sasimbakke su Ruata apan nasaddiate mamarikissa taumata wiakka wuṛṛu nate.

⁶ Ana waugu udde Watti'u Al᷊al᷊uassa suete niapaasingkata lai su manga taumata nate. Pandumanne tadea'u i mangitou apan suete niparikisanna ere su ola'u wadanga – ere lai anambon taumata apan sarun parikisanna – wotongnge mabbiakka su ola'u ghaṛṛaho, tumuṛṛutta apulun Duata.

Mangangatokku aonggolu Ruata

⁷ Sarangkanambone maraniten panginsueanne, ana waugu udde ṛinone i yamiu ua'ul᷊inna apulun wadangnga wuṛṛu uariagga, tadea'u i yamiu wotongnge umal᷊iomanna.

⁸ Nangillembo wuassu sarangkanambone udde, ṛinone i yamiu atonna-tonna uararangngu sangkatou ringannu waine, ana waugu ringannu uararangngu i yamiu sarun uaa'ampunga lai.

⁹ Ṛinone i yamiu uasasal᷊oho sangkatou ringannu waine sulal᷊ummu wal᷊enu sambau-sambau, ringannu tawe sumamboṛṛe.

¹⁰ I yamiu sambau-sambau suete nanengkamma aonggola apan uapapaṛṛala wuassu Ruata. Ana waugu udde ere sangkatou mangangatokka apan mapia wuassu manga aonggolu Ruata ṛinone i yamiu mapaahunan apande udde si yamiu suaddio'a.

¹¹ Taumata apan namasingkatu watti'a, ṛinone mamasingkatu watti'a wuassu Ruata; taumata apan mangngimbe taumata waine, ṛinone mangimbe ringannu atatohassa wuassu Ruata, tadea'u al᷊awo'u manaran, Duata wotonge wantuhanna sulalummi Yesus Kristus. Ete i Tou apan uataṛṛino wuṛṛu ṛinone wantuhanna ma'oman sara mal᷊annu-l᷊annu. Amin.

Asasusan taumatan Saṛṛani

¹² Manga tuṛṛangnga apan arangnguanna! I yamiu orassa indi lembon uatataṛṛanga susa ana waugu tantal᷊anna iaannamma. Arawe arie tumiangnga, paṛṛimaunnapa ere pia sambau riaddianna apan wahewalla mariaddi si yamiu.

¹³ Ewe'e ṛinone i yamiu mamendama al᷊al᷊uassa ana waugu uatataṛṛanga suaddio'a ringanni Kristus. Ne napawe awawantugi Kristus niapaal᷊iatta'a, i yamiu sarun lumuassa.

¹⁴ I yamiu naauntungnga amungkangu i yamiu aal᷊uandahanna ana waugu i yamiu mallal᷊aṛṛenggenni Kristus. Udde atappasanne Ghaṛṛaho apan mawantuga, eteudde Ghaṛṛahon Duata udde sulal᷊ummu naungngu.

¹⁵ Arie pia sangkatou wuassu wallatti yamiu uatutaṛṛangnga ana waugu i tou taṛṛa pate, ara'e taṛṛa ta'o, ara'e taumata lal᷊eo, ara'e ana waugu i tou ual᷊alo'a hatton taumata waine.

¹⁶ Arawe amungkangu i yamiu uatataṛṛangnga ana waugu i yamiu taumatan Saṛṛani, ariewe masili ana waugu inolaanna udde. Paadiangkamante su Ruata, manungku i yamiu uaapiddu aranni Kristus.

¹⁷ Nia'omante tempone Ruata mamarikissa runia. Wuṛṛu ete walahannu Ruata sassane apan sarun parikisanna paarorone. Ne, amungkangu Ruata manattakke mamarikissa si ite, ereapate manga taumata apan tawe mangngimanna Watti'u Al᷊al᷊uassa wuassu Ruata udde?

¹⁸ Sulal᷊ummu Wuke Susi uawoṛṛetta arendi, “Amungkangu manga taumata apan mapia lai ete masahadda iapaasal᷊amatta, nangillembote lai mariaddi su manga taumata marosa apan tawe maaillal᷊a Mawu!”

¹⁹ Ana waugu udde, amungkangu pia taumata apan uatataṛṛanga ana waugu Ruata mappandumma aroddi, ṛinone manga tumata udde mabbiakka ringannu mapia wuṛṛu manantillu watanganne su Mandariaddi si mangitou. I Tou siddutu mapaatipussu paaire-Ne.