1 PETRUS 3 - WUKE SUSI WATTI'U AL᷊AL᷊USASSA

Rua sangkawinganna

¹ Aroddi lai yamiu, manga awingnga wawine, ṛinone tumuṛṛutta su awingngu tadea'u amungkangu su wallatti mangitou apan piaddu tawe mangngimanna watti'u Ruata, ete pallal᷊agunu wotongnge ma'ola'a si mangitou mangngimanna. Wuṛṛu tawe wotonge i yamiu mabbisaran apa-apa si mangitou,

² ana waugu i mangitou naasilote pallal᷊agunu apan matul᷊idda wuṛṛu susi.

³ Arie araṛṛamagu tumba'u araṛṛamaga su liudde, ere tul᷊adane mallaukka uta'a ara'e mappaattu lal᷊oggakka, ara'e laubba apan maarega.

⁴ Arawe ṛinone araṛṛamagu lumapputa wuassu lal᷊ummu naungngu, pallal᷊agunu apan masaṛṛionto'a wuṛṛu matammuda; ana eteudde araṛṛansangnga apan tawe panginsueanne wuṛṛu lembon maarega su aellegu Ruata.

⁵ Ringannu olangnge indi su tempo rorone manga wawine pia agamane apan uaantimma Ruata mallogaka ririne ringannu tuttuṛṛuta awingngi mangitou.

⁶ Sara lai aroddi, tou matuṛṛutta si Abraham wuṛṛu nanaggon tou mawune. Tuṛṛanga orassa indi naola'a al᷊aṛṛana'i Sara, amungkangu i yamiu ma'ola'a inolaanna apan mapia wuṛṛu tawe matta'uttu apa-apa.

⁷ Wuṛṛu i yamiu lai, manga awingnga esakka, ṛinone mabbiakka ringannu napenen pasasunna su saruannu awingngu, wuṛṛu ringannu asingkata manungku ete i mangitou udde walahanna apan lome. Olaawe i mangitou ringannu addata, ana waugu i mangitou su sambau ringanni yamiu, sarun manengkamma al᷊amattu pabbiaṛṛana apan tutune wuassu Ruata. Olaawe indi, tadea'u taweddu maasal᷊awa'a aal᷊iomannu.

Nasusa ana waugu ma'ola'a apapia

⁸ Panginsueanne eteudde: Ṛinone manga tuṛṛangnga uasampinunutanna wuṛṛu su apendama sambau. Ṛinone i yamiu uararangngu ere sangkatuṛṛanganna. Wuṛṛu ṛinone i yamiu uaa'akkana, wuṛṛu uasasaṛṛionto'a.

⁹ Arie mabbal᷊issu al᷊al᷊eo ringannu al᷊al᷊eo, ara'e lal᷊ela wal᷊isannu lai lal᷊ela; arawe wal᷊isete ringannu maddorongnga al᷊amatta wuassu Ruata. Ana waugu Ruata namaggo si yamiu tadea'u i yamiu manengkamma al᷊amatta wuassi Tou.

¹⁰ Sulal᷊ummu Wuke Susi uawoṛṛetta arendi, “Taumata apan maapulu mabbiakka wuṛṛu maapulu mamendama miallo-miallo apan mapia, ṛinone mandiagga moṛṛonge tadea'u tawe maggahatto manga inolaanna lal᷊eo wuṛṛu tawe maapabbisaran bawahia.

¹¹ I tou ṛinone mangindaun al᷊al᷊eo wuṛṛu ma'ola'a apapia; ṛinone i tou mattinsahadda atonna-tonna ana see maasomba paddarame.

¹² Ana waugu Mawu sidutu ma'ellega manga taumata apan tuttuṛṛutta apulu-Ne, wuṛṛu Mawu sidutu maddaringikka manga aal᷊iomanni mangitou; arawe Mawu lullawangnga manga taumata apan ma'ola'a al᷊al᷊eo.”

¹³ Isai maapulu mandal᷊eo si'o, amungkangu i yamiu mal᷊uassa ma'ola'a apapia?

¹⁴ Arawe salaiwe i yamiu uatataṛṛanga ana waugu ma'ola'a manga inolaanna mapia, i yamiu naauntunga! Arie paata'utti sai-sai wuṛṛu arie suminggawangnga.

¹⁵ Arawe sulal᷊ummu naungngu, ṛinone i yamiu mangonggolu addatta si Kristus sassane ana waugu i Tou Mawu. Wuṛṛu ṛinone i yamiu siddutu uasaddia sumimbaka anambon taumata apan maiwal᷊o si yamiu su ola'u antimma apan tatahuannanni yamiu.

¹⁶ Arawe olaawe udde ringannu masaṛṛionto'a wuṛṛu aaddata. Wuṛṛu ṛinone lal᷊ummu naungngu waresi, tadea'u amungkangu i yamiu al᷊uandahanna ana waugu i yamiu mabbiakka ringannu mapia ere tumatantalongngi Kristus, ne taumata apan mangngal᷊uandaga udde sarun masili sassane.

¹⁷ Mappianne matataṛṛangnga ana waugu ma'ola'a apapia – amungkangu udde apulun Duata – wuassu uatataṛṛanga ana waugu ma'ola'a al᷊al᷊eo.

¹⁸ Ana waugu Kristus sassane nate tumba'u paassa, ma'oman sara mal᷊annu-l᷊annu ana waugu rosan taumata – sangkatou apan tawe sal᷊ane, nate hunan taumata apan nassal᷊a. Kristus naola'a udde tadea'u i Tou wotongnge mangehetta si yamiu ringannu Ruata. I Tou nipate su ola'u wadanga arawe niaapawiakka apia su ola'u Ghaṛṛaho.

¹⁹ Sulal᷊ummu Ghaṛṛaho i Tou inai namasingkatu watti'u Ruata su manga ghaṛṛaho apan uaṛṛuumanna:

²⁰ eteudde ghaṛṛaho manga taumata apan mal᷊awangnga Ruata su tempo Nuh. Su tempo udde Ruata uaraṛṛaddo ringannu sabare tantal᷊anna Nuh mallanginnu apalla. Tumba'u manga taumata apan sulal᷊ummu apalla – sarangkanambone siri ual᷊u – apan nisal᷊amatta wuassu manawangnga apan wahewalla udde.

²¹ Ne riadianna udde naola'a sambau sasumandinga wuassu sasaṛṛani apan orassa indi mannal᷊amatta si yamiu. Sasaṛṛani indi wal᷊ine sambau lal᷊agu ipammaresi wadanga wuassu anambon luhuda, ewe'e maola'a sambau paairenu su Ruata wuassu lal᷊ummu naungnga apan mapia. Sasaṛṛani udde mannal᷊amatta si yamiu ana waugu Yesus Kristus suete nabbiakka apia wuassu papate,

²² wuṛṛu suete nasengkenga su surga. Orassa indi i Tou uataṛṛino suaddio'a ringannu Ruata wuṛṛu uaparenta anambon malaekatta, anambon tembonanne see lai anambon atatohassa.