1 PETRUS 1 - WUKE SUSI WATTI'U AL᷊AL᷊USASSA

^1-2 Manga tuṛṛangnga walahanna nipilen Duata, apan uasal᷊iawukka su anambon banua su leta'u Pontus, Galatia, Kapadokia, Asia wuṛṛu Bitinia! I ya'u, Petrus, rasulli Yesus Kristus, mangngantimma doronganna Ruata mangonggolu al᷊amatta wuṛṛu paddarame si yamiu ringannu manambo-nambo. I yamiu nipile maola'a al᷊aṛṛana'u Ruata uasul᷊ungngu ere pandumannu Ruata Iamangnga. Wuṛṛu Ghaṛṛahon Duata suete na'ola'a si yamiu walahanna apan na'ukkassa, tumba'u su Ruata, tadea'u i yamiu matuṛṛuta su Mawu Yesus Kristus wuṛṛu niukkassu ṛaṛṛa-Ne.

Antimma apan matohassa

³ Wette i ite maadiangkamanna su Ruata, Iamangngu Mawun kite Yesus Kristus! I Tou lembon marangngu si ite, ana waugu udde i Tou nangonggolu wiakka wakku si ite, ringannu napaawiakku Mawu Yesus Kristus apia wuassu papate. Indi nangonggolu antimma apan matohassa si ite.

⁴ I ite mangngantimma maatahuanna manga al᷊amatta apan suete nisaddian Duata su al᷊aṛṛanang-Nge, eteudde manga al᷊amatta apan niadone su surga, na'oman sara tawe mal᷊al᷊eo, ara'e mawukku'a ara'e mawulle.

⁵ Sarangkanambone udde ionggola si yamiu, ana waugu i yamiu mangngimanna Ruata. Ne i yamiu rariagannu taṛṛinon Duata tadea'u i yamiu manengkamma asasal᷊amatta apan nasaddiate iapaal᷊iatta'a su allo pangudusanne.

⁶ Ana waugu udde ṛinone i yamiu lumuassa, salaiwe orassa indi tumba'u tal᷊an kadio'a i yamiu sarun masusa ana waugu i yamiu naapendama anambon hatin bawono'a.

⁷ Tuddane eteudde mattiala manungku tanne atonna-tonna i yamiu mangngimanna Mawu ara'e tawe. Wul᷊awanna lai apan wotonge mahohakka, iannamma su putungnga. Ne pangangimanni yamiu maareganne wuassu wul᷊awanna, nariaddi ṛinone lai iannama tadea'u maola'a matohassa. Wuṛṛu ringannu aroddi yamiu sarun raloanna wuṛṛu addatanna lapiddu iruitta su allo Mawu Yesus Kristus rumanta apia.

⁸ I yamiu marangngu si Tou, salaiwe dorone i yamiu tawe naasilo si Tou. Wuṛṛu i yamiu mangngimanna si Tou, manimbe orasa indi yamiu tawe maasila si Tou. Ana waugu udde i yamiu lulluassa, wuṛṛu uapaendama lal᷊ala'a apan mahewa wuṛṛu tawe iawisara.

⁹ Ana waugu tuddam pangangimannu nia'omanna, eteudde asasal᷊amattu niawanu.

¹⁰ Asasal᷊amatta indi apan a'inunuanna wuṛṛu sassaṛṛasirannu manga nabi, wuṛṛu i mangitou ma'innau al᷊amatta apan ionggolu Ruata si yamiu.

¹¹ I mangitou mammarikissa ereapa wuṛṛu angngerate olangnge udde sarun mariaddi, apan ipappandumu Ghaṛṛahon Kristus sulal᷊ummu wadangi mangitou. Su tempo udde Ghaṛṛaho-Ne nabbal᷊o si mangitou su ola'u manga asasusa apan ṛinone apendamanni Kristus wuṛṛu su ola'u awawantu-Ge apan manansuna wua'udde.

¹² Su manga nabi udde Ruata namasingkata manungku apa apan a'olaanni mangitou, wal᷊ine hunane si mangitou, ewe'e hunane si'o; eteudde manga inolaanna apan orassa indi aaringiṛṛani yamiu ringannu masemakka wuassu mabbawatti'u Watti'u Al᷊al᷊uassa su ola'i Yesus Kristus. I mangitou namasingkatu manga olangnge udde si yamiu ringannu taṛṛino Ghaṛṛahon Duata apan niapaapida wuassu surga. Wuṛṛu lai manga mala'ekatta maapulu lai maasingkata watti'a apan iapaasingkati mangitou udde.

Bawaggo su pabbiaṛṛana apan susi

¹³ Ana waugu udde, ṛinone i yamiu sidutu uariaga. Paatehamma wuṛṛu pangantimpe atonna-tonna su al᷊amatta apan sarun ionggola si yamiu su tempo Mawu Yesus rumanta apia.

¹⁴ Paatuṛṛute Ruata wuṛṛu arie mabbiakka tumuṛṛutta apulunu dorone, su tempo i yamiu taambe naaillal᷊a Ruata.

¹⁵ Arawe, ṛinone i yamiu susi su al᷊awo'u inolaanni yamiu, ere lai Ruata apan namaggo si yamiu udde susi.

¹⁶ Sulal᷊ummu Wuke Susi uawoṛṛetta, “Ṛinone i yamiu susi, ana waugu i Ya'u susi.”

¹⁷ I yamiu mannagon Duata udde Iamangnga su tempo i yamiu u'al᷊iomanna si Tou. Ne, ete Ruata udde apan mamarikissa taumata tumuṛṛuttu inolaannu sangkatou-sangkatou ringannu tawe pilene. Ana waugu udde tantal᷊anna i yamiu ta'e su runia indi, ṛinone i yamiu mamantuga Ruata sulal᷊ummu wiakku.

¹⁸ I yamiu masingkata apa apan buatte nipamaekka tadea'u ipamallosi yamiu wuassu pabbiaṛṛanna apan tawe gunane apan tinantillu iupungngu al᷊amonanu. Bawaekke wal᷊inewe saranapa apan wotongnge mawulle ere inai sal᷊a'a ara'e wul᷊awanna,

¹⁹ ewe'e sambau saranapa apan lembon maarega; eteudde wadangi Kristus sassane, apan naola'a ere domba nionggolla sasamba su Ruata ringannu tawe angngone.

²⁰ Kristus nipilen Duata ro'en runia indi taambe niriaddi. Wuṛṛu su miallo-miallo maddanin panginsueannu tempo indi, Tou nirumanta su runia tadea'u i yamiu iapaasal᷊amatta.

²¹ Ete wuassi Tou i yamiu mangngimanna Ruata apan suete napaawiakki Tou apia wuassu papate wuṛṛu namantuga si Tou. Nariaddi ete Ruata apan pangimananni yamiu wuṛṛu ete su Ruata lai apan pangantimanni yamiu.

²² Ana waugu i yamiu matuṛṛutta su al᷊aṛṛa'u Ruata, ne i yamiu namaresi wadanga wuṛṛu i yamiu tuttal᷊antupu manga taumata pangangimanne sambau ringannu atonna-tonna. Ana waugu udde, ṛinone i yamiu uararangngu sangkatou ringannu waine ringannu al᷊al᷊uassu naungngu.

²³ Ana waugu wuassu ṛengetannu Ruata apan wiakka wuṛṛu awasa udde, i yamiu suete niola'a taumata wakku apan wal᷊ine inariadianne wuassu taumata, ewe'e wuassu Mawu Iamangnga apan awasa.

²⁴ Sulal᷊ummu Wuke Susi uawoṛṛetta arendi, “Anambon walahannu taumata ere nannal᷊o, wuṛṛu ahewallu awawantu-Ge ere wungan nannal᷊o. Nannal᷊o tinumolangnga, wungane lai natontonga;

²⁵ arawe ṛengetannu Ruata siddutu sarangkal᷊oengnge.” Ṛengetanna udde Watti'u Al᷊al᷊uassa apan suete niapaasingkata si yamiu.