1 MARARATU 8 - WUKE SUSI WATTI'U AL᷊AL᷊USASSA

Wantallu Paairen Mawu niapidda watukku Wal᷊en

¹ Wua'udde Ratu Salomo nandolokku anambon piaṛṛa'u ṛuanganna wuṛṛu wawosoanna wuassu walahannu Israel rumanta ringanni tou su Yerusalem tadea'u mangingkattu Wantallu Paairen Mawu wuassu Sion, Soan Daud, watukku Wal᷊en Mawu.

² Ne i mangitou sarangkanambone nirumantate su Allon Ramea Rasannu Rongnga sulal᷊ummu wulanna Etanim.

³ Napawe anambon piaṛṛa'a naammulle, manga imam namasanna Wantallu Paaire udde,

⁴ wuṛṛu niapidda watukku Wal᷊en Mawu. Rasannu Mawu see anambon saranapane niingkatta lai watukku Wal᷊en Mawu ṛattangannu manga imam wuṛṛu taumatan Lewi.

⁵ Ratu Salomo wuṛṛu anambon tumana'u Israel naamulla su saruannu Wantallu Paaire udde ana see nangonggollu sasamba su Mawu domba wuṛṛu sapi apan tawe iareengnga anambone.

⁶ Wua'udde manga imam nangapiddu Wantallu Paaire udde sulal᷊ummu Wal᷊en Mawu wuṛṛu niaddo su al᷊ungngu manga paal᷊uannu mala'ekatta sulal᷊ummu Wabbo'a Lembon Susi.

⁷ Papaidu manga paal᷊uanna udde uasiappakka nanaapa wantalla udde wuṛṛu manga alu papasannane.

⁸ Alu papasanna udde mal᷊o'engnga atonna, na'oman sara manga pentakke aasiloanna wuassu saruannu Wabbo'a Lembon Susi. (Naddatingngu allo indi manga alu udde ta'e isudde.)

⁹ Sulal᷊ummu Wantaliu Paaire udde tawe lal᷊oṛṛone waine tumba'u darua watu. Manga watu udde buatte nitaṛṛon Musa isudde su Wowon Sinai, sutempo Mawu na'ola'a paaire ringannu walahannu Israel sutempo i mangitou sulal᷊ummu amatanna wuassu Mesir watukku wanua Kanaan.

¹⁰ Sutempo manga imam sinumababangnga wuassu Wal᷊en Mawu udde inaṛṛombanganne wal᷊en udde napene ma winabbawa.

¹¹ Winabbawa udde sussal᷊ol᷊otta awawantugu Mawu daranta na'aman sara manga imam tate naasutta apia ma'ola'a manara mangitou.

¹² Ne i Salomo niumal᷊iomante, wisarane, “Ete I'o apan nangaddon matannallo su langitta, oh Mawu. Arawe I'o lembo ma'apulu matana'a sulal᷊ummu ararandummu winabbawa.

¹³ Orassa indi ta'u niwangunna Si'o wal᷊en apan maṛṛansangnga, maola'a tampa atatanan-Nu saran mal᷊annu-l᷊annu.”

Sasinaukki Ratu Salomo su tumanangnge

¹⁴ Napawe buatte niumal᷊iomanna, Ratu Salomo nanaile anambon tumanangnge apan tantal᷊anna uarisikka isudde, ana see naddorongnga al᷊amattu Ruata hunan mangitou.

^15-16 I tou nabbisara, “Dorone Mawu buatte naddiandi su iamangku Daud arendi, ‘Ro'en i Ya'u nangapiddu uma-U sinumabbangnga wuassu Mesir, su ahewallu wanua Israel tawe saran sambau soa apan Ta'u nipile maola'a tampa suapa tampa pa'olaanna wal᷊en maola'a tampa patataṛṛamawuanna si Ya'u. Arawe i'o, Daud, Ta'u nipile mamarenta uma-U.’ Dalo su Mawu Ruatan Israel apan buatte nanipussa pa'aire-Ne udde!”

¹⁷ I Salomo nabbisara apia, “Iamangku Daud buatte nakkiinna mapararisikku wal᷊en tampa patataṛṛamawuanna su Mawu Ruatan Israel.

¹⁸ Arawe Mawu nabbisara si tou, ‘Pandumannu udde mapia.

¹⁹ Arawe, wal᷊ine i'o, ewe'e ete anangngu apan ma'ola'a wal᷊e-U udde.’

²⁰ Orassa indi Mawu buatte nanipussu pa'aire-Ne. I ya'u naola'e ratun Israel nallol᷊ossa iamangku, wuṛṛu i ya'u lai buatte napararisikku wal᷊en maola'a tampa patataṛṛamawuanna su Mawu, Ruatan Israel.

²¹ Sulal᷊ummu Wal᷊en Mawu udde buatte ta'u nissaddia tampa pangaddoannu Wantallu Pa'aire apan lal᷊oṛṛoannu watun pa'aire Mawu ringannu al᷊amonan kite sutempo nangapiddi mangitou sinumabbangnga wuassu Mesir.”

A'al᷊iomanni Salomo

²² Wua'udde, su saruannu tumanangnge apan uasemodda, Salomo dirumarisikka sinumaruanna mezbah ana see namatte limane ruan ba'a

²³ wuṛṛu niumal᷊iomanna, “Mawu, Ruatan Israel! Su langitta ara'e lai su runia taweddu ere I'o! I'o nanipussa pa'aire-Nu wuṛṛu napal᷊iatta'u darangngu-Nu su uman-Nu apan satia wuṛṛu matuṛṛutta ringannu ahewallu naungnga Si'o.

²⁴ I'o buatte nanipussu paaire-Nu su iamangku Daud. Apa apan buatte nipa'ire-Nu buatte nimanara-Nu allo indi.

^25-26 I'o lai buatte naddiandi su iamangku manungku amungkangngu papapulunne atonna-tonna matuṛṛutta Si'o ere i tou, ne sidutu sarun pia sangkatou wuassu papapulunne apan maola'a ratun Israel. Orassa indi, oh Mawu Ruatan Israel, natipusse lai anambon apan buatte nipa'ire-Nu su iamangku Daud allang-Ngu udde.

²⁷ Arawe oh Ruata, mappuluwe I'o matana'a su runia indi? Langitta sarangkanambone lai tawe tumaniten mal᷊alangnga Si'o, nangillembote wal᷊en patataṛṛamawuanna apan ta'u niola'a indi!

²⁸ Oh Mawu, Ruata'u, i ya'u allangng-U! Daringiṛṛewe aal᷊iomangku, wuṛṛu! Arawe daringiṛṛewe aal᷊iomangku, wuṛṛu onggol᷊a'awe darorongku allo indi.

^29-30 Antimanna allo ṛabbi I'o ual᷊u'adda wal᷊en indi apan buatte nipile-Nu maola'a tampa patataṛṛamawuanna Si'o. Antimanna wuassu tampa atatanaan-Nu su surga I'o maddaringikka wuṛṛu mangampungnga si ya'u see lai uman-Nu napawe yami sumaruanna wal᷊en indi wuṛṛu umal᷊iomanna Si'o.

³¹ Amungkangngu sangkatou niansil᷊anna nassal᷊a su saruannu taumata waine wuṛṛu iapidda su mezbah-Nu sulal᷊ummu wal᷊en patataṛṛamawuanna indi massalu manungku i tou tawe nassal᷊a,

³² oh Mawu, antimanna I'o maddaringikka wuassu surga wuṛṛu mamutussa hatto manga allang-Ngu indi. Ṛuumana'e iapa nassal᷊a uasul᷊ungngu inolaanne wuṛṛu pallosa'e iapa tawe sal᷊ane.

³³ Amungkangngu uman-Nu Israel iawaddon manga seenne ana waugu i mangitou marosa, ana see i mangitou mabbelengnga ringan-Nu wuṛṛu mangaddatta Si'o Mawu, wua'udde rumanta su wal᷊en patataṛṛamawuanna, indi see umal᷊iomanna maddorongnga ampunga Si'o,

³⁴ antimanna I'o maddaringikka si mangitou wuassu surga. Antimanna I'o mangampunga rosan uman-Nu indi, wuṛṛu mangapiddi mangitou mabbelengnga watukku wanua apan buatte nionggollu Mawu su al᷊amona mangitou.

³⁵ Napawe uman-Nu ma'ola'a rosa Si'o wuṛṛu I'o makkuumanni mangitou ringannu tawe nanossokku uranna ana see i mangitou mawal᷊u wuassu rosa mangitou wuṛṛu mangaddatta Si'o Mawu, wua'udde sumaruanna watukku wal᷊en patataṛṛamawuanna indi see umal᷊iomanna Si'o,

³⁶ antimanna wuassu surga I'o maddaringikka si mangitou. Wuṛṛu ampungewe rosan uman-Nu Israel wuṛṛu ratun mangitou. Aṛṛa'ete i mangitou ma'ola'a apa apan mapia. Wua'udde, oh Mawu, panossokken uranna su wanua-Nu indi, wanua apan buatte nionggollu Mawu su uman-Nu maola'a pussaane saran mal᷊annu-l᷊annu.

³⁷ Amungkangngu wanua indi naṛṛiaannu ṛutumma ara'e al᷊aṛṛussa'itta, wuṛṛu manga sasuanna naṛṛangu su anginna mal᷊oso, radda'a ara'e niinassu taṛṛangassa, ara'e amungkangngu uman-Nu pangaloannu seetta, ara'e nirumadda'a,

³⁸ antimanna I'o maddaringikka aal᷊iomanni mangitou. Amungkangngu wuassu wallattu uman-Nu Israel piaddu apan ringannu naungnga massusa umal᷊iomanna Si'o lapiddu uawatte limane watukku wal᷊en patataṛṛamawuanna indi,

³⁹ antimanna I'o wuassu atatanaan-Nu su surga maddaringikka see mangampungnga wuṛṛu mantul᷊ungngi mangitou. Tumba'u I'o apan masingkattu lal᷊ummu manga inolaanne,

⁴⁰ tadea'u uman-Nu matuṛṛutta Si'o sidutu su al᷊o'engngu i mangitou uatana'a su wanua apan buatte nionggollu Mawu su al᷊amonan kami.

^41-42 Amungkangngu sangkatou raho su wanua apan marau naaringikka ola'u awawantu-Gu wuṛṛu su ola'u manga al᷊aṛṛindu'a apan buatte niolang-Ngu su uman-Nu, ana see i tou rumanta su wal᷊en patataṛṛamawuanna indi mangaddatta Si'o wuṛṛu umal᷊iomanna Si'o,

⁴³ antimanna wuassu atatanaan-Nu su surga I'o maddaringikka aal᷊iomanne wuṛṛu mangonggollu darorongnge. Ringannu aroddi al᷊awo'u walahanna su ahewallu runia maaillal᷊a Si'o wuṛṛu matuṛṛutta Si'o ere uman-Nu Israel. I mangitou sarun maasingkatta manungku wal᷊en apan ta'u niola'a indi uddewe tampa patataṛṛamawuanna Si'o.

⁴⁴ Amungkangngu I'o mamarenta uman-Nu inai mapapangalo lumawangnga seetta, ana see su anambon tampa i mangitou isudde, i mangitou sumaruanna watukku soa apan nipile-Nu indi wuṛṛu umal᷊iomanna uasaruanna wal᷊en indi apan buatte ta'u niola'a Si'o,

⁴⁵ antimanna wuassu surga I'o maddaringikka aal᷊iomanni mangitou udde, wuṛṛu mangonggollu auntunganna si mangitou.

⁴⁶ Amungkangngu uman-Nu marosa Si'o – mangke atonna tawe saran sangkatou apan tawe marosa – ana see ana waugu asasa'u-Nu i mangitou niwala-Nu iawaddon seetta, wuṛṛu niapidda naola'a taumata niatawanna watukku sambau wanua apan marau ara'e marani,

⁴⁷ antimanna I'o maddaringikka aal᷊iomanni mangitou. Amungkangngu su wanua udde i mangitou manantangngu manga rosa mangitou, wuṛṛu umal᷊iomanna Si'o lapiddu manga'u manungku i mangitou buatte na'ola'a al᷊al᷊eo, daringiṛṛewe aal᷊iomanni mangitou, oh Mawu.

⁴⁸ Amungkangngu su wanua indi i mangitou ringannu naungnga mal᷊uassa wuṛṛu atonna-tonna manantangngu manga rosa mangitou, wuṛṛu umal᷊iomanna Si'o lapiddu sumaruanna watukku soa nipile-Nu wuṛṛu wal᷊en patataṛṛamawuanna apan buatte ta'u niola'a apan hunane Si'o indi,

⁴⁹ ne wuassu atatanaan-Nu su surga doronganna I'o maddaringikka aal᷊iomani mangitou wuṛṛu umakkanni mangitou.

⁵⁰ Ampungewe anambon dosa wuṛṛu al᷊al᷊eo mangitou su saruan-Nu, wuṛṛu ola'e manga seetti mangitou ma'ola'a si mangitou ringannu mapia.

⁵¹ I mangitou uddewe uman-Nu sassane apan buatte niapiddu Mawu sinumabbangnga wuassu Mesir wanua suapa i mangitou nisansara.

⁵² Antimanna I'o, oh Mawu Ruata, sidutu ua'ellegga uman-Nu Israel wuṛṛu ratune. Wuṛṛu sal᷊andeanna I'o maddaringikka aal᷊iomanni mangitou suapan i mangitou sumal᷊ande maiontolla Si'o.

⁵³ I'o, oh Mawu Ruata, buatte namile si mangitou wuassu wallattu walahanna tadea'u maola'a uman-Nu sassane, ere buatte niwisara-Nu si mangitou wuassi allang-Ngu Musa, sutempo I'o nangehetta al᷊amonan kami sinumabbangnga wuassu Mesir!”

Aal᷊iomanna panguddusanne

⁵⁴ Etearoddi i Salomo niumal᷊iomanna na'oman sara niumal᷊intudda su saruannu mezbah wuṛṛu ringannu lima uawatte ire'e. Wua'udde i tou dirumarisikka

⁵⁵ wuṛṛu ringannu tingikka ma'ikkatta naddorongnga al᷊amattu Ruata hunan anambon taumata apan uasemodda isudde, wisarane

⁵⁶ “Dalo su Mawu apan buatte nangonggollu atatammudda su uman-Ne ere buatte niriandi-Ne wuassu allang-Nge i Musa. Sarangkanambone apan mapia apan niriandi-Ne mangke natipussa.

⁵⁷ Antimanna Mawu Ruatan kite uaṛundinganna si ite su ereapa i Tou lai uaṛundinganna al᷊amonan kite. Antimanna i Tou tawe manantangngi ite.

⁵⁸ Antimanna i Tou ma'ola'a si ite manga taumata apan maaddunna si Tou tadea'u i ite sidutu wiakka tumuṛṛuttu apulu-Ne wuṛṛu matuṛṛutta su anambon tita wuṛṛu parenta apan buatte nionggolli Tou su al᷊amonan kite.

⁵⁹ Antimanna Mawu, Ruatan kite, sidutu mannaungnga aal᷊iomanna wuṛṛu sasal᷊ande apan buatte ta'u niwal᷊o si Tou. Antimanna i Tou sidutu mapal᷊iatta'u darangngu-Ne su umattu Israel wuṛṛu ratune ringannu mangonggola si mangitou apa apan haggausanni mangitou miallo-miallo.

⁶⁰ Ringannu aroddi al᷊awo'u walahanna su runia sarun maasingkatta manungku tumba'u Mawu sassane Ruata, tawe baine.

⁶¹ Ṛinone i yamiu, uman-Ne sidutu satia su Mawu, Ruatan kite wuṛṛu matuṛṛuta su manga tita wuṛṛu manga parenta-Ne ere lai a'olaanni i yamiu su allo indi.”

Patatenegu Wal᷊en Mawu

⁶² Wua'udde Ratu Salomo wuṛṛu anambon taumata apan uasemodda isudde nangonggollu sasamba su Mawu.

⁶³ Hunan sasamban paddarame i Salomo nangonggolla 22.000 sapi wuṛṛu 120.000 domba. Etearoddi ratu wuṛṛu anambon tumanangnge na'ola'a lal᷊aghun patatenegu Wal᷊en Mawu.

⁶⁴ Allo udde lai i Salomo nanenegu wageangngu tangngane rallakka apan su saruannu Wal᷊en Mawu udde. Wua'udde su rallakka udde i tou nangonggollu sasamba itattambunna, sasamba gandumma, wuṛṛu tawan binatangnga maoloa'a sasamban paddarame. Sarangkanambone udde nionggolli Salomo isudde ana waugu mezbah witu'a tumaniten addio'a pangaddoannu anambon sasamba udde.

⁶⁵ Su Wal᷊en Mawu udde i Salomo wuṛṛu anambon umattu Israel nallaghu ramean Rasannu Rongnga al᷊annune pitu allo. Tumaniten manambo reengannu taumata apan uasemodda isudde. I mangitou nirumanta wuassu wageangngu leta'a araune wuassu Lal᷊annu Hamat su sawannakka maddatingngu passarannu Mesir su timukka.

⁶⁶ Su allo aual᷊une i Salomo nandolokku manga taumata nabbelengke su wal᷊en mangitou ringannu naungnga apan lullala'a, ana waugu anambon al᷊amatta apan buatte nionggollu Mawu su allang-Nge i Daud wuṛṛu su walahannu Israel uman-Ne.