1 MARARATU 4 - WUKE SUSI WATTI'U AL᷊AL᷊USASSA

Manga mammamanaran i Salomo

¹ I Salomo naola'e ratu su ahewallu wanuan Israel.

^2-6 Eteindi manga mammamanara atanggaṛṛanne apan buatte nipilen Salomo: Manga imam: i Zadok, i Azarya ana'i Zadok, i Abyatar Mamamoṛṛettu aṛṛaratuanna: i Elihoref wuṛṛu i Ahia, eteudde manga ana'i Sisia Mamanahipunna roittu araratuanna: i Yosafat ana'i Ahilud Tembonannu tantara panglimane: i Benaya, ana'i Yoyada Mamarikissa manga bupati: i Azarya, ana'i Natan Mananantiro ratu: i Imam Zabud, ana'i Natan Uapua amonnanu wal᷊en araratuanna: i Ahisar Tembonannu mamanara sukarela: i Adoniram, ana'i Abda

⁷ I Salomo nanenegu lai mapul᷊o dua bupati su ahewallu wanua Israel. Manaran mangitou eteudde mangngammulla wuassu wageangngu leta'i mangitou manga anna hunan ratu wuṛṛu amonannu araratuanna. Suapan bupati ringannu ualal᷊ol᷊ossa uapasanna manara udde al᷊annune sambul᷊anna suapan santonna gubernure.

^8-19 Mapul᷊o dua bupati udde paparentannu sangkatou gubernure. Eteindi aranna manga bupati udde wuṛṛu wageangngu leta'a apan paparentanni mangitou: i Ben-Hur: wageangngu leta'u panenteanni Efraim i Ben-Deker: soa Makas, Saalbim, Bet-Semes, Elon, Bet-Hanan i Ben-Hesed: soa Arubot, Sokho, wuṛṛu ahewallu leta'u Hefer i Ben-Abinadab, awingngi Tafat sinangianni Salomo: ahewallu wageangngu leta'u Dor i Baana ana'i Ahilud: soa Taanakh, Megido, wuṛṛu ahewallu leta'a maranin Bet-Sean, maranin soa Sartan su samba'a timukku soa Yizreel maddatingngu araune sara soa Abel-Mehola wuṛṛu soa Yokmeam. Ben-Geber: soa Ramot su Gilead, manga ampunga su Gilead pussa'an bawosoanni Yair papapulunni Manasye, wageangngu leta'u Argob su Basan; sarangkanambone 60 soa wahahewalla apan nitohassu tanda'a watu wuṛṛu manga papale witu'a su manga ngarane i Ahinadab ana'i Ido: wageangngu leta'u Mahanaim i Ahimaas, awingngi Basmat sinangianni Salomo: wageangngu leta'i Naftali i Baana ana'i Husai: wageangngu leta'i Asyer, soa Alot i Yosafat ana'i Paruah: wageangngu leta'i Isakhar i Simei ana'i Ela: wageangngu leta'i Benyamin i Geber ana'i Uri: wageangngu leta'i Gilead, apan dorone paparentanni Sihon ratun Amori, wuṛṛu Og ratun Basan.

Awawantugu pamamarentan Salomo

²⁰ Tumana'u Yehuda wuṛṛu Israel anambone ere anne su wiwikku tahal᷊oangnga. I mangitou uatahuanna anna manambo wuṛṛu ua'e see mabbiakka su lal᷊umanna'a.

^21-25 Suapan amonanna uatahuanna waillu anggore wuṛṛu waillu ara. Su al᷊o'engngu pabbiaṛṛanni Salomo tumana'a su ahewallu Yehuda wuṛṛu Israel wuassu Dan maddatingngu Bersyeba mabbiakka ringannu matammudda wuṛṛu mal᷊angnganna. Ana waugu, anambon datu su samba'an waṛṛattu Efrat uasuṛṛubawa si tou, wuṛṛu anambon balahanna wuassu manga araratuanna maranin araratuanne uahahawen tou. Leta'a su samba'an waṛṛattu Sal᷊ukku Efrat wuṛṛu Tifsah su wiwikku Sal᷊ukku Efrat masal᷊a su waṛṛata watukku soa Gaza su Filistin maddatingngu passarannu Mesir, sarangkanambone paparentanni Salomo. Manga walahanna su wanua udde uasuṛṛubawa si tou wuṛṛu mammaekka wose. Manga anna apan pappandumanni Salomo suapan allo eteudde 5.000 litere taponna al᷊ussa, 10.000 litere taponna hal᷊agga, 10 sapi sulal᷊ummu tanda'a, 20 sapi su wadda'a, wuṛṛu 100 domba. Wal᷊ine wua isudde lai rusa, kijang, menjangan wuṛṛu manga manu'u winalanganna.

²⁶ I Salomo uatahuanna 12.000 tantara uasa'e awal᷊o wuṛṛu 40.000 kandangu manga awal᷊o iapawol᷊engnga manga keretane.

²⁷ Ringannu ualalolossa, al᷊annune sambul᷊anna, suapan bupati mannantillu al᷊awo'u anna hunan Ratu Salomo wuṛṛu hunan anambon taumata apan maasomba anna wuassu wal᷊en araratuanna, na'oman sara i mangitou tawe asueanne.

²⁸ Suapan bupati udde mangonggollu lai gandumma wuṛṛu nannal᷊o su anambon awal᷊on Salomo, mawae awal᷊o sassa'eanna aroddi lai awal᷊o kareta. Annu winatangnga udde ia'apidda su manga tanda'u awal᷊o apan haggausanne.

²⁹ Ruata nangonggolla si Salomo asingkatta, wuṛṛu apande apan tumaniten bahewalla, see pasasunna apan tumaniten mal᷊al᷊umma.

³⁰ Su manga wanua ra'i wuṛṛu su Mesir tawe taumata apan apandene ere i tou.

³¹ I tou atonna-tonna apandeanne wuassu anambon taumata. I tou nangillembo wuassi Etan taumatan Ezrahi, si Heman, si Kalkol wuṛṛu si Darda al᷊aṛṛana'i Mahol. Aranni Salomo tinumelengnga su al᷊awo'u tampa su manga wanua uapal᷊iwutta araratuanne.

³² Pia 3.000 sasanato'a wuṛṛu nallebbe wuassu saṛṛiwu antari apan niarangnge.

³³ I tou wotongnge mabbisara su ola'u manga aaluanna wuṛṛu manga sasuanna – wuassu alu cemaran Libanon maddatingngu nannal᷊on hisop apan tinumuwo su manga darandungnga watu. I tou mabbisara lai su ola'u manga winatangnga, ere manu'u winalanganna, winatangnga tuttondon tianne wuṛṛu inassa.

³⁴ Manga ratu su ahewallu runia naaringika ola'u apapanden Salomo na'oman sara i mangitou nandolokku sangkatou taumata inai ringanni tou tadea'u maddaringikka si tou.