1 MARARATU 3 - WUKE SUSI WATTI'U AL᷊AL᷊USASSA

I Ratu Salomo niumal᷊iomanna naddorongnga asingkatta

¹ I Ratu Salomo na'ola'a Mesir hawene ringannu na'awingngu ratun Mesir. Sinangianna udde niapiddi Salomo watukku soan Daud tadea'u matana'a isudde ma'oman sara wal᷊en araratuanna wuṛṛu Wal᷊en Mawu see tanda'a watu apan uapal᷊iwutta Yerusalem nasuete niapararisikka.

² Ana waugu Wal᷊en Mawu taambe niwangunna sutempo udde, tumanangnge ta'e mangngonggollu sasamba su al᷊awo'u tampa.

³ I Salomo marangngu Mawu wuṛṛu tuttuṛṛutta manga tatantiro wuassu iamangnge, arawe i tou ta'e maṛṛata wuṛṛu mangngonggollu sasamba winatangnga su al᷊awo'u tampa.

⁴ Tampa patataṛṛamawuanna apan lembon tinumelengnge poi su Gibeon. I Salomo masokka mangonggollu sasamba poiaroddi. Su allo sambau, ere inanaramanne, i tou inaite poiaroddi apia.

⁵ Rabbi udde Mawu naipasilon batangan-Ne si tou sulal᷊ummu waliawa wuṛṛu nabbisara, “Salomo, paddorongke apa apan ipaapulunu, iddi sarun Ta'u ionggila si'o!”

⁶ I Salomo sinumimbakka, “Mawu, I'o buatte napal᷊iatta'a manungku I'o tumaniten marangngu iamangku Daud, allang-Ngu udde. I tou mapia, tawe awusune see matamudda Si'o. Wuṛṛu naola'a wataṛṛune manungku sarangkal᷊o'enge I'o sidutu mandangngu si tou, I'o nangonggolla si tou sangkatou ana'a esakka apan uaparenta nallol᷊ossa si tou.

⁷ Oh Mawu, Ruata'u, I'o namile si ya'u naola'a ratu nallol᷊ossa iamangku, salaiwe i ya'u ta'e saṛṛentumuwo wuṛṛu wagga ereapa olangnge mamarenta.

⁸ I ya'u uatana'a su pattangngannu walahanna apan buatte nipile-Nu maola'a uman-Nu sassane. I mangitou sambau walahanna wahewalla apan tawe iareengnga anambone.

⁹ Ana waugu udde, Mawu, onggol᷊aawe si ya'u asingkatta apan ta'u pappandumanna ipamarenta uman-Nu indi ringannu atatul᷊idda wuṛṛu tadea'u masingkatta mamile suapa apan mapia wuṛṛu suapa apan dal᷊eo. Amungkangngu tawe aroddi, ereapa wotongnge i ya'u mamarenta uman-Nu apan wahewalla indi?”

¹⁰ Mawu mal᷊uassa ringannu darorongngi Salomo udde

¹¹ wuṛṛu nabbisara si tou, “Ana waugu i'o maddorongnga asingkatta ipamarenta ringannu atatul᷊idda, wuṛṛu wal᷊ine uukka mal᷊oengnga ara'e paa'ala hunan batangannu sassane ara'e apapaten manga seennu,

¹² ne darorongngu udde sarun Ta'u suunganna. I Ya'u sarun ma'ola'a si'o lembon masingkatta wuṛṛu lembon pia apande wuassu anambon taumata, mawae sutempo nangkal᷊iu ara'e lai sutempo addantane.

¹³ Ewe'e lai apa apan tawe nirorongannu lai sarun Ta'u ionggola si'o; su al᷊o'engngu pabbiaṛṛamnnu i'o sarun maala wuṛṛu a'addatanna nangillembo wuassu al᷊awo'u ratu waine suapan tampa.

¹⁴ Wuṛṛu amungkangngu i'o, mangaṛṛussa iamangngu Daud, matuṛṛutta si Ya'u see mappaamattu manga tita'-U, i Ya'u sarun mangonggolla si'o uukka mal᷊o'engnga.”

¹⁵ Napawe napu'ote, i Salomo naatutukka manungku Ruata buatte nabbisara si tou sulal᷊ummu wal᷊iawa. Ne i tou nabbelengke watukku Yerusalem see dirumarisikka su saruannu Wantallu Paairen Mawu wuṛṛu nangonggollu sasamba itattambunna wuṛṛu sasamban paddarame. Wua'udde i tou na'ola'a andeangnga su anambon mammamanaran araratuanne.

I Salomo namarikissa sambau hatto apan masahadda

¹⁶ Su allo sambau, ruan katou wawine masandaga nirumanta sinumaruanna si Ratu Salomo.

^17-18 Sangkatou suwallatti tarua nabbisara, “Tuangnga Apan Mawantuga, i ya'u ringannu wawine indi uatana'a su wal᷊en sambau. Tawe taumata waine apan uatana'a ringanni yambua. Manga pira tempo nal᷊iu, i ya'u nanungkangu sangkatou ana'a esakka. Darua allo wua'udde wawine indi lai nanungkangngu ana'a esakka.

¹⁹ Su ṛabbi sambau sutempo yami tantal᷊anna mattiilla, wawine indi ringannu tawe nipattatudda naumpisanna anangnge na'oman sara nate.

²⁰ Rabbi mattangnga tantal᷊anna i ya'u mattiilla, i tou napu'o wuṛṛu nanganu ana'u wuassu sandiṛṛangku. Ana'u udde niaddone su tampa atatiil᷊anne, wuṛṛu anangnge apan natete udde niaddone su tampa atatiil᷊angku.

²¹ Tiṛṛabbine rua allo, sutempo i ya'u napu'o ana mapaasusun ana'u udde, inauranna i tou natete. Napawe i ya'u mannutukka, inauranna ana'a udde wal᷊ine ana'u.”

²² “Awusu!” unnu wawine waine udde, “Yapa wiakka indi ana'u, iapa nate udde anangngu!” “Tawe!” sasimbakku wawine apan paarorone udde, “Iapa nate indi anangngu, wuṛṛu iapa wiakka indi ana'u!” Etearoddi itarua uatatiakka su saruannu ratu.

²³ Ana see i Ratu Salomo nabbisara, “Iraddua sangkatou-sangkatou mangnga'u manungku ana'a apan biakka indi anangngu wuṛṛu wal᷊ine iapa apan nate udde.”

²⁴ Napawe buatte nabbisara aroddi ratu nandolokku taumata niapaanu hal᷊ele.

²⁵ Wua'udde ratu namarenta, “Ponggo'e ana'a apan biakka udde tahia darua wuṛṛu onggol᷊a'e passampoto sitarua sangkatou-sangkatou.”

²⁶ Naaringikka parenta udde, inangnga apan ṛinone wuassu ana'a udde nabbisara, “Ampunga, Tuangnga, aria pappate ana'a udde. Onggol᷊a'e si tou.” Inangnga udde nabbisara aroddi ana waugu i tou lembon marangngu anangnge. Arawe wawine apan baine udde nabbisara, Ore, ponggo'e, tadea'u su naaringikka parenta udde, inangnga apan rinone wuassu ana'a udde nabbisara, “Ampunga, Tuangnga, arie pappate ana'a udde. Onggol᷊a'e si tou.” Inangnga udde nabbisara aroddi ana waugu i tou lembon marangngu anangnge. Arawe wawine apan baine udde nabbisara, “Ore, ponggo'e, tadea'u su walatti yambua taweddu maasomba!”

²⁷ Ne i Salomo nabbisarate, “Arie pappate ana'a udde! Onggol᷊a'e su wawine apan paarorone udde – ete i tou inangngene.”

²⁸ Sutempo walahannu Israel naaringikka putusanni Salomo sulal᷊ummu hatto udde, i mangitou tinumiangnga wuṛṛu mangngaddatta si tou. Ana waugu, nilumiatta'e manungku Ruata buatte nangonggolla si tou asingkatta tadea'u mammanara ringannu atatul᷊idda.