1 MARARATU 21 - WUKE SUSI WATTI'U AL᷊AL᷊USASSA

Waillu anggori Nabot

¹ Maranin Bal᷊en araratuanni Ahab su Yizreel pia santampa waillu anggore tatahuanne sangkatou aranne i Nabot.

² Su allo sambau i Ahab nabbisara si Nabot, “Onggola'e waillu anggorenu udde si ya'u, ana waugu wailla udde maranin wal᷊en araratuangku. I ya'u mappulu massuannu manga sayore isudde. I'o sarun maasomba waillu anggore apan lembon apianne maola'a hahantine, ara'e amungkangngi i'o mappulu, i ya'u sarun mamalli ringannu aregga apan su ṛione!”

³ I Nabot sinumimbakka, “Waillu anggore indi pussa'an iupungngu al᷊amona'u. Ringannu arannu Ruata, i ya'u tawe wotongnge mangonggolla si Tuangnga!”

⁴ Ringannu naungnga massusa wuṛṛu massa'u ana waugu naaringikka apa apan niwisaran Nabot si tou, i Ahab napul᷊e ana see nilumallowangnga su tampan atatiil᷊anne ringannu namilingngu hatine wuṛṛu maddiri umanna.

⁵ I Izebel awingnge inaite ringanni tou wuṛṛu naiwal᷊o, “Anio i'o massusa? Anio maddiri umanna?”

⁶ I Ahab sinumimbakka, “I ya'u tawe mal᷊uassa si Nabot. I ya'u maddorongnga si tou tadea'u i tou mabbal᷊u'u waillu anggorene si ya'u, ara'e ta'u sal᷊iuannu waillu anggore waine, amungkangngu udde ipaapulune, arawe i tou maddiri!”

⁷ “I'o indi ratun Israel!” sasimbakki Izebel. “Pabbangunte orassa indi wuṛṛu ante. Paal᷊uasse naungngu, ana waugu i ya'u sarun mangonggollu waillu anggori Nabot si'o!”

⁸ Ne i Izebel namoṛṛettu suratta ringannu aranni Ahab wuṛṛu nireetannu segellu ratu su suratta udde. Suratta udde niiringnge su manga piaṛṛa'a wuṛṛu manga matatimmaddu wanua su Yizreel.

⁹ Eteindi lal᷊oṛṛon suratta udde, “Al᷊iata'e tadea'u tumana'a mappuasa wuṛṛu i mangitou doloṛṛa'a ma'ammulla! Sulal᷊ummu ammul᷊anna udde onggola'a si Nabot tampa aiananna apan apianne.

¹⁰ Doloṛṛa'a ruan katou taumata lal᷊eo ua'ianna uasaruanna si tou wuṛṛu mangansilla si tou manungku i tou buatte nantal᷊an Duata wuṛṛu ratu. Ana see apira'e i tou watukku liuddu soa, wuṛṛu tuntungken batu ma'oman sara mate!”

¹¹ Parentan Izebel udde niapaamattu manga piaṛṛa'a wuṛṛu matatimmaddu wanua Yizreel.

¹² I mangitou niumal᷊iata tadea'u tumana'a mappuasa. Wua'udde i mangitou nandolokku taumata ma'ammulla wuṛṛu i Nabot nionggol᷊annu tampa apan apianne.

¹³ Ruan katou taumata lal᷊eo ua'ianna uasasaruanni Nabot, wuṛṛu su saruannu awadaalla itarua nangansilla si tou manungku i tou buatte nantal᷊an Duata wuṛṛu ratu. Ana waugu udde i tou niapidda watukku liuddu soa ana see tinuntungannu watu na'oman sara nate.

¹⁴ Watti'a su ola'u pamamate si Nabot niapasingkatta si Izebel.

¹⁵ Tawe nal᷊annu napawe Izebel naasengkamma watti'a udde i tou nabbisarate si Ahab, “Nabot nate. Orassa indi roote anute waillu anggore udde apan tawe iwal᷊u'i tou si'o.”

¹⁶ I Ahab nasasaṛṛawutta inai wuṛṛu nanganu waillu anggore udde naola'a pussaane.

¹⁷ Ana see unnu Mawu si Elia, nabi wuassu Tisbe udde,

¹⁸ “I Ahab, ratun Samaria udde orassa indi poia su waillu anggori Nabot manganu wailla udde maola'a pussaane. Nariaddi roote i'o inaiaroddi,

¹⁹ wuṛṛu wal᷊oa'a si tou manungku i Ya'u, Mawu, nabbisara arendi, ‘Buatte namate, mangaṛṛo lai! Ana waugu udde daṛṛanu sarun lewanu asu su tampan manga asu apan nallewa daṛṛan Nabot!’ ”

²⁰ Sutempo i Ahab naasilo si Elia, i tou nabbisara, “Ei seetta, panginsueanne i'o naasangkalla si ya'u!” “Atonna,” sasimbakki Elia. “Ana waugu i Tuangnga ringannu na'utulla na'ola'a al᷊al᷊eo su aellegu Mawu,

²¹ ne eteindi apan niwisaran Mawu si Tuangnga, ‘I Ya'u mandantan asasilaka si'o. I'o Ta'u limbuaṛṛanna, wuṛṛu suapan taumata esakka sulal᷊ummu amonannu, timmadde ara'e dario'a, sarun Ta'u insueanna.

²² Amonanu sarun maola'a ere amonanni Ratu Yerobeam ana'i Nebat wuṛṛu ere amonanni Ratu Baesa ana'i Ahia, ana waugu i'o naaola'a Israel ma'ola'a rosa na'oman sara nandatan asasa'u-U.’

²³ Su ola'i Izebel, Mawu nabbisara manungku waddangnge sarun inasannu asu sulal᷊ummu soa Yizreel.

²⁴ Isai-isai wuassu lal᷊oṛṛon amonannu apan mate su soa sarun inasannu asu, wuṛṛu apan nate su liuddu soa sarun inasannu manu'u winalanganna.”

²⁵ Tawe saran paassa pia taumata apan ringannu na'utulla ma'ola'a al᷊al᷊eo su aellegu Mawu ere apan niola'i Ahab. Anambon al᷊al᷊eo udde niolangnge wuassu darolokki Izebel, awingnge.

²⁶ I Ahab na'ola'a manga rosa apan lembon maarantinna; i tou massubba paal᷊uanna ere apan a'olaannu taumatan Amori, eteudde manga taumata apan buatte nilimbuaṛṛannu Mawu niapasabbangnga wuassu wanua Kanaan sutempo taumatan Israel sinumutta su wanua udde.

²⁷ Napawe i Elia nuddusse nabbisara, i Ahab nanggesa'a laungnge wuṛṛu nalluṛṛen laubba karongnga naola'a tatiala sussassilla, ana see nappuassa. Sutempo mati'illa lai i tou nappaattu nasa karongnga, wuṛṛu amungkangngu umamatta, hatine sidutu massusa.

²⁸ Mawu nabbisara si Nabi Elia,

²⁹ “I'o buatte naasillo ereapa i Ahab nattingkawawon batangane su saruang-Ku? Ana waugu udde, i Ya'u tawe mandantan asasilaka tantal᷊anna i tou ta'e wiakka. Sutempon anangnge wakkute udde i Ya'u mandantan asasilaka su amonanne.”