1 MARARATU 20 - WUKE SUSI WATTI'U AL᷊AL᷊USASSA

Pangalo ringannu Siria

¹ Su allo sambau i Benhadad, ratun Siria, nangammullu anambon tantarane, wuṛṛu suaddio'a ringannu 32 ratu waine ringannu keretan pangalo, wuṛṛu awal᷊on mangitou, i tou nalliwunna wuṛṛu namangalo soan Samaria.

² Ana see i tou nandolokku taumata inai ringanni Ahab, ratun Israel, su soa udde ringannu tanata indi,

³ “I Ratu Benhadad maddorongnga tadea'u i'o manantilla si tou wul᷊awanna, sal᷊a'a, manga awingngu, wuṛṛu manga anangngu apan mangkatohassa.”

⁴ I Ahab sinumimbakka, “Wal᷊oa'a si tuangnga Ratu Benhadad manungku i ya'u mappulu. I tou wotongnge manahuanna si ya'u wuṛṛu al᷊awo'u darotongku.”

⁵ Wua'udde manga daroloṛṛanna udde nabbelengnga apia ringanni Ahab mamasingkattu darorongnga waine wuassi Benhadad. Arendi tingikku darorongnga udde, “Dorone ratun kami maddorongnga tadea'u i'o manantilla si tou wul᷊awanna wuṛṛu sal᷊a'a see manga awingngu wuṛṛu manga anangngu.

⁶ Arawe orassa indi i tou nandolokku manga tembonannu tantara ipaparikissa wal᷊en araratuannu wuṛṛu wal᷊en manga mammamanaranu, see manganu manga saranapa apan tumuṛṛutti mangitou maarega. I mangitou sarun dumanta isindi tiṛṛabbi ere lai orassa indi.”

⁷ Ne i Ratu Ahab namaggo anambon piaṛṛa'u Israel wuṛṛu nabbisara, “I yamiu ua'ellega sassane manungku taumata indi mappulu manilaka si ite. I tou maddorongnga tadea'u i ya'u manantillu manga awingku wuṛṛu manga ana'u see wul᷊awanna sal᷊aa'u, wuṛṛu i ya'u tawe wotongnge manol᷊a'u darorongnge udde.”

⁸ Manga piaṛṛa'a wuṛṛu tumanangnge nabbisara, “Arie paddaringikka si tou, Tuangnga! Arie tumuṛṛutta apulune.”

⁹ Ana waugu udde i Ahab sinumimbakka manga daroloṛṛanni Benhadad udde arendi, “Pasingkata'a si Tuangnga, ratunu udde manungku i ya'u umire su darorongnge paarorone, arawe darorongnge apan aruane indi ya'u maddiri.” Ne napul᷊ete manga daroloṛṛanna udde, wua'udde nabbelengnga apia ringanni Ahab wuṛṛu nabbisara,

¹⁰ “Ratun kami sarun mangirimmu aroddi anambone tantara ipakkimunsa'a soanu, na'oman sara awu wuassu manga winal᷊alannu soanu udde sawun iarootti mangitou abbi tumba'u ringannu ta'iakki mangitou. I tou nassalu tadea'u manga monganna makkuumanna, wuṛṛu mamate si tou, amungkangngu i tou tawe mapaamattu olangnge udde!”

¹¹ I Ratu Ahab sinumimbakka, “Wal᷊oa'a si Ratu Benhadad; Tantara apan tutune sarun maapendamma mal᷊uassa napawe buatte napapangalo, wal᷊ine taambe napapangalo.”

¹² Sasimbakki Ahab udde niapasingkatta si Benhadad sutempo i tou suaddio'a ringannu manga ratu waine apan naola'a hawene ma'inumma sulal᷊ummu rasanni mangitou. Naaringikka udde i Benhadad namarenta manga piaṛṛa'u tantarane tadea'u nandiahite mamangalo soan Samaria. Ne i mangitou nandiahite.

¹³ Tantal᷊anna udde, sangkatou nabi inaite ringanni Ahab wuṛṛu nabbisara, “Mawu nabbisara: ‘I'o maasilo tantara apan manambo udde? I Ya'u sarun mangonggollu auntunganna si'o si mangitou su allo indi. I'o sarun maasingkatta manungku ete i Ya'u Mawu.’ ”

¹⁴ “Isai apan ṛinone mamangalo paarorone?” aiwal᷊on Ahab. Nabi udde sinumibakka, “Manga tantara saṛṛentumuwo, manga mandadariagga bupati. Etearoddi wisaran Mawu.” “Wuṛṛu Isai apan mamiaṛṛa'u pamamangalo udde?” aiwal᷊on ratu apia. “I Tuangnga sassane,” sasimbakku nabi udde.

¹⁵ Ne ratu napaasabbangke manga tantara saṛṛentumuwo mandariaga manga bupati. Sarangkanambone pia 232 suatoune tantara. Wua'udde i tou na'ola'a inolaanna apan uasul᷊ungnga ringannu tantaran Israel. Sarangkanambone pia 7.000 suatoune.

¹⁶ Pamamangalo nitattakka allo sutempo i Benhadad wuṛṛu tallun pul᷊o dua ratu apan naola'a hawene udde tantal᷊anna ma'inumma na'oman sara niwu'anne sulal᷊ummu rasanni mangitou.

¹⁷ Apan niumamatta dorone eteudde manga tantara saṛṛentumuwo udde. Manga taumata apan nirolokki Benhadad iapataṛṛoso'o seetta, nabbal᷊o si Benhadad manungku ammul᷊annu tantara tantal᷊anna ruddanta ringanni mangitou wuassu Samaria.

¹⁸ I Benhadad namarenta tadea'u tantaran seetta udde samettanna ta'e wiakka, tawe pandune tanne i mangitou rumanta mapapangalo ara'e maddame.

¹⁹ Manga tantara saṛṛentumuwo apan niapasabbangngi Ratu Ahab udde nanattakke niumal᷊ore wuassu soan Samaria, tatantalongannu tantaran Israel.

²⁰ I mangitou sangkatou-sangkatou namate seetta apan sasaruananne. Manga taumatan Siria tinumal᷊angnga, nienggenannu taumatan Israel. Arawe i Benhadad naatal᷊angnga. I tou tinumal᷊angngu watanganne ringannu awal᷊o tatantalongannu manga pira tantaran awal᷊one.

²¹ I Ratu Ahab sinumutta lai sulal᷊ummu pangalo ana see nakkimunsa'a manga keretan pangalo wuṛṛu namate manga awal᷊one. Su allo udde taumatan Siria naruggi wahewalla.

²² Wua'udde nabi udde nirumanta ringanni Ahab wuṛṛu nabbisara, “Orassa indi, mappianne i tuangnga mapule wuṛṛu manohassa waddangnga see ma'ola'a hol᷊aga apan mapia-pia, ana waugu ratun Siria sarun dumanta mamangalo apia sutempo manontongnga apan manansunna.”

Pangalo aruane wuassu tantaran Siria

²³ Manga piaṛṛa'u tantaran Ratu Benhadad nabbisara si Benhadad, “Manga mawu sassubbannu walahannu Israel uataṛṛino su panenteanna, ana waugu udde i ite wotongnge iawaddon balahanna udde. Arawe i ite atonna sarun maawaddo si mangitou amungkangngu i ite mapapangalo su leta'a ratakke.

²⁴ Mappianne orassa indi i Tuangnga mangganti tallun pul᷊o dua ratu udde ringannu manga piaṛṛa'u tantaran Tuangnga sassane.

²⁵ Wua'udde ṛinone i Tuangnga mapasabbangngu ammul᷊annu tantara apan manambo ere lai anambon tantaran Tuangnga apan buatte niawaddo udde, see lai awal᷊o wuṛṛu keretan pangalo anambone ere dorone lai. I ite sarun mamangalo walahannu Israel udde su leta'a ratakke, wuṛṛu paassa indi i ite sarun maauntungnga.” I Ratu Benhadad niumire, ana see naddaringikka tantatiron manga piaṛṛa'u tantarane udde.

²⁶ Sutempo rongnga manontongke manansunna i tou napaasabbangngu tantarane wuṛṛu niumal᷊ore watukku soan Afek inai mamangalo taumatan Israel.

²⁷ Taumatan Israel lai nanuungngu ahiddu tantarane wuṛṛu mappaaloren mangitou. Ana see tantaran Israel udde inaita niumamatta sulal᷊ummu darua ammul᷊anna wuṛṛu naddasanna uasasaruannu taumatan Siria udde. Isumandingnga ringannu tantaran Siria apan nassal᷊iawukka namene wageangngu leta'a udde, tantaran Israel a'elehanna ere darua ammul᷊annu ambinga.

²⁸ Ana see nirumantate sangkatou nabi ringanni Ratu Ahab wuṛṛu nabbisara, “Eteindi apan niwisaran Mawu: ‘Ana waugu taumatan Siria udde massunna manungku i Ya'u tumba'u uataṛṛino su panenteanna wuṛṛu tawe su leta'a ratakke, ne i Ya'u sarun mangonggollu auntunganna si'o su tantaran mangitou apan tumaniten manambo udde. I'o wuṛṛu tumanangngu sarun maasingkatta manungku ete i Ya'u, Mawu.’ ”

²⁹ Su al᷊annune pitu allo taumatan Siria wuṛṛu taumatan Israel sidutu sulal᷊ummu paddasananni mangitou, uasasaruanna. Su allo appitune i mangitou mannattakke uapapangalo. Sulal᷊ummu pangalo udde taumatan Israel namate 100.000 suatoune taumatan Siria.

³⁰ Manga taumata apan naatal᷊angnga, tinumal᷊angnga watukku soa Afek, arawe darandungngu soa udde naṛṛa'a nangumpisanna 27.000 suatoune suwallatti mangitou. I Benhadad tinumal᷊angngu watanganne lai watukku soa udde wuṛṛu na'imbuni su sambau wal᷊en su wabbo'an dal᷊umme.

³¹ Manga piaṛṛa'u tantarane nirumanta ringanni tou wuṛṛu nabbisara, “Unu taumata, manga ratun Israel uddewe manga ratu apan maakkanna, ana waugu udde, wala'e yami sumaruanna ratun Israel ringannu malluṛṛen laubba karongnga maola'a tatialan sasassila wuṛṛu tal᷊i su ullekka maola'a tatiala masuṛṛubbawa. Antimanna i tou tawe mamate si Tuangnga.”

³² Ne i mangitou nalluṛṛeten laubba karongnga wuṛṛu tal᷊i su ullekka mangitou, ana see inaite sinumaruanna si Ahab wuṛṛu nabbisara, “I Benhadad uddewe allangngi Tuangnga. I tou sinumal᷊ande tadea'u i Tuangnga tawe mamate si tou.” I Ahab sinumimbakka, “Ta'e wiakka i tou, tuṛṛangku udde?”

³³ Atonna manga piaṛṛa'u tantaran Benhadad udde tantal᷊anna uaṛṛaddo tatiala mapia wuassi Ahab. Nariadi, sutempo i Ahab nabbisara, “tuṛṛangnga”, i mangitou lapiddu sinumibakka, “Atonna, i Benhadad uddewe tuṛṛangngi Tuangnga.” Ana see unni Ahab, “Apira'a i tou inawarendi!” Napawe i Benhadad na'omate, i Ahab nangahe si tou sinuma'e kereta.

³⁴ Ana see unni Benhadad si tou, “I ya'u sarun mamelengnga si Tuangnga manga soa apan buatte niaṛṛon iamangku wuassu iamangngi Tuangnga. I Tuangnga wotongnge lai mapararisikku pabbawal᷊u'anna su soan Damsyik ere apan niola'u iamangku su Samaria.” Sasimbakki Ahab, “Wuassu pinangianannu paairen Tuangnga udde, i ya'u sarun mamallossi Tuangnga.” Wua'udde i Ahab na'ola'e pa'aire ringanni Benhadad ana see namallossi tou.

Nabi Mawu napaasal᷊an Ahab

³⁵ Wuassu parentan Mawu, sangkatou nabi waussu wallattu ammul᷊annu nabi nandolokku ringanne mamuulla si tou. Arawe ringanne udde maddiri.

³⁶ Ana see nabi udde nabbisara, “Ana waugu i'o maddiri tumuṛṛutta parentan Mawu, i'o sarun tamboannu singa napawe mapul᷊ete wua insindi.” Atonna. Tawe nal᷊annu napawe i tou napulete wua isudde, i tou tinamboannu sambau singa.

³⁷ Ana see nabi udde inaite ringannu taumata waine wuṛṛu nabbisara, “Puule i ya'u!” Ne taumata udde namuulla si tou ringannu ma'ikkatta atonna na'oman sara nal᷊essa.

³⁸ Wua'udde nabi udde nama'issa hatine ringannu piṛṛissa sanggesa'a, tadea'u tawe aillal᷊annu taumata, ana see i tou inaite dirumarisikka su winggin dal᷊anna maṛṛaddo ratun Israel sumabbi.

³⁹ Napawe ratu sinumabbite, nabi udde namo'a si tou, “Tuangnga Apan Mawantuga, sutempo i ya'u tantal᷊anna mapapangalo su tampan papangaloanna, sangkatou tantara nangapidda ringangku sangkatou seetta apan niasametta. Tantara udde nabbisara, “Riaggaite taumata indi mapia-pia. Amungkangngu i tou tumal᷊angnga, i'o sarun pateanna ipallol᷊ossa si tou ara'e mamaekka 3.000 roitta sal᷊a'a.”

⁴⁰ Arawe wua'udde sutempo i ya'u tantal᷊anna mammanara manambo, taumata udde tinumal᷊angngu watanganne.” Ratu sinumimbakka, “I'o buatte nangema'u ṛuumannu sassane. I'o sarun mamasanna udde.”

⁴¹ Nabi udde namu'a piṛṛissa wawa'issa wuassu hatine, ana see ratu naaillal᷊a si tou sangkatou nabi.

⁴² Nabi udde nabbisarate ratu, “Eteindi apan niwisaran Mawu: ‘Taumata apan Ta'u niparentanna tadea'u pateanna buatte niwalanu naal᷊assangnga. Ana waugu udde i'o ṛinone mate maola'a hahantine. Tantaranu sarun maṛṛimunsa'a ana waugu buatte namalan tantaran seetta tinumal᷊angngu watanganne.’ ”

⁴³ Ratu napule watukku Samaria ringannu naungnga sussassilla wuṛṛu massa'u.